شحالكم ان شاءالله بخير
حبيت ف البدايه اخبركم اني انا مب عضوه يديده ^__^
ببدا ف مشكلتي الي ماعرف كيف احلها
انا الحمدالله عايشه مرتاحه ويا ريلي وعندي بنوته الله يخليها لي يارب ويخلي عيالكم يارب
وعايشه ف بيت اهل ريلي وعمي مطلق عمتي
المهم انا عندي غرفه وحده والبيت ماشاءالله كبير
واخوه الكبير مزوج وعنده اخو بعد وووبس
وانا بصرااااحه مووول مووول مب مرتاحه ولا اقدر اخذ راحتي لازم يوم ايلس ف الصاله البس طويل واتحجب
وماعندي مكان حق اغراض بتني وماحب احط اغراضها اي مكان وريلي دوامه ف بوظبي
يعني بس يكون موجود ف الويكند
فقررت انه يبني لي قسم خاص حقي غرفتين وصاله ومطبخ وهالشي من حقي
هو وافق فالبدايه بس قال ماقدر ابني برع البيت عشان ابويه مايقول انعزلتوا
قتله اوكي بننزل تحت لانه الطابق الي تحت محد فيه قاال اوكي وعيبته الفكره وقال دوري مصمم ديكور
ويوم خبر ابوه تخيلوا شو قال
الحين بيبدا القهر ^^
قااااال لااااااااااااا وليييييييييش وانتوا تبون تسوون مشاكل
وليش تنعزلون وهاي مب رمستك (( يقصد اني انا لاعبه بمخه ))
المهم استوت حشره وريلي قال خلاص سكري الموضوع مابا اضارب ويا ابويه
ياااااااااااربي ليييييييييش انزين نحن مابنهاجر ولا بنطلع برع البيت بننزل تحت
وهالشي من حقي انا موووول مب ماخذه راحتي ابا قسم حقي ابا مطبخ خااااص
ابا اغراض بنتي تكون ف مكان نظيف ابا ارتاح ويا ريلي خلاص مليت من كثر مايالسه ويا اخوانه
ماعرف شو اسوي والله اني مقهوره وابا ارمس ابوه بس ريلي قالي لا لاترمسينه
شو اسوي الحين
يعني والله يقهر على كيفه يقرر اذا هالشب عيب ولا لا انزين الحين اخوه مب محرم ومايجوز اني ايلس وياه
وحرمته بعد موجود وانا اوكي وياها بس بعد ابا احس بالحريه ابا خصووووصيه
اونه لااااا عادي يلسي وياهم هذا شرات اخوج شو اخويه !!!!! غصب يباني ايلس
والله قهر
اكيد انقهرتوا شراتي خخخخخ
التكمله ف الصفحه الثاااانيه
………………..
مشكورات حبيباتي ع المرور والنصايح
وربي يوفقكم يارب في كل خطوه
تدرون والله اني انا ساكته عن الموضوع
ولا رمست ريلي بس فيه غصصصصصه
تدرون ليش لانه البيت كبييييييييييير وفيه غرف فاضيه وخاصتا الطابق الي تحت مافيه حد يعني عادي انزل الطابق الي تحت
لا عيب ولا حرام بس هو عمي مب راضي اونه اباكم اتمون على قلب واحد !!!! يعني انا مب ماخذه راحتي لا ف غرفتي ولا ف الصاله
عشان نكون على قلب واحد ؟؟؟ شو هالتفكير
وعلى فكره ترا عمي مب ريال كبير عشان اقول انه خرف ولا مالومه يوم يسوي حشره بالعكس عمي ريال صغير ف السن
بس هو انسان عايش بالشك والتفكير الغلط
وعن سالفة انه اخوه يدخل غرفتي انا خبرت ريلي وريلي سوا حشره بس ماشي فايده اخوه اونه كووووول
عايش شرات الاجانب كل شي عنده عااادي وانا مسكينه اسكت ماقدر اقول لاتاخذون اغراضي
المفروض هم يعرفون الصح من الغلط او حرمته تقوله عيب تدخل غرفة الحرمه
هالمفروض يستوي بس شو بقول
انا قررت ارد واكلمه ف الموضوع او اني انا ارمس ابوه ^__^
والسمووحه لاني طولت
يعني ماتبينه بعد يتضارب مع ابوه هذا ابوه وبيته
إن شاء الله عقب بيظهر لكم بيت بروحكم وانتي توكلي على الله ولا تسوين مشاكل حاولي تتاقلمين والله كريم
المشاركة الأصلية كتبت بواسطة أم عبادي وحسوني 
يعني ماتبينه بعد يتضارب مع ابوه هذا ابوه وبيته
إن شاء الله عقب بيظهر لكم بيت بروحكم وانتي توكلي على الله ولا تسوين مشاكل حاولي تتاقلمين والله كريم
والله يا الغاليه اني ما اسوي مشاكل
بس ماااقدر والله ما اقدر
وهو روحه يدور المشاكل مايفكر في راحتنا
انا ماقدر اصبر والله تعبت ماقدر اتحمل
لازم ادور حل تدرين مستحيييييييييييييل نبني بيت رواحنا مستحيييل
انا انسى موضوع البيت بس انزل تحت اوكي هالفكره اوكي
لازم ادور على حل ^^
ومشكووووره على الرد الغاليه
مالج غير الصبر والدعاء غناتي
بعد فترة الله رزقهم يفيلا عودة
ترى هذا ابوه مايروم على زعله
ماينفع انه مرت اخوه تاخذ الحجرة الي انتي فيها ومثلا يستوي الدور الاول لهم
والحجر الي فاالارضي لكم عشان كل واحد يتوسع وكل وحده فيكن حجر عيالها صوبها
ترا العيال مابيتمون طول العمر صغار
يمكن عمج لوشاف انه عياله الاثنين يبون يتوسعون وداخل البيت يرخصلهم يسون الي يبونه
وإذا مانفع مالج إلا الصبر وقولي الحمدلله انه مشاكلج يات على هالشي غيرج محكورين
فالبيوت ومجابلين حمياتهم وعماتهم ونفسيات سوده على الاقل الشباب مب راعين رمسه ومشاكل