أشحـــــــالكم خواتي حبيت أطرح هذا الموضوع لأهميته.. أبنائنا فلذات أكبادنا
هل ضرب الطفل في صغره تكون له علامه لا ينساها في كبره … ممكن كل وحده تقول كيف تتعامل مع أطفالها اذا كانت منزعجه منهم … ترى والله الندم بعد ذلك لن ينفع .. أبغي من هذا الموضوع كل وحده تعطينا أفكار اذا كانت تعبانه من أمور الحياه كيف تتعامل مع أطفالها اذا حصل شي مزعج منهم وكيف نتفادى الضرب معاهم بشي ثاني … عن نفسي اذا عصبت منهم أروح أي غرفه ثانيه عشان أهدأ عشان أتمالك أعصابي ولا أضربهم … أتريا ردودكم يا أخواتي .. ترى الموضوووووووع جدا مهم..
وان شاء الله نستفيد من تصرفات وخبرات الامهات ..
انا دوم احاتي هالشي ,, اقول اخاف يوم اضرب بنتي تتذكر هالشي بعدين وتكرهني !!
ودوم اخاف نفسيتها تتأثر ,, بس معقوله ما في عقاب !!
انا عني ,, ساعات اوصل حدي احاول اتماسك استغفر واقول خل تسوي اللي بتسويه بس بس ما اقدر اضربها ,, وعقب اتندم وايلس اصيح .. ساعات اسوي مناحه ف الليل اقول ليش ضربيتها .. بس لازم ع الاقل تخاف مني ,, فيه عقاب وفيه ثواب .. وانا امها لازم احيانا اقسى عليها علشان تتعلم مب كل شي ع هواها ..
واحس طبيعة الواحد تتحكم بهالشي ,, يعني مثلا انا نظاميه شوي ودقيقه ويوم احس بنتي تكسر هالنظام أتأثر واطفر واعصب واضرب << تفلسفت جني
الله يقدرنا بس ونربيهم التربيه الصالحه ..
يالله يا امهات فيدونا .. وطمنوني .. بنتي بتكرهني لأني اضربها ؟؟
الله يهديهم يارب
أنا بطبيعتي أكون بارده مع بنتي حتى اذا سوت شي غلط بس أفتن عليها, لكن أحيانا أطلع من طوري فأضربها على ايدها أو عالبامبرز, لكن فيه مره قبل لأييب البشكاره, بعد ما نظفت البيت للمره الألف دخلت أسوي العشا قبل ليرد ريلي من الدوام وهي كانت ادش علي المطبخ وتطلع لأني كنت حاطتلها اسبيس تون وممخليه باب المطبخ مفتوح عشان أسمعها
المهم بعد ما خلصت وطلعت الصاله,,صدمه,, امفرفره السيديات تحت ومجلعه الوايرات المثبته فاليدار ساحبه الزوالي هالصغار المدورات وغيره يعني كان المكان زباله وابوها جريب بيوصل وأنا مب مسبحه ولا سبحتها هي بعد>>>>> على طول فولة صنفرة خوال غير بعد, فبدون وعي مني ضربتها على كتفها وطاحت تحت لأنها ضعيفونه فديتها وقمت أضربها زياده وهي اتصيح, بعدها بشوي قلت أنا شو أسوي شو بلاني والله قمت أصيح وأحضنها هي سكتت وأنا مواصله صياح وتميت أبوسها وأنا أصيح, والله انه لين اليوم يوم أتذكر السالفه أتم أصيح رغم انها صارت من أكثر من 10 شهور, أبا أنسى مب رايمه وأب أقول لحد عشان يعطيني حل مستحيه لأن أكيد بيقولون في أم اتسوي جي فضناها
والله العظي اني أحبها حب ما تتخيلونه حتى أبوها ما حبه هالكثر
فودي بطريقه اني أخفف أو أبرد عصبيتي قبل لأوصل لها الحد وأندم