طبعا اول مره اشارك هنا بقسم الطبخ طبعا وهذا يعتبر انجاز… وان شاء الله اختياري هذا يعجبكم
واذا ربي راد راح انزل لكم اكلات سعوديه… وان شاء الله تعجبكم اكلاتنا…. عاد احنا هنا بالسعوديه كل مجتمع وله طريقه بالكبسه وفي اسماء كثيره للكبسه منها البخاري .. والمندي … والمضغوط والمثلوثه …والزربيان والكابلي وهذا النوعين مشهور فيه اهل الغربيه عندنا… والسليق واسماء اخرى كثيره ما ادري يمكن البعض يعرفها منكم >> طولتها وهي قصيره بس علشان افيدكم عاد كل شيء مني حلو >> واثقه 
المقادير على طريقتي وهذي الكميه تكفي تقريبا 3 اشخاص عاد كل واحده تزيد في الكميه او تنقص
بكيفها..
دجاج او لحم على حسب الرغبه
2 كوب رز انا استخدم نوع اسمه كلاسيك عنبر او المهيدب
1 بصله مقطع قطع صغيره
1 طماط مقطعه قطع صغيره
1 فلفل رومي مقطع قطع صغير
2 فلفل حار مقطع قطع صغيره علشان ما تقدرون تأكلون الطبخه امزح وياكم خلوه مثل ماهو لا تقطعونه
نص ليمونه مقطعه ارباع
2 ليمون اسود
3 ملاعق من صلصة الطماط
زيت اذا كان راح تحطين لحم لا تكثرين حطي شوي لانه اللحم ما يحتاج له زيت واجد
بهارات مطحونه مشكله في البعض يحب يحط البهارات الغير مطحونه مثل الهيل القرفه القرنفل ورق الغار انا احب احطها اذا سلقت الرز لوحده
ملح
للتزيين صنوبر وزبيب وبصل مقلي
الطريقه
اول شيء تجيبين قدر الضغط او قدر عادي براحتك وتحطين فيه الزيت وتخلينه لغاية ما يسخن الزيت شوي
بعدين تحطين البصل وتخلينه لغاية ما يصفر لونه بعدين تجيبين الفلفل الرومي والفلفل الحار والليمون بنوعيه الاسود والاصفر والبهارات
وتخلطيهم مع البصل لفتره بسيطه بعدين تحطين الطماط وصلصة الطماط وتخلينهم شوي يتسبكون مع بعض بعدين تحطين الدجاج او اللحم وتخليهم مع بعض
لمدة نص ساعه مع التحريك المستمر بعدين حطي مقدار الماء اللي تحسين انه راح يستوي منه سواء اللحم او الدجاج و اتركيهم لغاية ما يستوون
واذا استوت طلعيهم في صينيه وحطي عليهم شوية ملح وبهارات وحطيهم في الفرن لغاية ما يتحمر لك الدجاج او اللحم
طبعايكون الرز مغسل ومنقع بماء دافي من قبل مدة 30 دقيقه تروحين تأخذين الرز وتحطينه على مرقة الدجاج او اللحم حاول ان الماء يكون متساوي مع الرز
يعني لا تكثري ماء على الرز لانه منقع فما يحتاج له ماء كثير يا دوب اللي يغطي الرز بعدين غطيه وخليه لغاية ما يستوي الرز
بعدين حطيه في صحن التقديم مع الدجاج او اللحم وزينيه بـ الزبيب والصنوبر والبصل المقلي وقدميه مع السلطه المشكله وعليكم بالعافيه
خاطري كان صورته وصورت الطريقه بس يبيله وقت بحاول اذا قدرت مره ثانيه
ها شو رايكم بطريقه الكبسه السعوديه صدقوني ولا ابسط من هيك وإلا شو رايكم انتوا ؟؟!!
ملاحظه
احيانا احط مو دائما مع البصل والفلفل الرومي في البدايه بطاطس وكوسه وجزر مقطعه تقطيع متوسط وتطلع رووعه بس من باب التغيير ..
تعبت من الكتابه..
اختكم…
هتون الامل
انشاء الله اليوم اذا طبخت بطبخ
هل الكبسه اي رز او الرز المحدد
اليوم ما رحت للجامعه خليني اسوي لهم
طبخه ويسكتون عني تعرفين طبخه
حلى سهله موفره مكوناتها في البيت
احلى كبسه اكلتها في فندق الهيلتون فالمدينه المنوره عذااااااااااااااااااب
تسلم ايدك على الكبسه الغاويه