حبيت اعرض هالموضوع والهدف كيف نحقق هالمعادلة
ام + زوجة + امرأة عامله = حياة سعيدة
اقترح اي وحدة تتفضل وتقرأ هالموضوع تفيدنا بتجربتها
يعني مثلا كل وحدة توضح برنامجها اليومي من الصبح الين الليل في كيفية اتقانها دور الام وتؤدي واجباتها نحو عيالها وكيف تتقن دور الزوجة الصالحة وكيف تتقن دور المرأة العاملة وتخدم مجتمعها
يمكن اللي تقرا الموضوع تحسه معقد بس صدقوني نقدر نحقق هالمعادلة على اساس ادارة الوقت
الحين بحط لكم سناريو زوجة لديها ولدان طفل عمره 1 وطفل عمره4 يروح الروضة تعمل في مكان يبعد عن البيت ساعة من الزمن دوامها يبدا الساعة 7 ونصف وينتهي الساعة 2 ونصف عندها حضانة في الدوام وعندها شغالة
الجدول المقترح
الساعة 5 تنش الصبح وتصلي الفجر تدعي ربها يوفقها في حياتها توعي ريلها للصلاة بابتسامه من القلب
الساعة 6 تكونين متسبحة ولابسة وتوعين ولدج اللي يروح الروضة وتلبسينة وانتي تلبسينة ارقيه واكليه بايدينج (تريقي انتي وعيالج) وخلي يتريا الباص ويا البشكارة واستودعيه في حفظ الرحمن
الساعة 6 ونصف خذي ولدج الرضيع غيري حفاظته وارقيه وزهبي له حليب حطيه في السيارة في كرسي الاطفال مع اغراضه(حفاظات+سيريلاك+…) وسلمي على ريلج وبوسيه على خده واستودعيه الرحمن.
وانتي في السيارة حطي شريط اذكار الصباح
الساعة 7 ونصف وصلتي الدوام حطي ولدج في الحضانة اللي في الدوام واستودعيه الرحمن
وصلتي المكتب سلمي على اللي تشوفين جدامج بابتسامه من القلب واطلبي لج كوفي او شاي حليب
اتصلي للبشكارة وتاكدي ان ولدج ركب الباص او اتصلي لمشرفة الباص وفي وايد مشرفات متعاونات
وابدي شغلج بذكر الله (بسم الله) اشتغلي بضمير وخلصي شغلج وخلي السوالف اللي ما منها فايدة مع البنات
الساعة10 اتصلي في الحضانة واطمني على ولدج
الساعة 1 تاكدي ان ولدج وصل البيت كلميه وحطي كامية اتصالات عسب تشوفينه
الساعة 2 ونصف خلص الدوام شلي عمرج وولدج من الحضانة وسيرو سيدا البيت لا تسيرين لا مول ولا خرابيط اتذكري ان ولدج وريلج يتريونج ووصلوا البيت يواعه..
الساعة 3 ونص وصلتي البيت والخدامة تكون مزهبة الغدا وطبعا سوي طبق ولو شي بسيط من الليل وخبري ريلج انج طابخة هالشي حتى لو كانت سلطة والله ما راح تتخيلين اشقد بيستانس عليج
الساعة 4 بعد ما تتغدون انتي وعيالج وتصلين
اسبحي بسرعة واكشخي وسيري لريلج وونسيه لا تخلينه يرقد وسولفي معاه واذا فيج الدورة سويله تدليك او مساج او…
عيالج حطيهم في الصاله ويا البشكارة ويا كاميرة التصالات وخبريها انها كاميراعسب تتطمنين على عيالج
الساعة 6 اتجهزوا لصلاة المغرب وعودي البشكارة تسوي شاي او نسكافيه او قهوة ويا كيك او بسكوت بعد ما تشربون وبالعافية عليكم سيري الحين صوب عيالج درسي ولدج والعبي ويا عيالج
وتمي وياهم الين صلاة العشا اذا ريلج طلع عقب المغرب حطي ماسك في ويهج
الساعة 8 حطي عشا عيالج واكليهم بيدنج ورقديهم
الساعة 9 خلي البشكارة تحطي العشا انا اظمن لج ان ريلح وصل حده وبيرقد لانج ما خليتيه يرقد الظهر
الساعة 10 رقاااااااااااااااااااااااد
شو رايكم بالبرنامج
ابي ردودكم وابي اشوف شو برنامجكم اليومي عشان نفيد ونستفيد
وعشان اكون معاكم صريحة هالسيناريو راح اطبقه من الاسبوع الياي لاني حاليا في اجااازة
الله يوفق الجميع
بس إن شاء الله ربي يقدرج وتطبقينه
وإن شاء الله ربي يرزقني شغل بسرعة وأطبقه وياج
لاني بعدني ( آنســــه ) ههههههه
تنش 5:30
تصلي
توعينا انا و و اخواني ( عددنا 5 و السادس في العين يدرس) ما شاء الله
اصغر واحد صف أول و انا الكبيرة يعني الكل يلبس لحاله ^_*
انا انش لحالي بس هي لازم تتطمن اني وعيت و اختي نشت
و تروح تتلبس و اخواني يلبسون
من الساعه 5:45 و هي توعي ابويه ههههههههههههه لين 6:15
انا اسوي لاختي شعرها و امي تسوي لاخوي الصغير
كل واحد فينا دوامه مختلف عن الثاني
الوالد 7 الوالده 8 انا 7:30 اخواني و اختي في المدارس من بين 7-8
كل حد فينا يطلع بروحه
ننزل يكون الريوق جاهز من في الليل امايه اتقول لهن شو يسون ريوق و شو الغدا بعد ما تستشيرنا هههه و الراي راي الوالد في الاغلب
الا لو استخدمت انا الفيتو ^_* و اعترضت ( عندي فود اليرجي )
الرجعه كل اخواني الاولاد ( صف سادس و اول ) يردون اول شي
يسبحون و يغيرون و يجابلون التليفزيون و لا يدرسون و يخلصون واجباتهم عشان يروحون النادي بعدين العصر
اختي و اماية يرجعون نفس الوقت 2 او 2:15
اماية ترجع تكون مصليه في المدرسه و توصل بس تسبح و تتلبس و تتعطر و تنزل تشيك عالغدا
ابويه يرجع 2:30 او 2:45
يتغدوون مع بعض كلهم و بعدين ابويه يصلي العصر و ينام و لو الوالده عندها شي مثلا تحل مع اخويه واجباته او تدرس اخويه الثاني
او عندها شغله عالاب توب تقعد و لو ماعندها شي تريح مع الوالد
اممممممممممم
ايي دوووري انا اوصل البيت 4 و لا 4:30 حسب الزحمه اللي في الشااارع و اخويه ثانويه عامه يوصل معاي
او قبلي الاقيه بدا يتغدا
امايه الساعه 5:30 العصر تكون نشت و غيرت و لبست و حطت ميك اب خفيف
( ما تحب جلابيات البيت و لا التنانيير وايد في البيت يكون جينز و تيشيرت و لا برامودا اي شي خفيف و ناعم)
توعي ابويه قبل اذان المغرب لانه يصليها في المسيد و يرجع يلقى الشاي بالحليب جااهز معاه كوكيز و لا سينابون روولز و لا كيك و لا دوناتس و لا فطاير
يا انا او امايه او الخدامه مسويتنه
ونقعد كلنا في غرفت المعيشه و عالطاوله دلة شاي احمر و دلة قهوة و فواله ( دووم فواكه او كوكيز و بيتيفور) كله هووم مييد ^_*
و نتناقش شو سوينا اليوم و لا شو صار و لا المواقف اللي مرينا بها
و اخواني اييون يقدموون عرييضه بطلباتهم من الجمعيه و المكتبه هههههههه يوميا هذا
و اذا شي ما عرفوا يحلونه او ما فهمو درس معين يبدا شغلنا انا و امي و ابوي
لانهم ما شاء الله 4 اللي في المدرسه ^_^
لين يأذن العشا ابوييه يروح يصلي و لازم يروح يشوف يدتي الله يطول بعمرها و يخليها لنا فدييت رووحها
اماييه تروح معاه دوم وبعدين يخلصون مشاويرها و مشاوير البيت و طلبات اخواني
و لو حد عنده امتحان و انا كنت نايمه بدري او تعبانه او كانوا 2 عندهم امتحانات اماية تقعد في البيت
الساعه 10-11 اخواني في حجرهم نايمين
انا ماحد يقولي نامـــــــــي دايرة على حل شعري هههههههه
اقعد معا امايه و ابويه لين 12 حدددي لاني ما اكون راقده العصر
و اروح انام
امايه و ابويه 1 بالكثير ينامون الا لو في موفي حلو يتمون لين 2
( طبعا خلال القعده حد يمسج للثانيه يا ريوله يا ظهرها يا كتفه يا راسها)
و قعدتنا كلها طنازه و ضحك الحمدلله و لو مرات يتوتر الجو بسبب اخواني ما درسوا او اهملوا و ابوي و امي تطلع قروونهم
هههههههههههههه
يوم الاثنين الصبح اول ما تنش امايه تشغل سورة البقرة في الصاله اللي فوق و ينسمع في البيت كله
الويك اند عند امي و ابوي
الخميس عادي كأي يوم ثاني لكن من غير دراسه ^_*
يعني عقب المغرب نطلع من البيت نروح عند يدتي الله يحفظهم و يتيمعون اهل امايه
اليمعه البيت كله ينش 11 عشان صلاة الجمعه و نكون راقدين بعد الفجر و اول ما تنش الوالده تحط سورة البقرة في الصاله و ينسمع في البيت كله
يرجعون من الصلاه يكون الغدا جاهز لانه ما يتريقون بس ابويه يشرب الشاي و جنبة سناك لايت و مرات ما ياكل
و بعد الغدا نقعد كلنا مع اخويه اللي في العين لانه يكون محد و نسولف بعد العصر الوالد و الوالده يريحون
( ما يرقدون بس يقعدون في الغرفه لانه ندخل عندهم لو نبا شي و لو الباب مسكر ما نتجرأ ندق عليهم)
و بعد المغرب نطلع نتمشى و لا نروح المول و الساعه 9 نروح عند يدتي ام ابويه
عمووومي كللهم يتيمعون مع حريمهم و عيالهم و نتعشى هناك كلنا
الساعه 1 تنروح البيت و لو ما تمشينا قبل ما نروح عند يدتي نتمشى بعد ما نطلع من عندها يعني حتى لو 1 في الليل
و الحمد لله هذا جدولنا اليومي من يوم ما وعيت على الدنيا الخميس لاهل امايه و الجمعه لاهل ابويه
و مرات نكون اليمعه تكون عنا في البيت حتى يدووتي اتي عنا