الوسم: الجميله

كيف الحال سيدات / آنسات منتدى سيدات الإمارات الجميلات . .
عساكم بخير وعافيه . . أتمنى أنكم كلكم بسعاده . .

</ خلصينا شو اللي تبين تقولينه ؟!

بصراحتين أنا مطوله هني . . هيه نعم مطوله وايد . . واللي تحس عمرها فاضيه
و ماعندها شيء تطبخه واللي عيالها رقدوا و اللي فاضيه وملانه تدخل . .
واللي مخلصه بروجكتات الجامعه تتفضل . .

و كل وحده تحاول قد ماتقدر تندمج معاي و تمشي خطوه خطوه و تقرا كل
حرف بكتبه هني . . ! لأنها راح تكون أثمن فتره بحياتي . . و هالمره راح تكون آخر مره . .

و أأكد لج يا نفسي : " إنها مش مثل كل مره، فإستعدي " . .

يمكن عنوان الموضوع يكون غريب عليكم . . بس شوفوا . . تفرع القسم خخ . .
علاج السمنة و النحافة آونه . . يلعن أبو السمنه . . عاد النحافة خلوها ع صوب . .

مالي دخل فيها . . نرجع لموضوعنا . . السمنه . .
" ترا أنا سمينه " لا لا ماحب ولا حبيت الوصف . .

خلنا نعيدها بصيغة آخرى . .
" ترا أنا متينه " . . لا لا مايفيد . . هالكلمه مادانيها بعد . .

" تراااا آنا دبه " . . هالوصف أحس بـه مقبول . . كلمه دبه
يعني عالاقل تكون أخف </ رأي شخصي . . لحظة خلني أضحك شويات ههههه . .

</ قسماً بالله أني متأكده أنكم تتحروني مينونه . . عادي ماعلى المجنون حرج
مادري شدخل المثل فـ سالفتنا. .

يمكن تستغربون من إسلوبي شويات . . بس هاذي أنا .. وايد أحب أرمس
وأطقطق عالكيبورد . . وللحين مادخلت بالموضوع الرئيسي اللي بيتكلم عنه موضوعي . .

أو بـ الاحرى هي يوميـات : نبدة بسيطه عن هداوي الجميله . . !

بين قوسين ( أنا دبـــه ) / هذا أول شيء بقوله ومافيها إحراج أبداً لأني آخر مره بقولها
سمعتي يا نفسي العزيزه ؟ : هاذي آخر مره . . . . . . عمري 21 . . إسمي هداوي الجميله . .

فعلاً أنا جميله . . روحي جميله . . قلبي جميل . . كل شيء فيني جميل . . إلا جسمي قبيح . .
فـ قررت كـ التالي . . : من اليوم . . مش من اليوم . . من هالساعه هاذي : انا قررت أغير حياتي . .

يـأ آنسـات يـا سيدات . . مليت من حياتي . . مع إني ما أكل وايد . . </ أكيد ماتاكلين وايد . .
لان أكلج دسم حتى لو شويات . . . بعد لج ويه ترمسين ؟!!

بما إني قررت أغير حيـاتي . . حبيت أوثقها بكل يوم . . عسب ما أغلط . . وما أغير الاتجاه . .
والموجه تتم على نفس التردد . . أمشي سيده . . لا باستا بالدس و لا نص بيبسي ولا كولا . .

ولا حتى كاكاو أو جبس . . </ مع إني ما أكل هالسوالف وايد . .

أنا مابسمي اللي أسويه رجيم / ولا بسميه من هالمسميات اللي مالها داعي . .
و اللي تقهر النفس و تخليج تعوفين كل شيء جدامج . . و تكسرين بخاطر نفسج . .
وتمنعين نفسج من اللي تبينه !

حرام صح ؟ . . . هيه أكيد حرام . . عيل أتم حاطه بخاطري الأكله الفلانيه ؟
لا طبعاً ماقدر . . </ بالعدال حبيبتي المنتدى مابيطير . . لاحقه لاحقه فديت خشمج . .

لا جد جد . . يعني كم مره بيلس بقول . . من اليوم بسوي رجيم . . و ما أكمل إسبوع
واحد و أنا هاده نفسي بالصحون ؟ إلى متى يا نفسي . . إلى متى هذا التعذيب ؟

أنا أقول بوقف كل شيء . . / تدرون ليش تحمست وقررت أغير هالموجه البايخه ؟
لاني من فترة وأنا راده من السفر مرضت . . وما كنت أكل وايد و نزلت 5 كيلو في 3 أيام !

يعني ماتحمست الا يوم ياني المرض . . واللي ينزل بسرعه ؟ يرد دبل و بأسرع بعد . .
فـ قررت أني أخفف . . و أكل وجبة وحده بكل يوم . . و بعد ماخف عني المرض . .

قمت أحس باليوع . . يعني جد جد يوعانه بس أيود عمري . . وأقول للخدامه سويلي
عصير . . و أتم أشرب تااااااااااااااااااانج لين أشبع </ خووش والله تعترفين بعد . . ولا تا . .

هههه و لا أشرب لبن آب . . و كل شوي الحمام . .
و قلت هالوضع مايصرف بصراحه . . فـ قررت أني أشاركم أيامي و أفكاري . .
و براوي نفسي إني مب هينه . . و إني بنزل هالوزن و بداية السنه اليديده أنا بشكل يديد !

و كل ما بحس بتهاون عن الموضوع . . بيي هني و بطلع حرتي فالموضوع . .
و أكيد إنتوا مابتقصرون وياي . . بتشجعوني . . و بتوقفون ويايه ليـن ما أنزل هذا الوزن البايخ . .

راح يكون كل ويكند بمثابة الإمتحان . . نزلت بكافأ عمري . . مانزلت ماشيء مكافآت . .
وما أنسى بعد . . رمضان فرصة كبيرة لي . . بحاول قد ما أقدر أني أمسك عمري وما أخربط . .

نبذه عن الوضع :

الوزن الحالي : 123 كيلو بـ الضبط . .
الطول : 164 . .

الهدف الحالي : 99 كيلو . . / أبي احطم الميّه . .
الطموح : 65 كيلو لا أكثر . .

: