.
اليوم جبتلكن موضوع و اترك الباقي عليكن أوكي
مين فينا ما تحب تكون حلوة المعشر؟
مين فينا اللي ما تتمنى تملك قلب
زوجها بدون زعل وبكاء وصراخ واتهامات ووو؟
مين فينا اللي تحس بحب زوجها بدون
لا تسحبه سحب حتى يبين هالحب وهو مغصوب!؟
مين فينا تحب تعيش يومها مرتاحه بدون لا تحس انها تدور النكد دواره!؟
مين فينا تبغى … وتبغى ووو
لكن مين فينا تنوي وتقرر وتنفذ؟
بدون لا تقول اي والله صادقه
وهي مكانك سر!
وكأنه الشخص ينفخ في قربه مثقوبه!
وش فائدة تجارب الناس ومشاكلهم
اذا ما اعتبرنا منها واخذناها كدروس بحياتنا ؟؟
بدل لا نقول يا حرام مسكينة فلانه وووو ليش ما نقول وش اللي سوته فلانة اللي خلاها توصل لهالمرحله في علاقتها مع زوجها؟
امكن احيانا مو شرط ان يكون التقصير منها اتجاه زوجها لاااا
الأغلب يكون التقصير اتجاه ربها!
لأن حياتنا ومصائبنا ما تجي من فراغ!
ولأنها اسباب لنا حتى نهتدي ونعي اننا اخطأنا او قصرنا في عبادتنا او كثرت معاصينا .. اسباب كثيرة ولكن الشيطان ما يعطي الأنسان فرصه يلاحظ هالشئ!
ويلهيه بشئ اهو مو سبب المشكلة الرئيسية
انما هي السبب الثانوي اللي ادت لها الأسباب الأولى!
قد يكون كلامي مو مفهوم ولكن اتمنى اني اقدر اوصل لكم القصد من هالمقال .. وانه ينور قلب وبال اي وحده قد تكون اغفلت هالجانب واللي كلنا قد نقع فيه بين الحين والآخر ..
وبعد هالمقدمة, حابه اعطيكم نقطة ثانية مهمه:
(( التسااااااااااااااهل))
وليس الأهمال واللا مبالاة
لا في فرق.
التساهل:
انك تهونين المشاكل قدر الأمكان وتعرفين انك مو الوحيده اللي قد تعانين من ازمة او ظرف وان لكل مشكلة حل … وان لكل ضيق فرج .. وان لكل حزن سعادة .. وانك لو تعبتي بهالدنيا وما حصلتي على اللي تمنيتيه فتأكدي كل التأكيد انك راح تحصلين مو بس شئ تمنيتيه وانما كل اللي تتمنينه .. اذا مو بالدنيا بالآخره .. ليه نصب كل همنا بهالدنيا ومصيرنا فيها للفناء الا وجه رب العالمين!؟
يعني لو فكرنا فيها هل تسوى علينا اننا نموت انفسنا بالحياة بالحزن والأكتئاب والبكاء … وكأننا مخلدين بهالدنيا وانه هذا حالنا للأبد!؟
لا طبعاً … ومستحيل!
لأن دوام الحال من المحال .. وزي ان السعاده ما تدوم ..
ايضا ً الحزن ما يدوم …
بمعنى اصح … هونوها وتهون!
تخيلوا معي هالموقف:
زوجة .. تعاني من اهمال زوجها لها.. يوميا ً بكاااااء يوميا صراخ وعتاااااااب يوميا اتهامات . وانت ما تهتم فيني وانت ما تحس فيني وانت وانت وانت .. الخ
طيب أسألكم بالله هل بعد هالأسلوب اهتم فيها؟؟ اكيد لا!
وامكن زاد اهماله بعد!
يعني بالله وش استفادة اهي؟ غير انها حرقت اعصابها ودمها على نتائج (ولا شئ)!
طيب ما نقول انها ما تعبر عن مشاعرها وتعبها واسآاها ولكن
بهدوء اكثر .. بسلاسة اكثر ..
وقبل لا تنتظر منه انه يهتم لها اهي تهتم في نفسها بالأول!
كيف؟؟
نفسها واعصابها ما اهتمت فيها تبغى اهو يهتم؟
تبدي اهي تهتم بنفسيتها وتعالجها وتسعدها حتى تقدر تسعد اللي حولها .. ما تتخيلون كيف ان الشخص اللي يسعد نفسه كيف توصل سعادته للآخرين اللي حوله .. لا شعوريا ً … واللي يغير تعامل الغير معه …… من زوج وابناء وام وعائلة واصدقاء والكل …
تهتم بإشياء تسعدها زي هواياتها تطور مواهبها
تكتشف نفسها … تكتشف مواهب ابنائها … زوجها
تكتسب معرفة في مجال تظن انه صعب عليها
تتعلم اشياء … بإختصار شديد (( تسوي تغيير بيومها!))
مو اليوم زي امس زي بكرة!
يا بنات انا ما اقول هالكلام وكأنه انا كاملة واني اطبق كل هالأمور ولكن انا حبيت اذكركم واذكر نفسي قبلكم..
لأننا لو نأخذ من يومنا ساعة تأمل! بنكتشف اشياء كثييرة ما تسوى اننا نزعل عليها! ونجمعها بقلوبنا ونضيق صدورنا عليها!
ملاحظة ثانية:
– لا تخلين اي شئ بهالكون غير ربك
اكبر همك!
كيف يعني؟
يعني صح اهتمي بزوجك ..بنفسك .. بإبناءك .. بإصدقائك ..
بإحبابك .. ولكن لا تصبين اهتمامك كله على شئ واحد!
لأنك راح تتعبين فيه والسبب انك حبيتي شئ او قدستي تفكيرك كله لشخص معين ونسيتي وغفلتي انك ما اعطيتي زي هالأهتمام بعبادتك وانا اقول هالشي لنفسي ولكم .. ومو للكل .. لأن فيه البعض ماشاء الله عقول نيره وواعيه وفاهمه الدنيا .. وما اقول الا الله يزيدهم من فضله ويرزقنا بالمثل ..
وفيه مثال آخر:
كيف كان اهتمامك بأول ايام تعارفك مع زوجك ايام الملكة؟
مو معقولة حبيتيه وعشقتيه من اول لقاء!
فيه ارتياح نفسي .. اعجاب .. الخ
ولكن مشاعرك ما كانت فيضانات
صح؟ كانت عباره عن نهر جاري لطيف … ولهالسبب كان زوجك بذيك الفترة يزيد فضولة اكثر واكثر ويتعلق فيك .. وباسلوبك
لأن هذي طبيعتك الحلوة ..
لأن هاي شخصيتك الحقيقيه بعيد عن
اي مؤثرات آخرى …
ولكن بعد العشق والحب والهيام .. ينقلب الحال 180 … ويزيد الأهتمام والسؤال والتعلق الى درجة الأختناق!
واللي احياانا يضاااايقك انتي اكثر قبل لا يضايقه!!!!
ولكن تحسين هالشي خارج عن ارداتك صح؟
طيب اللحين خلونا نعالج هالمشاعر البركانية اللي ما ودنا تحرق المشاعر الناعمه والرقيقة … ونعرف وشلون نروضها …
صحيح الحب حلو.. صحيح العشق أحلى وأحلى (الحلال)
ولكن لما يكون بمقياس المعقول والمحبب …
لأن المثل يقول:
ومن الحب ما قتل!
قد توصل الوحده من حبها لزوجها
انها تفرض عليه قواعد وحكر وسند ملكية وووووو لها فقط بكل مجال وكل جانب!
واللي يخلق للزوج سجن من ذهب!
صحيح هالسجن غاااالي لأنه من ذهب ولكنه في النهاية سجن!
سواءا كان من ذهب او حديد!
وضحت الرؤية؟
جانب ثاني:
الزوجة اللي تحمل على اكتافها عبئ كبييييييير من المسؤوليات ..
اقول لها الحقي نفسك قبل لا توصلين
مرحله تهملين فيها كل مسؤلياتك .!!
كييييف؟
فيه كثير يآخذ الحياة بقوة وبمثالية وانه لازم يكون كذا وانه لازم يكون افضل بكل امور الحياة اليومية … وصح التفكير الإيجابي حلو ولكن لا تحمل نفسها
اكبر من طاقتها ..
لأن لكل إنسان طاقة .. ولكل شخص طاقة خاصه ..
وفيه اللي طاقته قوية وفيه اللي طاقته ضعيفه ..
ولكن الكل يحتاج لشئ واحد؟!!!!
اعادة تعبئة الطاقة!!
وطاقتنا هي اننا نعطي انفسنا
اجازة ساعات او لحظات او يوم .. من المسؤولية ونسترخي فيها
ونهدي بالنا من الركض اليومي …
واللي قد يكون بالليل لأنه الوقت الوحيد المشترك عند الكل بإنه فترة هدوء واستراحه …
اعرفي كيف تستغلين هاللحظات من الليل …
وخليها اجازة ترجعين فيها لنفسك … تصفين قلبك … تريحين بالك وتفكيرك …
يكفيك ساعه فقط باليوم قبل النوم ..
تستخرين فيها انها تعبئ لك الطاقة من أول وجديد ..
ويكفيك 4 ساعات نوم بكل استرخاء من 10 ساعات قلق وتفكير وتقلب!
وبكذا الكل يعرف ان بزيادة الطاقة تزداد الأنتاجية ..
واللي هي الصبر!!!!
انشاء الله الموضوع يعجبكن
و بانتظار مشركاتكن بالموضوع
بصراحه كلامك ينقط عسل
وشكرا هذا هو الكلام الراكد مب دلع
دمت بود حبيبتي مريم الزعابي
جزاج الله خير
جزاج الله خير اختي الغالية
هذا هو الجلسرين
المشاركة الأصلية كتبت بواسطة دخوون 
