:::سفرتي لتركيا:::بالتفاصيل والأسعار والمناطق والمواقف الزينة والشينة:::

**محتويات شنطتي:-
1. الحلويات الخفيفة.
2. كلينكس معطر من النوع الكبير…للعلم وايد نفعني في الحالات الطارئة مثل تنظيف اليهال بعد الأكل، ونحن بعد بعد ما ناكل والحمامات العمومية للعيال…وتنظيف الياهل اللي عندي بوحفاظة….
3. كلينكس ناشف.
4. مشط وشباصة احتياط
5. بوكي
6. قلمي والنوتة.
7. الكاميرا
8. الأي بود
9. سيرين لحماية الأطفال من الزحمة.

**من بيبي شوب**

**من مذركير**
هذا شكل السيور

10. اوراق وارشادات عن تركيا طبعتها بالترتيب حسب الأماكن اللي
بانروحلها بالضبط.
11. موبايلين للاحتياط ان اخترب واحد الثاني شغال للعلم عندي
معلومة بأنج لو يلستي اكثر من اسبوعين في تركيا التليفون ما يشتغل انا
قلت يمكن من فولت الكهرباء ولا شي..
12.مروحة ورقية لأني حاطة حساب الحر.

**محتويات شنطة ولدي:
1. مرضعتين للحليب.
2. مطارة الماي الحار.
3. مرضعة للماي.
4. مرضعة للعصير.
5. حافظة للحليب المجفف.
6. حفاظات للصغار وللكبار على شكل هافات في حالة ابتلشنا ولا لقينا
حمامات للعلم وايد نفعوني وانصحكم فيهن بتلقونهن مكان الحفايظ في
الجمعيات.
7. بيجامة للنوم احتياط مع ملابس داخلية في حالة وسخ نفسه.
8. منشفة صغيرة للياهل..
9. فراولة مقطعة في صحن ومنجا مقطعة في صحن مع سندويشات
مختلفة للعيال مثل الشوكولاتة والعسل والجبن.
10. حليب فريش علشان لو جاع ولدي الصغيرون اغمسله خبز بحليب
واعطيه اياه.

والشنط الكبار…واحدة للملابس وواحدة للأغراض…والأغراض اللي
حطيتها هي كالتالي:-
1. شنطة صغيرة فيها كل الجراجات (الكاميرا، التليفون، والأيبود).
2. مكواة ومحول كهرياء واحدة من الأخوات يزاها الله خير قالت ان
البلاك مال كهربة تركيا تختلف عن مالنا فاشتريت محول كامل نفعني
وايد هناك.

هذا شكل بلاك الكهرباء مالهم…وهذا شكل المحول للتوضيح

3. سخان للماي.
4. بعض الأطعمة السريعة مثل (كورن فليكس، زبدة صغيرة، كاكاو
معجون صغير، اندومي، مربى صغير، عسل صغير، أكياس شاي
ليبتون، علب الرينبو الصغار، سكر، ملح، بسكوت مشكل) حطيت
حسابي لأني عارفة ان الأكل غالي في تركيا وبعد علشان لما نتمشى
اكون مضبطة اموري ومسوية سندويشات للعيال.
5. ادوات الطعام السفري (ملاعق، شوك، صحون مقعرة، صحون
عادية، وسكينة وحافظتين للطعام عليهم غطاء وحافظات لليهال مع
اغطيتهم وهذول واااايد نفعوني وباخبركم في تقريري ليش).
6. صابون تايد في كيس عسب اغسل الثياب ان لزم.
7. مفرشين في حالة احتجت لهم.
8. كيسة داخلها ادوية احتياط (زجام، كحة، بندول، قطر للعين في حالة
الحساسية، ضمادات)

اكيد لما اتشوفون تجهيزاتي هذي اتقولين بلاها هذي جنها مسافرة دولة
ما بها شي…لكن يا عزيزتي الفاضلة الأم الذكية اللي اتسافر مراعية كل
شي حتى تستمتع بالسفرة صح…بدون غثة العيال ولا ليتهم…لأنهم هم
العيال اللي ممكن ينكدون رحلتج وهم اللي ممكن يريحونج.

**محتويات شنطة بنتي :-
كنت شالة فيها دفاتر تلوين ومغامرات وتمارين والوان شمعية وقلم
رصاص وبراية لها ولأخوها. ووايد نفعتني هذي الشنطة.

رحلتنا كانت بتاريخ 14-7 وحتى 23-7 لكن غيرناها لما كنا هناك
وباخبركم الأسباب في الموضوع…واحنا كنا 2 بالغين و2 اطفال
ورضيع وكنا بندفع على التذاكر 8400 لأني حجزتهن من وقت بس
ريلي تأخر ما دفع فراحت علينا الرخيصة ودفع 8700 درهم على ما
اعتقد….

**خط سيرنا…
العادة للي يروح على تركيا يبدأ رحلته من اسطنبول…بس احنا كونا
فهمنا طبيعة اسطنبول حبينا نستمتع بالريف الأول وبعدين نخلي
اسطنبول على اخر شي…فصارت خطتنا (من اسطنبول على طول
نفس اليوم على بورصة بالباخرة وبعدها يلوا واباند والعودة الى
اسطنبول).

المصروفات:-
من الأمارات صرفنا 1000 دولار يعني قرابة 3700درهم غير اننا دفعنا مقدما للريال اللي حجزلنا الفنادق 500 درولار يعني قرابة 1800 درهم. للعلم الليرة تساوي 3.2 درهم والدولار يساوي 3.67 درهم

للأهمية:-
لازم اترتبين امورج صح انتي وزوجج خصوصا لو كنتوا عندكم عيال…
يعني سفرتنا هذي قسمنا المسؤولية على الأثنين…
**زوجي:-
-يتحمل مسؤولية ولده الرضيع (بحليبة وحفاظته وبأكله)…للعلم ان ولدي خذتله عربانة سفر نفعتني وايد…باتقولون شو الفرق بين عربانة السفر والعربانات الباجية.عربانية السفر خفيفة وما فيها شغل وايد وسلال وخرابيط يعني شرات هذي خذتها من بيبي شوب ب109 دراهم.

-عليه يخلص الجوازات يخلص التذاكر الخاصة بالمناطق السياحية اللي انروحلها.

**أنا:-
-اتحمل مسؤولية عيالي الأثنينة…باتقولون ظلم…لا لأني انا الوحيدة اللي اعرفلهم واعرف نقاط ضعفهم…خخخخخخخ شريرة…
-مسؤولية حمل البيزات والجوازات ومسؤولية ترتيب الميزانية.

**ملاحظة للحوامل
لازم اتطلعين وثيقة او تصريح سفر من المستشفى قبل لا اتسافرين…بالنسبة لي طلعتها من الكورنيش من الطواري على طول سوولي فحوصات كاملة من صورة وتشييك على النبض وعطوني الوثيقة…مدة صلاحيتها اربع وعشرين ساعة داخل الدولة يعني طلعيها قبل السفر ب7 او 8 ساعات…وانتبهي على مدة صلاحيتها خارج الدولة… يعني سفرتكم لو يبيلها 20 يوم قوليلها تعطيج مال شهر احتياط…وخليها جريبة من متناول يدج لأن طول الوقت في المطار يطلبونها منج.