عريسنا الأول ومب عارفين نتصرف

الله يكتب لكم كل خير
حبيبتي أول شي تتصل الأم بالأم تتنشد عن البنت اذا مخطوبه والا لا ؟ بعدين يحددون موعد الزياره علشان يشوفون العروس وبعد يعطون اهلها اسم معرس الغد يتنشدون عنه وترد عقب اسبوعين تتصل لهم تشوف اذا سألوا عن الولد ووالا بعدهم يبون وقت زياده واذا وافقوا يحددون موعد زياره الرياييل الرسميه يعني الخطبه وهاك الوقت يسألون الاهل اذا بيوافقون هلة الشوفه ,, طبعا الحريم يكونن متفقات على كل شي الرياييل حليلهم بس واجهه اجتماعيه

وممكن مايزورونهم الا بعد ماتكون فيه موافقه مبدئيه ويكونون اهل العروس سألوا عن الولد ويسيرون الحريم والرياييل رباعه يحدوون المهر وموعد الملجه

في الزياره الرسميه لازم تشل ام المعرس على ام العروس هدايا للعروس وامها على الأغلب يعني شي يبيض الويه مثلا قطع مناسبات حلوه أو مخاوير – ساعه حلوه – خواتم – او طقم بسيط – عطور وكريمات جسم وتحطهم في مندوس يماله يعني