<<إلى كل زوجه وين عيدج>>

كنت حابه أطرح الموضوع في العيد اللي طاف..ومدام العيد جرب الحين..جلت خلني اطرح الموضوع
ونتناقش فيه..بروح مرحه..واسلوب حضاري

بدخل في صلب الموضوع
إنتي كزوجه..سواء كنتي توج معرسه..او معرسه وماعندج عيال ..او معرسه وعندج عيال
وين تعيدون..اقصد وين وكيف يبتدي عيدكم؟

تختلف العادات والتقاليد من بيت لبيت..بضرب مثال عشان تفهموني أكثر

أنا عندي(مرت اخويه العوده بنت عمي) و( مرت اخويه اللي الأصغر) وكلهن من الشماليه وكلهن عندهم عيال ربي يحفظهم لهم

من يعلنون عن إجازة العيد..مرت اخوي العود تشل بعمرها وتسير بيت اهلها..حتى ما تخبر..إلا وهي ظاهره من البيت..مع انه في البدايه كانت تجول عيد بعيده عندكم وعيد في بيت أهلي

ومرت اخويه الصغير إتي عقب صلاة العيد وساعات يباتون قبلها بليله عدنا..هم ساكنين في بيت بروحهم
والعصر او المغرب في اول يوم من العيد تروح عند اهلها تسلم وتعيد عليهم

طبعا احنا في بوظبي وعمتي العوده بمثابة يدتنا في بوظبي فكل الأهل في اول العيد وثانيه يسيرون يسلمون عليهم..واحنا بعد..من تشوفنا بدون حرمة اخويه العوده وعيالها تحتشر..ويوم هي تزورهم مع اهلها تحتشر عليها ليش مخليه ريلج روحه..وجاعده عند اهلج في العيد..هذي هب سنتنا

والوالده تنحرج..يوم نسير نسلم ع الجيران والأهل في العيد ويسألونها عن كناتها تجول عند اهاليهن..
يستغربون..لان كل وحده جاعده وحريم عيالها حواليها..خصوصا اول يوم..

انا أبغي عيال أخويه يربون على السنه..يعني مثلا في عيد الأضحى اخويه ياخذ ولده الصغير المصلى معاه..ومن يرجع يسلم على اعمامه ويعيد عليهم..ويظهر مع ابوه عند العرب..
وعقب يشهد الضحيه..ويشوفها وهي تنذبح..وغيره..
هم مايسوون هالشي لانهن اكثرهن بنات..ويعطون بيزات الأضحيه الهلال

هذا غير ان طول الإجازة اخويه يجعد ويظهر بروحه مع ربعه..ماريدها عقب تندم..وهايج الساعه إذا فات الفوت مابنفع الصوت

خواتي اعرف العادات والتقاليد تختلف من بيت لبيت..واظن في مواضيع قريتها..عن الكنه..كيف تشتكي وتتأفف من انها ما تتأقلم في بيت زوجها ومع أهله..بس في نظري هي طالعه من بيتها..وعارفه انه بيكون لها حياه جديده مع ناس غير أهلها..لأن الزواج مب شخصين..الزواج عائلتين..فلازم تتقبل هذي الحياه الجديده..مب تتمسك بأهلها وتحاول اتقلم اهل ريلها على اطباعها