السلام عليكم ورحمة الله وبركاته
هنا مشكله قد بعثتها احدى الاخوات راجية من الله العلي القدير ومن ثم منكن الحل الامثل لكي تتخطي
هذه المشكله ويمشي بها المركب الى بر الامان…
وتذكري ياغاليه…
ان مهما كانت المشكله يجب ان نراعي الله في الرد ونبتعد قدر الامكان عن التجريح والاهانه
فلولا عدم حاجة اختنا لحل لهذه المشكله لما كلفت نفسها ووضعت رسالتها…
راجيه منكن يا احبه..
ان تكون الردود بعقلانيه اكثر وحلول انسب
دون الخروج عن اللب الحقيقي للمشكله…
بارك الله فيكن ونفع بكن
تقول صاحبة الرساله
اختيه حبيت اكتب مشكلتي يمكن فضفضه او طلبا للمساعده من الخوات للتخلص من هالاحساس اللي يراودني ..
قصتي بدت اني في بدايه دخولي للكليه (طبعا في الاساسي) كنت انا و البنات اللي شراتي انحس بالملل .. كلكم اتعرفون ان اول سنه كليه كلها لعب في لعب .. و من الفراغ اللي كنا فيه قمنا نسجل في كذا منتدى .. و من بين المنتديات اللي سجلت فيها منتدى ( … ) .. شدني المنتدى بالوانه و مواضيعه .. سجلت فيه بنك دومي استخدمه ف المنتديات .. شدني ف المنتدى عضو برمز له بـ ( د) .. (د) هذا كان انسان مثقف و مواضيعه وايد حلوه و مش منقوله .. و كل مايحط موضوع للنقاش كنت احدر واتناقش فيه لاني من النوع اللي احب اتناقش و ابين ثقافتي عن شي معين .. يوم ورا يوم قمت احدر المنتدى و اجيك اذا هو متواجد ولا .. لاحظت انه من عقب الساعه 4 ليين 7 ونص مايتواجد .. وخلاف يحدر .. ياني فضول بس طنشت ..
المهم عقب فتره انقطع بالمره عن المنتدى .. وانا ماسالت بس استغربت ليش قطع و ماعطيت الموضوع اي اهميه .. بس واحد من ربعه حط موضوع وقال ان (د) بيسووله عمليه ف ريوله عقب كمن اسبوع رجع وانا طرشتله رساله اتحمدله بالسلامه>> ربي الشاهد اني كنت مراهقه مافتهم و الفراغ سبب رئيسي .
عقب ماطرشتله الرساله قالي ماجد حد استهم عليه شراتج .. و غمضني يوم قال جذه .. مع الوقت بس كانت بينا رسائل اونها اخويه عن طريق المنتدى .. و شحالج ؟ وشو الدراسه ؟ وكذا
لين ماتجرأ وطلب ايميلي .. رفضت ف البدايه بس الشيطان قالي ماعليه يوم واحد رمسيه وخلاف عطيه بلوك .. رمسته اول مره .. عادي سوالف ماتعدت السؤال عن الدراسه والاحوال .. عقب قطعته بسبب ضروف
خلاف حدرت و كلمني و حسيت انه مشتاقلي .. بس بعد كنت حاطه ف بالي انه يلعب عليه ..بس مدري ليش استمريت ..
قالي فلانه عطيني رقمج .. انا زعلت منه و قلت ماتمنيت اني اوصل لهالحاله وانا كنت ابغض البنات اللي يرمسن شباب سواء ع المسن او ع الفون ..
قالي انا مب شرات شباب هالايام
قلتله كل حد يقول هالرمسه
قالي انا ريال ولي سمعه اخاف عليها شرات ماتخافين ع سمعتج
قلتله شو يضمني
قالي انا فلان الفلاني .. لاعب ف الفريق الفلاني .
صدقته بس ماعطيته رقمي ..
قالي والله اني ماتواجد على المسن وايد لاني اروح النادي و الدوري بدا
انا بس فكره اني اكلم شاب واني اخون هلي اتخرعني ..
طرشلي الرقم على المسن وعلى الايميل بعد و قالي اترياج
حلف و قالي انا مابضرج بس ابغي اسمع صوتج و احسج قريبه مني ..
قالي اذا ضريتج اتعرفين اسميه و كل شي عني و اشتكي
تم وياي اون لاين لين ماخلاني ادقله .. دقيتله و انا متروعه.توالت المكالمات لين ماتعلقت فيه خواتيه .. والله كنت غبيه مافكرت بالعواقب والله
كنت في قمه التناقض .. ارمسه بالنهار و بالليل ضميري يصحى و ينبهني .. اصيح بدل الدموع دم خواتيه ..
بس ياليت لو اعتبر .. ارد اكلمه بالنهار ..
صارلي شرات الهوا اللي اتنفسه .. ماعدت افارقه .. قمت اعرف كل خطواته .. اتابع كل مبارياته .. استانس يوم اشوفه يلعب .. اخواني استغربو اني اتابع المباريات واانا كنت اكرهها اصلا ..
ايمع صوره من الجريده ومن الموقع الخاص بالنادي ..
صرنا انحب بعض وايد .. كنت احس بنتأنيب الضمير بس بعد ماتوب (والله اني ندمانه)..
في ليله من الليالي ماياني رقاد . . وانا اتخيل ان الله يسحب روحي وانا اكلمه او اكون وياه .. اتخيل ان هلي يكتشفون اني خنت الثقه اللي عطوني اياها .. اتخيل الناس اللي كانت تمدح اخلاقي اتذمها .. اتخيل ان خواتي اللي اصغر عني و انصحهن انهن يبتعدن عن ملذات الدنيا اطيح من عينهم عقب مايعرفون عني .. اتخيل اني واقفه جدام ربي و انا مذنبه .. كله كنت اقول انا في النار انا في نار جهنم
عقب نشيت و صليت مادري كمن ركعه بس تميت ادعي في كل سجود ان الله يستر عليه و يغفرلي و يرزقني بالزوج اللي ينسيني (د) .. تميت اقول يارب ياااااااااااارب طلبتك لاتردني خايبه .. رفعت ايدي لك لاتردها مذلوله .. استر عليه و خل ثقه اهلي بي تستمر .. و خلصني من (د) و ارزقني بالزوج اللي ينسيني اياه ..
ماقص عليكم خواتيه .. عقب فتره قصيره ياني بدل الواحد 4 يخطبوني .. قلت سبحان الله الله يحبني .. طبعا استخرت و قبلت بواحد الله يحفظه لي و ملجنا و عرسنا الحمدلله .. قبل ما ملج خبرت (د) اني انخطبت و بعرس وكل منا في طريج .. زعل و مرض و قالي كنت بخطبج .. قلتله ماظنتي اتفكر فيه .. لاني خنت هلي وماصلح زوجه لك .. صاح خواتي.. صاح و انا قلبي اتقطع .. بس دست على قلبي .. قالي لو كنت في البلاد كنت بييب هلي بس لاتروحين عني .. (للعلم هو كان في الخارج معسكر مع النادي) .. انا قلتله صدقني مانصلح لبعض .. كنت اقوله و دموعي تنزل و اصيح من الخاطر ..قلت الله بيقدرني و بنساه ..
ملجت و عرست و نسيته .. اقصد اتناساه .. بس يوم اشوف الملحق الرياضي مال الجريده طايح اقرا العنواين .. واشوف صوره بالغلط .. اصيح مادري ليش .. و يوم ريلي يتابع المباراه و اشوفه يلعب يتقطع قلبي و تدمع عيني .. احاول انساااه بس ماروم .. لدرجه اني ادعي اني اكرهه .. بس ماروم ..
هالايام خاصه ايي على بالي وايد .. قمت ادعي على عمري اني افقد الذاكره عسب انساه .. اتعوذ من ابليس يوم ايي على بالي ..
خواتي طلبتكن حلن مشكلتي .. ساعدوني انساه
قبل ماحد يرد عليه برد قاسي حبيت اقولكن اني ماتفاخر بعلاقتي السابقه معاه .. انا ندمانه اشد الندم اني مشيت في درب ابغضه
كنت اعصي الله و هو يراقبني
خواتي والله بس بديت في منتدى مختلط . رساله . مسنجر. اخر شي مكالمه .. و لقاء!
الشيطان يزين كل شي .. مايرتاح الا يعقنا في المعصيه
وهذا دليل خوفج من ربج ، وحرصج على ثقة أهلج …وإنت غلبتي الشيطان وساوسه ، والله وفقج لزوج صالح ..والحين الشيطان يبغي يخرب عليج ، ويزلج مرة ثانية ,,,الجئي لربج ، واخلصي لزوجج ، والملحق الرياضي مب لازم تقرينه والمباريات مب لازم تتطاعينها ، اشغلي نفسج بأشياء ثانية مفيدة .سكري كل مداخل الشيطان عليج ..والله بيحفظج ويسعدج ويعوض عليج بخلف صالح إن شاء الله " والسموحة عالإطالة"
كلامج دليل على توبتج
قال الرسول – صلى الله عليه وسلم-:
(( الندم تـــــــــــــوبة)) صحيح الجامع للألباني
والحمدلله…الله رزقج بريال طيب…
انتي ابتعدي عن المبريات ولا تشوفين شي منها
لان سبحان الله الشيطان شاطر…
بس انتي لازم تكونين قدها …
اذكري الله …مثل ما سويتي علشان تبتعدني عنه خليج على هالدرب ..
قال الله سبحانه وتعالى: (( قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ ))
مثل مب الله رزقج بريال طيب بعد الله بيرزقه بحرمه زينه..
ولو كنتوا لبعض جان الله وفقكم ويا بعض بس الحمدلله انتوا ما كنتوا مناسبين لبعض.
اذكري الله واطلبي منه العون…
وعلى شو تصيحين تصيحين على شي ممكن تتعذبين في جهنم بسببه
لا تصيحين واحمدي ربج انج الحين مرتاحه
وَالَّذِينَ إِذَا فَعَلُواْ فَاحِشَةً أَوْ ظَلَمُواْ أَنْفُسَهُمْ ذَكَرُواْ اللّهَ فَاسْتَغْفَرُواْ لِذُنُوبِهِمْ وَمَن يَغْفِرُ الذُّنُوبَ إِلاَّ اللّهُ وَلَمْ يُصِرُّواْ عَلَى مَا فَعَلُواْ وَهُمْ يَعْلَمُونَ) (135)
وان شاءالله العيال وشغل الدنيا بنسيج
على فكرة تراه الشيطان هو اللي يزينلج الذكرى ومايباج تنسينه
بس دوسي على قلبج
واتقربي من ريلج اكثر كل ماتذكرتي (د) على طول سيريله اتغزلي فيه يمكن يتروع ريلج يقول بلاها هذ
بس ماعليه استغلي كل لحظه بتذكرين (د) بإنج تتقربين لريلج
وان شاءالله تغلبين هالشيطان اللي يذكرج فيه وتتهنين مع ريلج ان شاءالله
لا تنسين كل ما فكرتي فيه إستغفري وصلي ركعتين وبتشوفين ما يسرج
لازم اتحطين في بالج انه لج حياة زوجيه والحمدالله زووجج حاطنج في عينه وصدقيني هذا الشيطان الي يحب يفرق بين كل الازواج مب شي ثاني وانتي من داخلج ما تحبينه لو تحبينه جان ما خليته بس مثل ما قلتلج الشيطان يزينلج انج بعدج اتحبينه وتفكرين فيه..
ترا لو يبا يخطبج جان من اول مكالمه يا يركض ولا تصدقينه انا اربيعتي ركضت وراا لاعب 6 سنين وكل يوم نسمع انه بيخطبها والحين افترقوا لا لوو شوو ما بيي كله جذب في جذب معروووف عن هاي العلاقات..
وبعد بذكرج باجر اذا صارت مشكله تافه بينج وين زووج بعد بتذكرينه حطي في بالج هذا الشيطان مافي غيره يبا يخليج تضعفين مره ثانيه بس انتي قوي ايمانج بربج وبتنسينه صدقيني..
دايما تذكري انج دعيتي ربج يستر عليج وربج ستر عليج لا تخونين ربج مجرد التفكير فالشخص الي كلمتيه..
والله يحفظج
المشاركة الأصلية كتبت بواسطة امـ فطومـ 
