تدرون ليش ما راح أمتن حتى لو جسمي قابل للمتن؟ تعالوا أخبركم بالسر

مرحبا ملايين خواتي

لاحظت في هالقسم معاناة البنات من السمنة والريجيم .. وكيف البعض ينجح في إنقاص وزنه والبعض الثاني تستمر معاناته أو ينقص ويرجع يزيد.

طبعاً العلاقة بين الجسم بين الأكل علاقة طردية وليست عكسية .. بمعنى جسم الإنسان هو عنوان لطبيعة الأكل اللي ياكله.. وطبيعة الأكل عنوان لجسم الإنسان.

خلوني أخبركم بقصتي أول شي وليش أنا واثقة إني طووول عمري ما راح أزيد كيلو إلا إذا أنا بغيت .. يعني برضاي مب غصبن عني

من وعيت ع الدنيا وأنا أشوف أهلي معظم أكلهم من الخضار .. الوالد عنده خبرة في الزراعة ورثها عن يدي .. والوالدة أبوها كان مزارع أيام شبابه.

اتقول أمي إنهم أيام زمان كانوا عايشين في مزرعة وكانوا يتغدون في الأسبوع مرة لحم أو دياي أو سمج .. وباجي الأيام غداهم خضار وبقوليات.. مثلاً صالونة باذنجان مع العيش أو عدس .. أو صالونة ملفوف مع العيش.. حتى البقدونس كانوا يسوون منه صالونة خخخخخخ .. تقول كان أكلنا لذيذ وصحي وكانت أجسامنا قوية ورشيقة وحتى ويوهنا كلها نضارة.

عاد يوم أنا صغيرة كنت أشوف الأهل يحطون العشا بامية .. أو باذنجان أو كوسة .. أو سبانخ أو عدس .. أو زهرة .. أو خضار مشكلة .. وطبعاً لااازم هالوجبة يرافقها خضار نية .. مثل الخس والخيار والنعناع والبقدونس .. أو فلفل بارد .. أو جرجير .. أو رويد .. أو ملفوف .. حتى الشبت ما خلوه خخخخخخخ

أما الغدا فأكيد منوع لكن العيش أغلب الأوقات مشخول .. والدياي والسمج في الفرن.. ولاااازم وياهم نوع من أنواع السلطة .. محد في البيت يستغنى عن السلطة حزة الغدا أصلاً

تمينا على هالحال إلى أن كبرنا .. وبعدين وحدة من خواتي ملت من هالأكل وقامت كله تطلب من الكفتيريا .. بالذات حزة العشا .. واللي صار إنه وزنها زاد .. والحين هي أمتن وحدة فينا والمشكلة إنها تعودت على الأكل الدسم لأنه معدتها توسعت وبالتالي أكلنا ما يشبع يوعها خخخخخخ .. ونحن مثل ما نحن امحافظين على أجسامنا ورشاقتنا.. لأننا انحب أكل البيت ونحب الخضار وتعودنا عليها وقمنا انوع في الطواجن والسلطات وباجي الأكلات.

بعدين مرة تابعت برنامج عن مضار الأكل الدسم والأكل المعلب وأكل الكفتيريات وكيف إنه يأثر ع صحة الإنسان وممكن يؤدي لا سمح الله لأمراض ما لها أول ولا آخر.

البرنامج هذا سوى لي نوع من التنبيه الداخلي .. وقمت أسوي كونترول على أي نوع أكل يدخل في جسمي.

قمت أقرا أكثر عن الأكل الصحي والأكل غير الصحي لدرجة إني صرت أعاف أي أكل ياي من برة ومن مصادر مجهولة .. وفي نفس الوقت زاد عشقي للخضار وصرت أتفنن في عمايلها .. آكل كثر ما أبغي ولا يأثر في وزني .. صرت أقلل من أكل اللحوم وأكثر من السلطات والخضار .. والحمد لله صحتي على أحسن ما يرام وجسمي متناسق.

نصيحة خواتي :

الغذاء مب مجرد ريجيم نطبقه اليوم وعقب فترة نتركه

الغذاء نظام حياة كامل .. والأكل اللي تاكلينه انتي لازم يكون من نفس الأكل اللي ياكلونه الناس اللي حواليج .. سواء عيالج أو اخوانج أو أسرتج كلها لأنه التجمع على مائدة الطعام يخلق نوع من الحميمية والمودة بين أفراد الأسرة.

والأطفال .. نصيحة إنكم اتعودونهم على هالشي من الحين .. ترى انتو أدرى انهم بيعانون نفس معاناتكم إذا عودتوهم على أكل غير صحي وزاد وزنهم وما راح يتحكمون فيه بسهولة.

عشانكم وعشان عيالكم .. اقروا أكثر وثقفوا اعماركم في كل ما يخص الأكل الصحي والغني بالفوائد.

محد امربح هالكافتريات والمطاعم غيركم واللي أغلب اللحوم عندهم مستورد وما ينعرف مصدره ويأثر على هرمونات الجسم.

اللهم إني بلغت .. اللهم فاشهد

صح لسانك و الله يتمم عليكم رشاقتكم و أثابك الله على النصايح الحلوه

حلووووووووووو كلامج ويدخل القلب وفالبداية تذكرت مريم نور

يسلموووو خيتوووو …

هلالالالالالالالالالالالالالالالالالا وغلالالالالالالالالالالالالالالالالا

صح لسانج ونحن بعد نتبع نفس هالنظام بالبيت بس اخررررررر الاسبوع ننوع بالاكل ونسوي اشياء دسمة

سلالالالالالالالالالالالالالالالالالالالالالالالال الالام

تسلمين على الموضوع الحلو..