الوسم: الرساله

السلام عليكم ورحمة الله وبركاته
(( ربي لا تذرني فردا وانت خير الوارثين ))

مادري من وين ابدأ قصتي .. حاولت اكثر من مرة اكتبها بس كنت مترددة وخايفة من الردود الجارحة
احس اني مكسورة محد لي بهالبلاد غير الله سبحانه وتعالى لا ولد ولا سند اقدر استند عليه لو طحت
ببدأ قصتي واتمنى نصيحتكم بنات .. اتمنى اي وحده تنصحني شو اسوي . اكمل الي بديته؟؟ او اضيع في عالم المتاهة الي مادري وين بيوديني

تقدم لي اشخاص كثر كان الوالد يرفضهم لاسباب انا اقتنعت فيها لانه ادرى مني وكان ابوي شديد وااايد علينا وعصبي وما نقدر نناقشه بشي
لين يا الشخص الي مافيه سبب لرفضه وكان من اهل الامارات مطلق وقال لنا انه عنده 3 عيال صغار وعمره 46 سنة وطبعا الوالد ما حب انه يوقف على هالتفاصيل .. فسأل عنه وعن قبيلته واطمن انه مافي اي مشاكل بخصوص زواجه الثاني .. ووافقت لاني كنت خايفة من قطار الزواج يفوت
وصلت الامارات بعد اسبوعين من زواجي وكنت فرحانه من قلبي بهالحياة اليديدة .. مر اسبوعي الأول انصدمت لما شفت عياله يزورونه وكانوا مخلصين الثانوية وضحك وسوالف ويا ابوهم .. انا والله يا بنات ما علقت على الموضوع ابدا غير اني شفت العيال مستانسين وياه قلت الحمدلله اهم شي محد ممانع من عياله ولا حد زعلان .. بس تحسفت على نفسي انه خدعنا بهالشي بقوله انه عياله صغار
وتوالت الصدمات ورا بعض لما عرفت انه له 6 عيال الله يحفظهم له اصغر واحد فيهم عمره 17 سنه و منهم 3 متزوجين وعندهم عيال
صارحته واجهته ليش قصيت علينا وما قلت لنا انه عيالك بهالسن وش فيها لو قلت الحقيقة تدرون وش قالي .. ( انا قلت للحرمة الي خطبتج لي هالكلام واكيد قالت لكم )حلفت له انها ما قالت شي واكتشفت انها تبي فلووس وبس ..
يمكن بتقولون انه من ويهه يبيّن سنّه .. وبقولكم انه ابدا ما يبين عليه لانه من بداية حياته تزوج وعمره 17 سنة .. هذا غير انه مصغّر عمره بشهادة ميلاد غير حقيقية المهم قلت لنفسي قدّر الله وماشاء فعل خلاص يا بنت انتي فيها فيها بكرة ولا بعده بتييبين ياهل وتتونسين فيه.
مر على زواجي سنة واستغربت اني ما حملت بهالفترة واهو مو مهتم بهالموضوع .. سألته سؤال عادي ليش انا ما حملت لين الحين ؟؟ يا بنااات وكأنها قامت الدنيا وانقلب حاله وقال ( وش تبين بالعيال العيال هم ومشاكلهم وايدة من وهم صغار لين يكبرون ) قلت له ( انا ابي مشاكلهم ابي اعيشها ابي اكوووون أأأأأم ) قالي اكيد امج تغريج اكيد اهي الي توزّج بهالكلام
والله والشاهد الله اني ما كنت اكلم اهلي عن اي شي صار في حياتي لا عن عياله الي انصدمت فيهم ولا عن موضوع الحمل … كنت احس انه كافي الي فيهم وتكفيهم همومهم اروح انا بعد ازيد الهموم على راسهم لالالا عيشي حياتج يا بنت ولا تحسسين اهلج باللي فيج واذا اسألوج قوليلهم الحمدلله ما ناقصني شي وسعيدة.
اتصلت فيني وحدة كنت اعرفها قبل الزواج وكانت مصدومة لما سمعت بزواجي وقالت لي انتي من متى هنييه وليش ما خبرتوني بزواجج .. في البداية علبالي انها تعاتبني عادي .. لكن اتضح لي انها تعرف منهو زوجي وشو كان ماضيه .
قالت لي ترى الي يبدأ حياته بخدعة لا بد انها تنتهي قلت لها : شو السالفة وهنييه المصيبة الكبيرة
قالت لي انه زوجج شخص مزوااااج ومخادع هذا غير انه قااااااااطع الخلف تدرون شو يعني يعني ما ينجب ما يبي عياااال
قلت وش باقي ما عرفته ؟؟ ليكون الحرمة غلطانه ؟؟ ليكون تقصد احد ثاني ؟؟ ليكون؟؟ ليكون؟؟
دارت الدنيا براسي لما اكدت لي كلامها .. سكرت التلفووون وسرت اصلي ركعتين لله واستخرت ربي ودعيت انه يوقف معاي مالي احد غيره
خفت افاتحه بموضوع الاتصال .. لاني كنت خايفة من ردة فعله كيف راح تكون سكت لين ما اكتشفت اوراق لقيتها مطروحة بدرج ملابسه رغم اني اكثر من 100 مرة كنت ارتب درجه ما كنت اشوفهم .. مادري حسيت انه اهو الي حطهم لجل أشوفهم قريت كل شي في الورق وفعلا كان مسوي عملية برا البلاد قبل 17 سنه يعني بعد ما ياب اخر طفل من حرمته الأولى راح وقطع الخلف لسبب مشاكل بينه وبينها
طلبت منه اننا نطلع برا البيت نتمشى وكنت قاصده افاتحه بالموضوع لانه جو البيت ما يساعد .. قلت له اني لقيت اوراق خاصة فيه بالصدفة وابيك تفسر لي ليش كذبت علينا ؟؟ (قال انا ما كذبت عليكم وانتي كنتي تعرفين هالشي ما اعتقد قاعدة معاي كل هالفترة وما تدرين اكيد في احد خبرج .. وصحيح انا سويت العملية ورديت فتحتها مرة ثانية بس قالوا لي انه كل شي بيد الله لانها عملية صعب الواحد يرد يفتحها مرة ثانية ومالك امل غير اطفال الانابيب)
محد بتتصور شو العذاب الي عانيته معاه والقهر الي عشته من اول شهر تزوجت فيه تحطمت كل امالي البسيطة انه يكون لي بيت وعايلة .. كسر فرحتي باني اكون أأأأأأأم
كسر فرررررحتي باني اكون أأأأأم

طلبت منه انه يفتح لي ملف في مستشفى توام وما فتحه الا بطلعة الروح وتنفست الصعداء مع اول تجربة لي لكن قدر الله وماشاء فعل مالي نصيب واستمريت لين السبع محاولات لكن مافي امل ..
بتقولون ليش ما تطلقتي من اول ما عرفتي عنه هذا كله .. صعب والله صعب الطلاق والرجوع للأهل وانتي مكسورة .. ترى مجتمعنا مجتمع صعب أفكاره غير منفتحه لا مجال للمطلقة بانها تبدي رايها بشي يعني اذا تطلقت قعدي بالبيت حطي ايدج على خدج لاطلعة ولا دخلة لا دراسة ولا شغل محد يرحم حد .. هذا حظج جربتيه ولا تنسين انج وصلتي لسن صعب الواحد يترك بنت بنوت صغيرة وييلج انتي لا وبعد مطلقة
حقدت عليه وعلى نفسي رغم كل الاحترام والود الي ابينه له لكن في دااااخلي الانتقااااام منه قتلني وقتل امومتي في داخلي كملت حياتي معاه لانه طريقي مسدود بكلا الحالتين بالجلوس معاه او بالطلاق واخترت اكمل معاه لين ما اقدر استقل بحياتي
مر على زواجي 4 سنوات ونص ونا صابرة معاه وقلت نصيبي والحمدلله على كل حال يمكن ربي رايد لي هالشي واكيد راح يعوضني عنه ان شاءالله
بنات ما اكلمكم من فراغ لا والله كل الكلام من القهر الي فيني لا تعاتبوني لاني استمريت معاه ظروفي وظروف اهلي خلتني استمر .. انا والله لو اني مقتنعة انه الرجوع لبيت اهلي راح يخفف عذابي كنت رديت من اول شهر لكن انا عارفة والله العالم اني راح اكون منبوذة ومالي أي كلمة

بعد الاربع سنوات تزوّج علي .. هيه تزوّج لا تستغربون لانه كان دايما يلحن لي هالكلام وما كنت اصدقه لاني كنت اقول لنفسي اهو لا يمكن يسويها يحمد ربه اني استمريت معاه بدون ما اسبب له مشاكل بخصوص الخلفة فمب معقولة يروح يأذي بنت ثانية
المهم تزوّج وكان الخبر كالصاعقة على راسي والي جربت اكيد حاسة باحساسي .. ويابها عندي في نفس البيت .. لاحظت عليها انها صغيرة وايد ما تعرف شي من ناحية اللبس والدلع والبخور وقالها تعلمي من شريكتج كل شي ( اهي الي قالت لي بلسانها هالكلام ) فبدا وياها شغل النسخ واللصق اقصد اذا شافتني لابسة تلبس اذا شافتني متبخرة تركض وتتبخر انا انفجرت ما قدرت على هالحياة فقررت لا البس قدامها ولا اسوي شي لاني ملييييييت من هالحركات .. حاولت معاه انه يفصلني عنها ما رضا قلت حسبي الله ونعم الوكيل ( صبر جميل والله المستعان )
وهذا انا يا بنات مقدر اكمل لكم اكثر عن كذا تعبت واكيد تعبتوا
صار لي الحين 7 سنوات متزوجة من ضغط نفسي لضيق صدري والهم على راسي .. اذا تطلقت وين اروح اهلي بعيد عني اتمنى اييبهم عندي وابدي حياة يديدة بروحي واكسب دعا والديني
لكن اخاف الدنيا تنقلب ضدي مرة ثانية والقى نفسي تايهة لا شغل لا بيت يسترني لا لقمة تسدني

بناااااااااااات ضاقت الدنيا فيني ريلي هالايام مقلوب علي بشكل مو طبيعي يطلب مني شغلات مقدر البيها ويشهد الله اني صادقة بكلامي واني مو مقصرة عليه بشي ابداا بشهادة اهله وحريم اهله الي يعرفوني بس في اشياء زادت عن حدها ومقدر اقولها لهم .. اشياء ما تمت للاسلام بصلة .. كان يطلبها مني قبل زواجه من الثانية وكنت ارفضها وما زلت .. والحين وبالذااااات اليوم قالي كلمة انصدمت منها ( تحرمين علي ليوم القيااااااامة إلاّ اذا عطيتيني الشي الي بغيته منج ) ما رديت عليه تلحفت بالفراش ونمت بعدين قالي ( والله لأخلي الثانية اسعد انسانه لانها اهي الي بتريحني وانتي موتي قهر)
قلت له ليش تسوي معاي هالشكل وش سويت لك .. قالي لانج انانية وبديتي تتكبرين عليا وانا والله ما تغير فيني شي غير وصول جوازي اليديد اليوم وهذا الي قلب حاله .. نمت اليوم العصر وقمت اشوفهم يتسلّون ويا بعض بالورق وقلت خلج طبيعية وشاركيهم .. اول ما قعدت قام ورمى الورق وناداها للغرفة والله ميتة قهر الغصة خانقتني ومقدر انزل دموعي لجل محد يلاحظ علي مابيهم يقولون مقهورة مالي غير ربي يفرج علي همي مسكت القرآن وتميت اقرا عسا ربي يهديه ويلهمني الصبر على الي اشوفه قدامي
وما قررت اكتب قصتي الا و هاجس الطلاق يحوم في راسي .. بس قلت خلني اشوف هل انا على صواب او غلط
لو قلتولي اصبر بصبر عادي وبتحمّل ولو قلتوا لج الحق في الطلاق فهذي موضوعها طويل لاني مالي احد هنيه مادري وين ابدا وين اروح منو بيقبل يوظف وحده عمرها بالثلاثينات ما عندها غير شهادة ثانوية اتمنى الي بيدها الحل تسحبني من الي انا فيه واتمنى دعاكم لي بالصبر والفرج القريب
(( ربي لا تذرني فردا وانت خير الوارثين ))
********************