الحين انا معقده؟؟؟

كيف حالكن يا الطيبات؟؟؟

دايمن يكون شي في خاااطري ولا اقدر افظفظ حق احد .. ماعندي ربيعه أأمنها على اسراري.. ولا اقدر اقول حق امي تتم تهويس بي و تفكر فيّه … علشان جيه ابغي اظهر كل اللي في خاطريه واتكلم .. لاعت جبدي …
من تزوجت صارلي 4 سنين .وعندي بنتين ( ربي يخليهن لي ) الاولى ثلاث سنين ونص والثانيه توها بتكمل السنة ….ومن دشيت بيت اهل ريلي لااااااااااااااااااااحظت اختلاااف كبير بين اهلهي واهلهم ….
اهلي غير ولله الحمد والمنه والفضل … يجتمعون مع بعض ويشاركون همومهم مع بعض . ويخافون على الغير ويحاتون الشخص اللي معاهم … امي ملاااااك طاهر يمشي على الارض .. عمري ماسمعت منها كلمه وحده تجرح مشاعري , وتخاااف عليه حتى من الصدااع الخفيف ..القاها دايما بجنبي … اشعر بحنانهم , بحنان الاب والام والاخواااان.. اخواني دايما يحسسوني باني صغيره ويهتمون فيه ويدلعووني ومايحبون يزعلوني … دائما حتى لو صارت بينا مزحه صغيره … يجون ويستسمحون مني على بالهم اني زعلت من مزحههم .. لا خليت منهم ,,,

واهل ريلي طيبين بعد. لكن ماتجمعهم رابطة الأسرة والعايلة …كل واحد عايش حياته .. قليل مايجتمعون …وبكرهم اللي هو اكبر عن ريلي مزوج وعنده 5 اولاد ماشاء الله ….والصفه اللي في اهل ريلي واللي اكرههاااا انهم يطنزووووون واااايد .. ويتمسخرون على ابسط شي … تعالي وغلطي بس في حرف واحد شوفي كم من طنازة ومسخره راح تحصلينها ..لا وبعد يذكرونج بها وينشرونه ( مايسترون عليك ) ..هذا يظحك عليج وهذاك يطنز… لين ماتمين تفكرين في الجمله اللي بتقولينها عشر مرات قبل لا انطقهااا ….
بنتي ماسلمت منهم .. بعدها طفله وماتيب بعض الحروف عدل .. تنطقهن شوي غلط … تموا يحطون عليهاا ويطنزون … والله انه حتى تميت ما ابغي اشلها معايه صوبهم ….والاحظ بينهم تفرقه وااايد وخصوصا من عمتيه ( جدة بنتي ) دايما تحب عيال ولدها الكبير وتلوا عليهم وتبوسهم وتحظنهم … وبنتي انا مجرد سلام عااادي …. دايما المدح حق ولد ولدها وبنتي لو بتعق المخده احتشرت شوهذا ؟ علميها البنت ما تسوي جيه ؟( ما ادري انا شو شغلتيه في البيت ) ونحن ربينا ولازم تربن بناتكن شكلنااا … زهقت لدرجة اني ما ايلس عندهم وايد … واللي كاسر خاطري انه يوم يتمسخرون على بنتي ابوها قاااعد وفااااتح حلجه من الظحك ولاهمه بنته … ليش ما يحس شراتي ؟ ليش مايسكتهم ولا يقولهم هاذي صغيره حرام عليكم ؟ ؟؟ ولا انا حساسه اكثر عن اللزوم ؟؟؟ ما ادري شوبلاني …؟ كله مظايقه واحس بنقص عااااطفي كبييييييييييير والله العظيم اني اكتب لكم ودمعتي في عيني … ما ادري شو اللي فيني … والله يوم اسير بيت امي الااحظ اختلاف وايد … امي تحظن بناتي وتفرح بهن وابوي كل ساعه يجي ويبوسني يقولي وحشتيني …. واخواني كل واحد من صوب يالسين عدالي يظحكون معاي ويحسسوني اني انسان وليه مشااعر ….

ادري طولت عليكم لكن هذا اللي في خاطري وحبيت اظهره لكن والقى منكن الكلمه اللي تجبر الخاطر …

الله يعين الجميع .. و تحملي وان شاء الله تطلعين بيت ابروحج .. وترتاحين .. و عليج بالدعاء والصلاه

ونسكت لان اي تعليق بسيط ( على اهل الريل ) يزعل ريياييلنا منا ……….

والله الفروق اللي ذكرتيها بين اهلج واهل ريلج بسيطة تعالي وشوفي الفروق اللي بين اهلي واهل ريلي انا

والله فرق السما والارض … من ترابط اسري من طريقة التفكير من المستوى الثقافي .. خليها على الله

بس مع جي انا ما انظر لام ريلي الا انها ام وتستاهل الاحترام والحب والتقدير هي وابو ريلي اما الباقي

سلام في المناسبات.. ( من باب صلة الرحم )لا اكثر ولا اقل ..

على العموم وسعي صدرج يالغالية ولا تتكدرين وقولي لنفسج انا ما بستوي حساسة وعلى كل كلمة بزعل

واذا اي حد تم يعلق على بنتج وطريقة كلامها قوليله بلطف ما يصير تضحكون على الياهل وجي مرة بعد مرة

بيغيرون هذي العادة فيهم ..

الصبر يالغالية الصبر ما في احسن عنه …..

الله يوفقج ويحفظلج بناتج

والسموحه ..

لان في ناس تحب تتطنز ع غيرها لكن ما تحب حد يجرحها ابد

فعامليهم بالمثل

ولا تعطينهم مجال يضحكون ع بنتج وفهمي ابوها ان اهله اذا استمروا ع هالحال معاج فانت ما بتسيرين لهم الا في المناسبات ولمدة سويعات قليلة

لان اللي ما بيحترم مشاعري ما عندي استعداد ايلس وياه

الله يهديهم

اختي ام هيااااااااااااا……….. انتي اولا واخرا حسااااااااااااااسه وايد……….من طرية كلامج مبين هالشئ ……. الحلو فيج انج حابه تفضفضين عندنا …..خذي راحتج……بس بعد نحن مابنقولج الله يعينج وسوي جيه وسوي جيه…. لازم نشوف حل عشان ترتاحين انتي ………صح ولا لا

شوفي دايما اقول لنفسي واذكرها بالايه الكريمه (( انك لاتهدي م احببت ولكن يهدي من يشاء)) يعني مساله سكوت ريلج علي يصير مساله اصلا عاديه… هاي اسرته وهو ربى على هالشئ .. جو كله تعليق وطنازه …..بس هم يشوفونها دعابه وخفة دم يعني لا تلومينهم ابدا…..
انا اعرف ناس من كثر مايحبون يعلقون ويطنزون حتا اعمارهم ماسلمت …يعني لو مالقو شئ مايعلقون عليه بيعلقون على اعمارهم..هالشئ اكيد حاصل في اهل ريلج …. انتي حاولي تشوفينها من باب ثاني .. يعني ريحي اعصابج علاخر… خصوصا يوم يعلقون على بنتج تراها بنتهم بعد …لاتنسين اذا انتي حاولي تعقدين الامور بينج وبين هل ريلج عادي يقلبون عليج ومايشوفون اي داعي للسوالف وياج او ويا عيالج …انتي روحج محسسه من مساله عمتج ويا تعاملها ويا عيالج اتقولين انها تتعامل معاهم بطريقه غير………. جربي عيالج منها اكثر … واتقربي من هل ريلج من غير ضغط ولا نرفزه …حسسي ريلج انج انسانه تحب المرح …اعرف هالشئ مب طبيعتج… بس هالي الله كتبلج اياه انج تعيشين مع ناس جيه ……. وريلج لا تضغطين عليه من هالناحيه…لانه مب بايده الا انه بس يحاول انه اول مايشوفهم يعلقون عالبنت يركض لبنته ويحضنها جدامهم ويبن الهم انه هيه عنده بالدنيا وطاف لاي تعليق من تعليقاتهم من دون ضغط .. من دون نرفزه… من دون عصبيه ولا زعل وجيه بتمشي الامور بس انتي هونيها وبسطيها لنفسج ياالغاليه