شي صدق يقهــــــــــر ما توقعت شبابنا صاروا بهالوقاحة

بدخل فالموضوع على طول من القهر اللي فيه من أمس و انا على أعصااابي …

أمس سلمكم الله ظهرت انا و اختيه سايرة بتشرى اغراض العيد الصبح من الساعه 11 تقريبا لان فالليل بوظبي صارت ترفع الضغط من الزحمه ..

المهم وحنا سايرين المارينا قلت بمر شيشة البترول"شيشة الكرنيش" (محطة البترول) بغسل سيارتي لانها من يوم الخميس من رديت من الدوام و هيه مغبرة …

تتوقعون شو شفت … !!! طبعاً هاي الشيشة فيها مطعم (ماكدونالدز) وفيه الطلبات الخارجية … يعني اللي بيغسل سيارته يصف يمين و اللي يطلب من المطعم يصف يسار …

تخيلوا شفت طابور اللي يطلبون من المطعم أطول من طابور اللي صافين للغسيل !!!
و كانت الساعه حوالي 2:00 الظهر يعني مستحيل حد ياخذ فطور في هالحزة .. قلت في خاطري انا و ختيه حراام انحط في ذمتنا أكيد انهم اجانب و مش مسلمين .. بس بصراحة الصدمة الكبرى ان كان من بينهم "مواطنين" و بكل و قاااحة يطلبون و ياخذون الاكل جدام الخلق عاادي …
ولا اللي قهرني زيادة واحد كان منزل الجامه و بوقاحة مواطن وياه وحده مادري اجنبية و لا عربية وضحك و سوالف طبعاً مبين انها لا اخته و لا حرمته و لا اتصيرله اصلاَ …
و الله نحن البنات و عندنا عذر شرعي .. و نستحي ناكل جدام خلق الله .. مع اننا ما علينا حرج لو سوينها … و الشباب عاادي ما يستحون يعني رياييل و كل واحد بعد ما يروم ايصووم ؟!!!!الا شهر واحد !!

و غير هاا واحد ظاهر اشكره من "الواحة" و يبطل غرشة عصير … من الغيظ اللي فيه قلت بتصل فالشرطة و ابلغ عنهم بس والله استحيت ما عرفت شو اقول …

المهم عقب سرنا صوب المارينا و الا اشوف دورية الشرطة جدامي قلت بخبرهم ما رمت اسكت الا اسوي شي ..
جان اقول للشرطي: ياللي ياكل في نهار ارمضان يتخالف ؟؟
قال لي: إذا مسلم، ينحبس …
قلت له: شباب مواطنين …!!!
قال لي: (احسه استغرب) ليش ما بلغتي ..؟؟
قلت له: ما كنت ادري..
قال: خلاص نحن بنتصرف ..

و بس .. كان خااطري اسير اشووف شو سووا بهم …

الخلاااصة بنات: احس شبابنا وصل فيهم الاستهتار لدرجة التساهل و التهاون في العبادات المفروضه .. و فوق هااا فالعشرة الأواخر من الشهر الفضيل .. الواحد المفروض يكون أقرب لله فالطاعات و العبادات ..
و الله ما ادري شو اقول من القهر .. الرسول الكريم عليه الصلاة و السلام قال: ( من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه ، وذلك أضعف الإيمان ) رواه مسلم .

خواتي إذا شفتوا حد يشرب أو يأكل في نهار هالشهر الفضيل لا تتردوون اتبلغون الشرطة عسب يادبونهم ..