الوسم: اليديد

دايما أكبر الأفعال تبدأ من أبسط الأمور .. و اليوم أباج تفتحين فكرج على نقاط يديده في حياتج
تمارسينها بدون ما أي شخص يشاركج فعلها .. تسوينها بينج و بين نفسج بدون ما يحس
أي انسان ..

ان شاء الله تعالى مع الوقت .. تفكيرج بيبدا يتغير و أفعالج بتتغير وياه .. بتلاحظين هالشي بإذن الله
إذا فعلا طبقتي الموضوع صح و من خاطرج .. أنا بعطيج كذا نقطه و إذا فعلا انتي اهتميتي
لين جدام بتجوفين المجال توسع أكثر و صرتي تعرفين و تلاقين فرص أكبر اطبقين فيها هالشي

لين ألحينه ما بينت شو هالشي اللي أباج تسوينه .. و أعتقد البعض ممكن يجوف هالشي جدا هين
و لكن الأثر النفسي مثل ما قلت اذا كنتي مسويتنه من خاطرج بيكون جدا كبير بإذن الله
و سويه بينج و بين نفسج عشان تحسين شكثر حلووو نحمل في قلوبنا رأفه و رحمه للغير بدون ما يعون
هم شو اللي نحن نفكر فيه و نحن يالسين وياهم .. نحادثهم .. أو مجرد خاطفين عليهم

نبدا بعون الرحمن سبحانه

.. { 1 } ..

البشكاره تنظف الحمام .. عامل النظافه يلم و ينظف صوب الزبايل أكرمكن الله

في خاطرج قولي .. { عسى الله يكرمك و يرفع من قدرك و مقدارك }

.. { 2 } ..

واحد متهور يسووق فالشارع مب مسوي اعتبار للناس و لا اي أهمية

في خاطرج قولي .. { الله يهديك و يحفظك و يردك لهلك سالمن غانم }

.. { 3 } ..

شخص جدامج رفع قلاص ماي يشربه

في خاطرج قولي .. { عسى الله يكرمك و يبرد على قلبك و يسقيك م الكوثر ان شاء الله }

.. { 4 } ..

شخص يسولفلج و يضحك و تعرفين بأنه يعاني من هم و ظيج و عنده مشاكل

في خاطرج و انتي يالسه معاه .. { عسى الله يفرج عنك و يبرد على قلبك و يرزقك كل خير على صبرك في مصابك } ..

.. { 5 } ..

وحده يالسه جدامج و الله ما عطاها عيال و تسولف جدامج و تضحك و عيونها اطيح عاليهال
أو حتى لو ما كان في يهال بس إنتي تعرفين شو اللي صاير وياها

في خاطرج .. { الله يبرد على قلبج و يرزقج الضنا الصالح و نفرح فيج مربي ان شاء الله على خير بإذن الله }

.. { 6 } ..

مريتي على عيالج يلعبون و لا اخوانج يلعبون و لا يضحكون

في خاطرج .. { عسى الله يجمعكم دوم على خير يارب و يألف ما بينكم و يتمملنا يلستنا فالجنه ان شاء الله }

.. { 7 } ..

أمج أو أبوج يضحكون أو مستانسين

في خاطرج .. { عسى الله يديم الفرحه و يبرد على قلوبكم فالدنيا و الآخره ان شاء الله }

.. { 8 } ..

خطفتي على حد أو حد خطف جدامج

في خاطرج .. { الله يحفظك و يرزقك الفردوس ان شاء الله }

.. { 9 } ..

خطفت جدامج وحده مب لابسه لبس محتشم أو متعطره بقووو

في خاطرج .. { الله يهدينا و اياج يا إختي و يحفظنا و يستر علينا جميعا }

هاي بعض الأمثله فقط ..

تعرفين هالشي شو بيسوي ؟؟؟

[ 1 ] – نفسج بترتاح عقب الدعوه الطيبه ان شاء الله

[ 2 ] – ان شاء الله عسى ربي يكتبلج بالمثل .. كيف ما صرتي تدعين للناس ربي بيعطيج

[ 3 ] – أعصابج بتهدى بإذن الله و عوضا عن العصبيه و الأمور اللي مالها داعي مثل يوم نعصب على حد يسوق بتهور فالشارع .. نبدأ ندعي له و نهدي من أعصابنا بدال ما نوتر عمارنا في كثير من الأحيان
في حين إنه في أساليب أخرى ممكن نتبعها ..!

[ 4 ] – لسانج بيتعود على الدعاء الطيب و و الله مع الوقت هالأشيا اللي للأسف الكثير يجوفها عاديه
و تافهه بتجوفين شكثر أثرها كبير و معنوي ان شاء الله في حياتج

[ 5 ] – من هالأمور البسيطه بتعرفين تغيرين نظرتج للعديد من الأمور .. يعني مثلا يا عزيزتي .. مش معناة إنه وحده
خطفت جدامج و هي متعطره و عطرها شال المكان شل .. أقول في خاطري شو هذااا ؟؟؟ و هاي نعم وين تبا ؟؟؟ و الله يهديها ..! و بأسلوب إني أكون ماسحه هالانسانه من قائمة الناس اللي ممكن أسويلهم اعتبار و تقدير ..!

لأ .. أزعل على حالها .. أدعيلها بنفس راضيه و طيبه .. و تذكري .. فالنهايه رب العالمين هو وحده من يقرر وضع كل شخص .. يعني مب نجوف حد يغلط غلط عوود و نحط عليه إكس و نمحيه من الوجود و يصير من صنف الفاسقين
.. حبيبتي رب العالمين وحده هو من خلقنا و هو من سيحاسب كلا منا و تذكري .. نحن لو مهما جفنا و صادفنا مالنا حق نحكم و نصنف ..

أتمنى من صميم قلبي .. اطبقون هالأمور .. هي جدا بسيطه و لكن شخصيا من تطبيقي غيرت الكثير الكثير فيني
و ان شاء الله يارب تستفيدون و محد يستهين بهالنقاط لو مهما جفناها بسيطه و عاديه .. البعض ممكن
يقول عادي .. انحن نسوي جيه و جيه شو اليديد ؟؟؟

حسي فالشي يوم اتسوينه .. فكري فيه و تأمليه عدل و سويه من قلب و تفكير واعي بدون تطبيق ما يحمل وعي للي يصير