مساكم وصباحكم ورد
يمكن تستغربون من عنوان الموضوع لكن اكيد اذا قريتوه بتفهمونه
بسألكن جم سؤال وفكرن في الأسئلة هذي أوكي؟
2_ هل تحبين تكونين وحدة كل يوم زوجة سمعت نصيحتها الغلط وتهدمت حياتها يالسة تدعي عليها ؟
وهل تحبين وتحبين وتحبين…الخ؟
كلامي الحين للناصحة:
تقرين مشكلة وتتأثرين وايد وتزعلين عشان راعية المشكلة وعلى طول من قوة التأثير تعطينها حل بدون لا تفكرين هل الحل مناسب او لاء اونج تنصحينها بطيب نية
واغلب الحلول المطروحة مثل كل مرة:
طنشي…عيشي حياتج…ودريه شو تبين في واحد خاين؟…واجهيه وخليه يعرف انج كاشفتنه ….انا لو مكانج بطلق منه!
واذا توها مالجة وعندها مشكلة صغيرة قالوا لها: يوم بعدكم على البر ودريه! احسن ما تكتشفين اشياء ثانية عقب العرس؟!
كل وحدة تحط نصيحتها وتروح ويوم ترد وتشوف وحدة ما وقفت وياها في نصيحتها أو أيدتها تقول:
لا تسمعين كلام اللي تقولج كذا وكذا……؟!
يعني بالعربي طبقي نصيحتي غصبن عنج
واللي تكتب: والله كل وحدة فيها عقل وتعرف النصيحة الصح من الغلط, انزين وفرضنا هي تعرف بس حبت تجرب شو النتيجة؟
ويوم في فيها عقل وانتي عرفتي انه نصيحتج غلط وين عقلج يوم كتبتي؟
ليش ما تفكرون قبل لا تنصحون شو الضرر لو الحرمة حاولت تحافظ على حياتها وبيتها بطريقة صح, ليش كل حل منطقي يكون من وجهة نظر البعض منكن عدم فهم وكلام غلط؟
شو احساسج يوم راعية المشكلة توافقج في نصيحتج الغلط وتبدا تنفذها وتمشي عليها وتهدم حياتها خطوة خطوة؟ وانتي من داخلج يمكن ندمانة انج ما فكرتي زين قبل لا تنصحين!
حطي نفسج مكانها وقولي كيف بتتصرفين؟ هل مستعدة تتقبلين نصيحتج اللي نصحتيها فيها وتطبقينها في حياتج؟ بأمانة جاوبي
المخطوبة شي طبيعي بتبدا تكتشف اشياء وايد في خطيبها هل في حد كامل فالدنيا اصلا؟ وحتى لو اكتشفت شي غلط هل كل وحدة فالدنيا عرفت شي عن خطيبها تودره؟
لو هذا هو الحل عيل ما حد بيعرس!
وحتى المعرسة لو عرفت شي غلط تحاول تعدله بطريقتها لو أمكن مب تطلب الطلاق على طول!
كل ما تبون تنصحون فكروا في النصيحة وتذكروا قول رب العالمين:
" ما يلفظ من قول إلا لديه رقيبٌ عتيد "
وان ما عرفتي تنصحين تذكري حديث رسولنا الكريم:
( فليقل خيرا أو ليصمت )
كل كلمة تقولونها انتوا محاسبين عليها ومب كل رد تقولون تكلمت بنيتي ونصحت بنيتي ….الخ
فيه اشياء انتي تكونين عرفتي انها غلط ومصرة تحطينها بكل موضوع هل كلهم بنيتج الطيبة؟
الكلام ببلاش ما عليه فلوس بس عليه حساب يوم القيامة وحياة الناس غالية يا جماعة الخير, اللي طرحت المشكلة اكيد تهمها حياتها ولا جان ما دورت حل عندكن من الأساس.
المهم أتمنى من كل قلبي انه اي وحدة تبا تنصح نصيحة تفكر قبل لا تكتب واذا ما قدرت تنصح تكتب اي دعاء أو تطلع بدون رد.
نبا كل حرمة وكل ناصحة تكون قدوة لغيرها عشان يكون فيه حياة اسرية لو وحدة ناجحة عالأقل.
تقديري
بس الانسان اذا يبي ياخذ نصيحة فعليه لازم يراجع مختص مب ينزلها بالمنتدى بس الاكثرية تبي تفضفض في جمعه حريم كل شخص يدلوا بدلوه مب شرط اهي بتاخذ برمستهن عادي تسمع وتقرا وعقب ترد على وضعها القبلي ولا كنها قالت شي ولا قرات لانها تكون مضايقة وطلع حرتها وبس
بس تعرفي شو الي يضحك الحين الكل بيدخل يوفقج الراي ويقولج انتي صح
بس صبري شوي ودخلي موضوع او مشكلة ثانية بتلاقي نفس النقاط الي وضحتها لهن سونها هههههههههههه يعني مب استوعبن الرمسة صدق 
انا عن نفسي ما اقدر انصح وحده انها تطلق من زوجها او تفك خطبتها وكيف ما قالت الاخت اسيرت شوق المنتدى للفضفضه فقط يعني مايصير اي وحده تتبع النصائح الي بتنكتب لازم كل حرمه هي عارفه وادرى بنفسها اذا تقدر تستحمل ا تصبر او ما تقدر كل وحده وقلبها ومشاعرها الله يصلح امورنا جميعا اختي وربي يوفقك موضوعك ممتااز فعلا
ما احب ادخل اكتب نصاايح وحلول لاسباب اهمها اني في بداية عهد زواجي الله يخلي لي زوجي وبذرتنا كتكوتنا وينبته نباتا حسن
وثانيا لن ماجربت والحمدلله
الذي عافانا مما ابتلاهم
ولن في مختصين لهذي الامور بيحلون المشكله بعد الاستماع لكل لاطراف بينما نحن نسمع من طرف واحد "الزوجه" بنتعاطف
بدون مانعرف شو اغلاطها
مع ريلها ، وطبعا الاغلب مايعترفن بالخطا ورابع شي هو اثم الساعي في التفريق بين الزوجين هنا
يمكن نصيحه بدون وعي تهد بيت كامل ف من راي الحلول عمرها ماكانت في
المنتدى الا اذا كانت تبا
تفضفض والله يعين
الكل
والطرف الثاني له حرية الاختيار في انه يسمع فلان او فلأنه او يسمع اللي برأسه…..
و الشرح موجود ابحثوا عنه بالنت اخواتي بارك الله فيكم