الوسم: الثاني

اهل الشمال كلهم ريفيين ومسلمين .. وطيبين وااايد واول مايعرفون
اننا من العرب .. يفرحون ويحاولون يساعدونا بأي طريقة ..
واذكر شيبه سأل ريلي انتو من عربستان ( يعني من العرب ) وقاله ريلي هيه .. ما فكه ..
كله يعزم و يدلنا ويوم ودعنا الدموع في عيونه يحليله ..
بس المشكله انهم لايعرفون عربي ولا انجليزي
( الا الشباب المتعلمين منهم )
عشان جي نحن كنا ماخذين احتياط معجم تركي – عربي
.
.

الفنادق في معظمها صغيره ونادر ماتلاقي شي راقي
ومعظم الفنادق ال 4 و5 ستار فيها واير ليس

.
.

المهمـ انطلقنا الظهر الى مطار اتاتورك في اسطانبول ..
واقلعنا بالطياره .. والرحلة استغرقت ساعتين ..

هذي بحيرة اوزنجول الي بتشوفون صورها عقب

هني وصلنا طرابزون

وصلنا طرابزون العصر وكنا تعبانين من السفر ..
كنا حاجزين مسبقا في فندق فوندا ..
( فندق 5 نجوم انصح الكل به )

طرابزون تمينا فيها ليله وحده بس .. كله فالفندق رقوووود
لني مرضت حزتها وريلي بعد .. زكمنا من البرد لووول

اليوم الثاني رحنا على طول على موقف الباصات وحجزنا تذاكر
عشان نسير أوزنجول الرائعه ..
كان تحرك الباص الساعه 6 العصر ..
زهبنا الاغراض ,, و ركبنا الباص ..

كانت المناظر خياليه طول الطريق ولاحسينا به ابد ..

طول الطريق يرافقك هالنهر الرائع

.
.

وصلنا اوزنجول .. وكان بالليل .. و صراحه تفاجأت
ع بالي انا عايشه فالامارات او السعوديه ..
ماشاء الله الكل مطيح هناك ..
على طول سرنا البنسيون ..ترا معظم الشمال التركي
مافيه فنادق كلها بنسيونات بس مرتبة .. وشي بعد اكواخ
بس الاكواخ محتلينها السعودين ماشاء الله هههه
سكنا في بنسيون اكسينوس ..
( حلو .. بس فيه احلى منه فالمنطقه هو اكواخ انصار أو انان )
المهم تمينا نحوط بالليل ,, بس وايد كانت تمطر وردينا الحجره
ورقدنا ..

والصبح وعيت وطلعت البلكونه وتفااااااااجأت بهالمنظر
كان مايبين فالليل من الظلمة ..
( نحن سكنا بجنب البحيره مره )

بحيرة اوزنجول على يساري

وهالمنظر على يميني

ورحت ركض على ريلي وعيته .. وطلعنا البلكونه ..
كانت الساعه 9 الصبح .. والمنظر رائع .. وكان شي مطر بس خفيف

على طول لبسنا وطلعنا ..
تريقنا وكان المطعم كله حريم خليجيات .. لوووول
كله يحشوووون خخخخ

يلست اصور

مدخل قرية اوزنجول .. واضح صورة المسجد الرئيسي عندهم

وهذي اسما بائعة الذره

هذا احنا رايحين نركب الجبل الي اوزنجول

ارتفعنا شوي .. وخذيت هاللقطه للبحيره والمسجد من فوق

ارتفعنا اكثر وقمنا نمر بقرى وايده
( لاحظو المساجد في كل مكان .. ماشاء الله عليهم احس متدينين اكثر عنا لووول )

وهني صرنا نلامس السحاب

صراحه كان الطريق مخيف .. طريق واحد رايح راد
لا وبعد مب اسفلت كله قرقره .. والمصيبه انه عرضه مايسع
سياره فور ويل ، تخيلو المأساه الي كنت عايشتها
طبعا كله انا مغمضه لين وصلنا فوق ..

.
.

وفجأه ونحن نمشي بنشر تاير السياره / من وعورة الارض

وانتهزنا الفرصه انا وريلي ونزلنا نمشي
ولقيت هذووول ويلست العب واركض وراهم
ههههه
والله ريلي طول الوقت يناديني هايدي ..
وانا اركض عسب اسمع صوت الجرس المعلق في البقر
لوووول

وقعدنا نمشي ونمشي لين وصلنا هالقرية

الكل كان يطالعنا باستغراب …
شوي يجوني الحريم لنه ريلي سار البقاله ..
يسألوني انا من وين .. وليش لابسه اسود
تراني كنت لابسه عباه *-^
اول ماعرفو اني عربية
والله وحده تصيح وتقولي مكه مكه ..
وتنادي ربيعاتها .. وكلهم يركضون صوبي
ويصيحون .. ويرمسون وانا مب عارفه شالسالفه
لين يات بنيه صغيره ترمس انجليزي
تقولي هم يبكون من الفرحه .. لنهم يشوفون شي
من ريحة مكه ..
وحاولت بكل الطرق اقنعهم اني مب من مكه ..
لكن شو يفهمهم هههه
وحتى يلسنا انا وريلي .. وكله يعزمون علينا ..
وفجأه تمطر بقووووه .. والكل يأشر ويرحب فينا
يبانا ندش .. يحليلهم والله ..

شوفو هالبنيه شو تسوي

ولقطنا قوس قزح من بين الجبال

تمينا في هالجبل لين العصر
وعقب لقينا الريال السعودي الي دلنا ع الجبل هو وعايلته
ورحنا مع بعض صوب الثلج ..

طبعا انا مارمت لا اصور ولا العب بالثلج
لنه عايلة السعوديين كلهم شباب
ماشي غير امهم ومره عوووده ماتشجع .. خخخخ
بس ريلي صور بالفيديو لين شبع ..

.
.

وعقب نزلنا تحت نحن وياهم .. ورحنا مطعم نهري بآخر اوزنجول
بس انا ماكليت شي كله يقدمون سمك نهري
وانا ما احب السمك

هني تغدينا جنب هالنهر

.
.

تمينا كم يوم في اوزنجول .. وللاسف رحنا منها
لنه حجز الفندق في آيدر ينتظرنا ..

وهذا النهر بعد يرافقنا طول الطريق

.
.

وصلنا ايدر وكان العصر ..
وسكنا في بنسيون ليوا ..
( كان احسن بنسيون فالمنطقه ومطل ع الشلال الكبير ،
بس تراه عادي وبدون مكيفات .. ماشاء الله البراد طبيعي )

ايدر حلوة وباااااااارده مووووت .. ب
س ماعجبوني اهلها .. اصلا معظم الي فيها سياح أنجليز
ماشي عرب الا شوي .. الظاهر مايعرفون الا يلوا و اوزنجول *-^

هذي صورة من دريشة الحجره

وهني نزلنا ويلست اصور فالقرية

هذا مدخل القريه

هني قربت من الشلال بس بدت تمطر

المهمـ قعدنا يومين بس في ايدر ..
هي حلوة .. بس انا مرضت اكثر وريلي فديته انكسرت ايده ..
وعلى طول قدمنا حجزنا على متشكا ..

.
.

رحنا من ايدر لمتشكا بتكسي .. تقريبا ساعه ونص بينهم ..
وصلنا متشكا .. وكنا حاجزين فندق سوميلا ( يعتبر احسن فندق في متشكا وانصح الكل به )
وصلناها بالليل .. ونزلنا نتمشى فالشارع وتعشينا ,, وتلاقينا مع كم عايلة اماراتيه ..
ونحن نتمشى سمعنا زيطه وزمبليطه .. قلنا شالسالفه ..
يوم نقرب الا نلاقيه عرس .. لوووول عرس بالشارع ..

حضرنا العرس ويلسنا ساعتين .. والعروس كانت حلوة بس مخترشة
كله ترقص وتدبك .. وتسولف مع الناس ههههه ..
عندي صور للعرس بس مو واضحه لنه كان بالليل وتصوير موبايل ..

.
.

المهمـ ردينا الفندق ورقدنا لنه كان ورانا قلعة سوميلا ..
الي كانت قصتها قصه ..

.
.

نشينا الصبح واتفقنا مع سواق يوصلنا ..
مرينا بكوشندرا .. هي منطقة وايد حلوة وخضره ..
وعقب وصلنا سوميلا ..
اول ما وصلنا بدت تمطر بس ع خفيف ..
وكانت القلعه موجوده بقمة الجبل ..
وطبعا لازم نركبه عشان نوصلها ..
بدينا نركب الجبل .. وطبعا لازم نركبه بريولنا خخخ ..
ااااااااااه ماريد اذكر هاليوم الاسود هههه
والله استغرق ركوبنا الجبل 3 ساعات ..
تخيلو !!!
وكانو اجانب ويانا ..
عاد تعرفون كيف الاجانب رياضيين
والله شي منهم ركب ونزل ونحن بعدنا في نص الطريق خخخخ
ترا انا وبوحميد كل شوي نبركن .. و نفرش وناكل ..
اقولكم كان طاش ماطاش والله هههه

.
.

هذي صورة القلعه ( الله يغربلها من قلعه )

يقولكم الله يسلمكم هالقلعه تضم بيوت بنوها رهبان مسيح
شاردين من اليهود ..
وبنوها في صخور الجبل يعني شرات الكهوف بس الي تشوفونه مرمم

هني وصلنا .. والله بهالمناسبه وقفنا انا وريلي ويلسنا ساعه راحه هههه ( ابووووك يالكسل )

.
.

وهني يوم دخلنا وليتنا مادخلنا ..
كله نقوش مسيحية ورسم المسيح اونه .. وسوالف غريبه عجيبه ..
انا صورت بيوتهم بس

لاحظوا السحب … ماشاء الله بانينها بقمة الجبل غربلهم الله

المهم ماعجبنا الوضع وياحسافه ال 3 ساعات الي قضيناها في طريق هالقلعه
ماغير تكسرت ريولنا ..
والجو كان بارد مووووووت وأمرضنا

.
.

نزلنا تحت الجبل وتغدينا بجنب النهر وصورت هالصور

استانست وايد هني لني لقيت عايلات اماراتيه ويلسنا احنا والبنات سوالف
كانو من عيمان وراس الخيمه ..

.
.

وأنهي تقريري بهالصورة ..

.
.

قعدنا يومين في متشكا ,, وردينا سافرنا اسطنبول ..
وقعدنا فيها اسبوع زياده …
بس معظم هالاسبوع فالفندق .. لني مرضت انا وريلي
بس من اللعب بالمطر والثلج في الشمال لوووول ..

.
.

أي شي تبون تسألونه عن تركيا انا حاضره …

.
.

وبقولكم استنتاجاتي عنها ..

* اهل اسطانبول مايعجبوني .. لنهم مختلطين .. يعني مب اتراك اصل ..
وجوها مب لين هناك .. وغير انه معاملتهم مب شي ..
* تركيا غاليه وايد فالصيف .. يعني تذكرتها رخيصه ..وفنادقها اسعارها حلوة
بس لاتتوقعون فنادق ال 5 نجوم شرات فنادقنا الخمس نجوم هني ..
الغالي فيها المعيشة يعني بتلاقون البيبسي ب 7 درهم .. غرشة الماي ب 10 درهم ..
سندويشة الشاورما ب 25 درهم ! …. الخ
* الي بيسافر لازم يشل وياه معجم .. او يدور مواقع فيها كلمات تركيه ..
لنه معظمهم مايرمسون الا تركي .. يعني لا انجليزي ولاعربي .
* اهل الريف وايد طيبين وملتزمين دينيا .. يعني بتلاقون حتى معظم حريمهم متحجبات
* لازم الواحد مايعتمد على التكسي هناك .. لنه وااايد غالي ,, مره وصلنا تكسي
مسافه 2 كيلو .. خذا منا .. 205 درهم ! ، عندهم المترو والترام , الباصات الصغيره
وشي دولمس تكسي .. يكون ارخص من التكسي العادي.
.