بنتي 7 سنوات ما ترقد الليل تعبت منها

مثل ما قريتو في العنوان

بنتي نور عيني عمرها 7 سنوات الله يحفظها ما ترقد الليل. اتنش يمكن 10 مرات أو أكثر واتي عندي الحجرة وتنششني ما تخليني أرقد.
ساعات اتيني اتصيح، أقولها ماما ليش اتصيحين؟ اتقول أنا أباج. أقولها انزين ماما أنا ما رحت مكان. وأخليها ترقد عندي 10 دقايق واقولها يلا روحي غرفتج، تروح وترجع بعد فترة. وطول الليل على هالحالة لين الفجر. بعد الفجر ترقد عادي متواصل لين الساعة 11 تقريبا.

وخلال النهار أسألها ماما ليش صحتي أمس فليل اتقول أباج أنا وايد أحبج أو ساعات ماتتذكر شي.
أسألها ماما انتي خايفة من شي؟ اتقول لا. وعلى فكرة هي ترقد ويا أخوها الصغير يعني مب بروحها. وهي متعودة من يوم كانت صغيرة أصلا كانت ترقد بروحها وعادي عندها.

المشكلة بدت من موقف استوالها في المدرسة. كانوا مسوين إخلاء وهمي في حالة الحريق في المدرسة. والظاهر بنتي كانت تتحرا انه صدق في حريجة ويوم سألت الأبلة فعلا قالت انه بنتي كانت الوحيدة اللي لاصقة فيها (الأبلة) وتصيح ومرعوبة، والأبلة تحاول اتفهمها انه بس تدريب.
بس من ذاك اليوم حسيتها استوت خوافة وعصبية واخترب رقادها، وهالكلام تقريبا يمكن من 9 شهور.

ماعرف شو أسوي وياها، ساعات من كثر ما تنششني فليل أعصب عليها وعقب تغمظني.