اللهم اشف كل مريض يا رب واشفني معاهم
حبيت أفتح هالموضوع وأتمنى إن يثبت
أنا مصابة حديثا بالسكري وتحديدا اكتشفت اصابتي في شهر 7 سنة 2024 وممكن أكون أصبت قبلها بشهرين أو ثلاثة بهذا المرض،،
تحولت حياتي لشي مظلم لأني كنت لازم أغير كل شي في حياتي،، وأكثر ما كان وما زال وبيظل يشغل بالي موضوع الحمل،، لأن الحمل مع هذا المرض معاناه والله الكفيل ابها ان شالله،،
صابني إحباط وما زال،، وحبيت إني والمصابات نتناقش كونه أكثر إحساس ببعض من شخص غير مصاب،، والله لا يبلي أحد ان شالله،،
في آخر زيارة للطبيب وكانت قبل 4 أيام قرر لي لازم أستخدم الإبر، وأنا من قبل هيئت نفسي لهذا الأمر عشان ما أنصدم، بس مب رايمة أتقبل الوضع، ولين الحين ما تجرأت أستخدم الإبر وأنا عارفة إن مضاعفات هذا المرض مب هينه،،
خلونا نتناقش ونشوف ستايل حياتنا اليومية كيف يمر ونتبادل خبرات من بعض سواء بأفضل المستشفيات وكيف نعيش ونستمتع بالحياة مثل باقي الناس،، وأتمنى أتمنى فعلا إن الموضوع يثبت خصوصا ان دولة الإمارات تعد الثانية عالميا بالإصابة بهذا المرض وصار لا يخلو أي بيت منه،، إلا نادرا،،
بانتظار تفاعلكم،،
الله يشفيج ان شالله ويكتب لج الذرية الصالحة ان شالله
أنا هالنقطة وايد مخوفتني والله كريم
شو نوع السكري اللي عندج، وشو تستخدمين؟؟ وشو عن النسب عندج؟؟
الله يشفي الجميع ان شالله
للرفع
انا صراحة هالشي اللي احاتيه موضوع الحمل، والله صدق خايفة وابغي احمل بس خايفة من اللي بيستوي بسبب هالمرض،
ما فكرتي اتركبين المضخة؟؟
احسه مرض عادي بس الواحد يضبط نفسه وهو يعتمد ع المحافظه ع الاكل والرياضه لازم اتكون جزء من حياتنا اليوميه
والله يشفي جميع المرضي