حامل ومتلعوزه من اللوعه ,, ساعدوني

السلام عليكم يا امهات ..
اتمنى تفيدوني لأني صج متلعوزه وكارهه عمري ..
انا حامل في الاسبوع السابع .. يعني دخلت الشهر الثاني ..
تعبانه وااايد م اللوعه .. طول اليوم فيني لوعه ,, ايوع عمري لأني ما اقدر آكل ,, بعد الاكل احس اني ابغي ارجع ..بس الحمد لله لين الحين ما رجعت لأني اخاف م الترجيع ..
ومشكلتي ميوعه عمري حتى الماي ما اروم اشربه ..
انا سمعت عن البسكويت اللي يخوز اللوعه ,, ناكله م الصبح .. شو النوعيه انزين ؟؟ لا تقولون البقصم لأني ما ادانيه .. ابا شي ثاني ..
وإذا عندكم حلول ثانيه خبروني لأني متلعوزه ..
وثاني شي ,, الدكتوره عاطتني حبوب تثبيت وطبعا الفوليك اسيد ,, ومن يومين مطنشتنهن لأني احس من آكل الحبوب تزيد اللوعه .. شو الراي ؟؟

فديتج والله انا حاسه فيج
لاني عانيت مثل وعطوني المستفى حبوب اللوعه وزادتها بس كنت اصبر نفسي بالعلوج العلكه والله توخر اللوعه
وبعدين العلك مب كل شيء يعني انتي تبي شيء يخوزها انا مارمت اصبر من اللوعه قلت حق ريلي يروح الصيدليه وييبلي حبوب اللوعه وفعلا يابلي حبوب من خذيتها ماحسيت باللوعه وعليج بالعلك

والله يسهل عليج
ادعيلي الله يرزقني بولاده سهله

الغالية…لازم تستحملين…أنا في بنتي تميت لين التاسع و حبة رمان ما أقدر آكلها….على طول أرجع…و جربت الحبوب و حالتي أخس…كنت آكل الليمون بقشرة بس ما في فايدة…جربت البسكويت و كل شئ قريته في النت…ما شئ فايدة…و الحين حامل في ثاني بيبي….و نفس الحالة…حتى الماي ما أقد أشربه…و حتى فولك أسد و حبوب التثبيت و الله طنشتهم…الله يصبرنا الغالية

لله يعينج ختيه بس اصبري هذا حالنا في اول ثلاث شهور…بصراحــــه انا كنت أسوي عصير ليمون ونعناع اللوعـــــــــــــــــــــة على طول تخف بس تدرين كنت اخفف اكلي…بس حرام لا تيوعين عمرج هب زين للبيبي
ونصيحه داومي على الفوليك اسيد لأنه أهم شيء للحامل والجنين بالذات…الله يعينج ويصبرج

الغالية انا نفس حالتج انا اللحين في الشهر الرابع واشوي خفت اللوعه بس لازم الصبح ارجع بس اهون من الاشهر الثلاث استحملي اشوي … انا ترقدت في المستشفى اربع مرات السبب الجفف فكثري من السوائل اي عصير تقدرين تشربينه اشربية واكلي لا تعبين عمرج وما تاكلين .. اكلي لو ترجعين …

انصحج في البسكويت المالح والبشورة
والسفن اب
وعصير الرمان
واللبن واذا تحبين الحليب
واكلي خبز الصبح لانه يجفف السوائل يعني اللوعه الي في البطن ..

والله يسهل علينا ويصبرنا انشالله …

ومعلومه : انه الحرمة اللي ترجع واتية اللوعه تكون احسن من اللي ما اتية اللوعه ,,,
يعني يكون البيبي بخير …. وانا كنت استانس يوم ارجع لاني اعرف انه ولدي بخير …

شو اسم الحبوب الغاليه ؟؟ وبجرب العلوج ..
مشكوره الغاليه والله يرزقج بولاده سهله ان شاء الله ..

الله يعينج والله .. الحال من بعضه يعني ..
انا امص الليمونه وماشي فايده بعد ,, احس اييني حارج م الليمون ..
الله يعينا وتمر هالفتره ع خير ..

بجرب عصير الليمون والنعناع وان شاء الله يفيد ..
انا يا الغاليه مب مخففه اكلي ,, انا ما آكل مووول .. خيفانه م الاكل ومشكلتي ميته اصلا ضعيييييفه ..
والفوليك اسيد خذيته اول الايام وعقب حسيت اني من آكله اتييني اللوعه .. وطنشته .. الله يعين ويصبرنا وتمر هالثلاث شهور ع خير ..
تسلمين الغاليه ع الرد ..

الغالية الدوا في الصيدلية دوه للوعه وفي منه تحميلات هذي اذا تعبتي واايد وفي شراب ابيض بعد الزوعه تريح البلاعيم …
بس انصحج استحملي اشوي لانه مو زين كثرت الدوه … انا الشهر الثالث بديت اكل دوه …وكنت اروح المستشفى علشان اخذ ابرة اللوعه ,,,والسموحه الغالية