انا والدوام شوه اسوي

السلام عليكم ورحمة الله وبركاته

اشحالكم … طبعا مثل ماتذكرون انا كنت كاتبة موضوع قبل عن الدوام اللي انا فيه .. بنات انا وايد مضايجة من الدوام والقسم اللي انا فيه اكثر البنات مال حش وكل وحدة ترمس عن الثانية وكل وحدة عندها ويهين جدامج شي ومن وراج شي ثاني تخيلو يا بنات ان البنت اللي يالسة حذالي حتى كلمة اشحالج ماتقولي وانا قبل دوم يوم كنت ادخل اقولها اشحالج الحين انا ما اكلمها الا نادر لان صار خلاف بيني وبينها لانها كانت تقول عني اني انا ما اشتغل وماعرف شي بس لاني يديدة وانا كل شغل كانت تطلبه مني كنت اسويه واسوي شغلي باخلاص وتفاني مادري ليش هي جي حتى البنات اللي هناك مادري كيف ما قدرت اتاقلم وياهم لان بيئة العمل مووول ماتشجع والمكان اللي انا فيه يباله جرأة واحس كله مناسبات وحتى يوم اييبون اكل تخيلو محد يعطيني اكل ويقولي تفضلي احس عمري وحيدة مووول مايشجعون
ولازم اكون حذرة لان البيئة اللي انا فيها مااا تشجع وفوق كل هذا ضغط الشغل مب سالفة ضغط بس الشغل وااايد صعب …. مليت يوم اسير الدوام احس بالوحدة

الله يعينج

لو الواحد بيقول خليج في حالج وما عليج
من حد ، أحس بعد الوضع صعب عليج ،
خاصة إذا كنتي بالمرة غير عنهم من ناحية
الشخصية والتصرفات والأفكار . . ما أقول
غير الله يفرجها عليج ويبدل حالج للأفضل

انا من رايي انج تنعزلين عنهم فترة
واثبتي نفسج بشغلج
وراقبي كلامهم وتصرفاتهم
والزينه منهم تقربي منها
والشينة خلي بينج وبينها السلام فقط

والله حاسة فيج الغالية انا مريت بنفس تجربتج بداومي الاولي كل اللي سويته اني اتجنبتهم تماما" لاني اكرة هذي النوعية من البنات والحمدلله اجتهدت ابشغلي واثبت جدارتي بالشغل نصيحتي لج اتجنبيهم قد ما اتقديرين واذا عالصعوبة اللي اتواجهينها بالشغل نفسه الغالية هذا شي طبيعي لانج بعدج يديدة عالشغل عطي نفسج فترة 3الى 6 شهور اكثر اذا حسيتي انج مب قادرة اتكملين بالشغل دوريلج عشغلة ثانية وربي يوفقج ان شاء الله.