مرحبا بكل الامهات ^_^ اليوم خطر ببالي اكتب موضوع وان شاء الله ما يكون مكرر
اتمنى ان الكل يستفيد وخاااصه الامهات الجدد
موضوعي اليوم عن المشتريات
شو الاشياء الي اشتريتها للبيبي و عقب تندمتي انج خذتيها او ما استخدمتيها بالاصل ..؟ و شو الاشياء الي خذتيها وتنصحين الكل فيها ..؟
اتمنى المشاركة من الكل ^^
والسموحة
اولا بتكلم عن هالحوض الي ابد ابد ما نفعني وبسرعه اخترب
ما انصح فيه ابد ><
2 >> جهاز المراقبه ابد ما استخدمته لاني دووم يم البيبي
3 >> في بنوتي اشتريت لها وفساتين وجنزات مقاس 0_3 وابد ما لبستها << فرحتي باول طفل خلتني^^ اخم السوق تقريبا هههههه
4 <<< هالمصاصه واااااااااااايد نفعتني وحبيتها بعد تقيس حراره الطفل
5<< هذي الزباله ( الله يكرمكم ) ابد ابد مب عمليه موووول ما حبيتها ولا استفدت منها
ووووووووووووبس وان شااء الله بفيدكم بأشياء ثانيه استفدت منها
اهم شي التفاعل بالموضووع ^^
نبدأ بسم الله . . طبعا بتكلم من منظوري الشخصي و لكل أم رأي مختلف طبعا في مشترياتها ..
الأشياء الي مانفعتني :
اللهاية . . تسبب امراض للبيبي و تتعبج وياه اكثر
القماطات الصغيرة خاصة قياسات بيبي شوب ﻷنهم جدا صغار و ماينفعون الا لجم اسبوع بعد الولادة و بعدها خلاص .. فنصيحتي لا تكثرين من القماطات و اخذي لفات كبيرة احسن ..
بشكل عام الملابس الي تكون نيوبورن ﻷنها بسسسرعة تصغر ع الياهل و خسارة ..
بشكل عام لا تكثرون لبس للياهل لان تنزل اشيا يديدة و بتكونين ماسكة روحج عن المشترى ﻷنج مكودة السوق فالبيت خخخخ
سرير البيبي الي ع شكل دائري خشبي .. خاصة الي يكون بدون تواير ابدا مب عملي و لا حتى يتنزل لمستوى كبير .. ثااابت و يدوب من يبدا البيبي يقلب تخافين تحطينه فيه ..
الأشياء النافعة و الضرورية :
مناديل مبللة لتنظيف البيبي + قطعة البلاستيك العازل الي تنحط تحت البيبي وقت التبديل + سلة صغيرة تلبسينها كيس عسب تفرين الوسخ فيها .. كله ينباع بمحلات الأطفال .. ايييي محل فيه ..
السرير الخشبي الي يتنزل لمستوى أخفض ﻷنه ينفعج حتى لو البيبي يقلب او يحبي آمن .. بس من يبدا البيبي يمشي انصحج ما تحطينه فيه عسب مايطيح منه لاسمح الله ..
حوض السباحة الي يكون فيه قاعدة مايلة تمسك لج البيبي عشان تسبحينه فأي غرفة خارج الحمام خاصة لو كنتي ام يديدة ﻷنج بتكونين خايفة فالبداية خخخ
هذا الي حضرني و لو تذكرت شي برجع إن شاء الاه و أتمنى الأمهات الب عندهم خبرة اكثر يفيدونا
انا أبدا ما أنصح بشراء جهاز مراقبة البيبي,والملابس قياس 0-3 لا تكثرين منها تصغر بسررررعة
بالنسبة للعمر من 0-3 ,أبدا لا تاخذون جينزات وفساتين,هي ملابس حلوه لكن مش مناسبة للطفل,أحس البنت تبرد بالفستان,والجينز يدايق الطفل من ناحية البطن ويدايق الأم مع كثر تبديل الحفاض
والله يخلي عيالكم
الاشياء اللي استفدت منها :
١- شفاطه ميديلا الكهربائيه
٢- السرير اللي له تواير وبعد يتحول لسله يتبطل اذا نمت على الدوشك احطه صوبي أسهل لي ارضع وارده في السرير
٣- الملابس الافرول لكن لها زلاغات هي تكون مسكره كامل بس صوب الزلاغات عادي اقدر ابطلها
٤- بطانيه شريتها من نك نك لحد الحين استخدمها وايد حلوه ودفي
٥- ميزان الحرارة من ماركه Braun
٦- عربه مع كرسي السياره تستخدم من اول يوم ولاده ريحتني وايد
٧- كرسي الاكل من يبدي الياهل يقعد لين عمر الثلاث سنوات وايد فادتني خاصه لما اطبخ اخله صوبي واحط اي شي على الطاوله ويقعد ياكل
٨- لعبة شريتها من التعليم المبكر تكون للياهل بثلاث مراحل من يبدي يحرك ايده ورأسه ولما يبدي يحبي ولما يبدي يمشي
٩- السيكل اللي له مقبض وعادي بعدين يتحول لسيكل عادي
١٠- عضاضه للاسنان وجيل للاسنان
١١- القطره الملحية و فيكس من عمر الثلاث شهور وفوق ينباع في الصيدليات
١٢- سودو كريم وفازلين وماركه موستيلا الصابون والزيت اللي ينحط في الماي ويعتمد على بشره البيبي
الاشياء اللي ما استفدت منها :
١- المراضع اشتريت وايد وما استخدمت غير بيجون وأول ست شهور وبعدين خلاص
٢- معقم المراضع من ماركة ايفنت
٣- اللهايه والألعاب اللي تنحط بسرير الياهل
٤- مناديل التنظيف حسست عيالي
٥- ماركة جونسون حسست عيالي
٦- السرير المبطن بالفرو ابد مب أوكيه لو غالي لحد يشتريه
هذا اللي تذكرته الله ييسر أموركم
العفووو حبيبتي واتمنى من الكل الافاده
بالنسبه للـ لهاية انا شراتج ما احبها احسها تسبب امراض وتأخر النطق في بعض اليهال
ونفس ما قلتي انا اتجنب اني اشتري قماطات من بيبي شوب مقاساتهم صغيره
وووصح ملابس النيوبورن لا تكثروون منها عن نفسي اخذ منها بس 10 افرولات ههههههههههه يكفوني لمده اسبوعين تقريبا ^^
والسرير كل ماكان ثابت ع الارض كان احسن وأامن للطفل نفسه
ومشكوووووووووووره حبيبتي ع المرور والافاده ^^