علاج زوجة في مهب الريح

السلام عليكم ورحمة الله وبركاته

اشحالكم خواتي

تعبت من الدنيا ومن الحياه واباكم اتساعدوني وتوقفون معايا ….

راح ابدا اكتب لكم اليوم عني انا من اول زوجي لين اليوم وعن اول طريق اتخذته في تغير وضعي اللي تعبت منه …..

اول ما خطبني زوجي كان اكبر مني بوايد اكثر من 12 سنه وكنت توني مخلصة الثانوية واول سنه في الجامعه معروفه بحبي للموضه والتعارف اجتماعيه والكل يحبني وفرفوشه ، بداية رفض الوالد بسبب فارق العمر لكني كنت مصره اني اتزوج منه لاني كنت اشوف ان فارق العمر هذا بيكون سبب سعادتي وان الزوج لما يكون اكبرمن مرته راح يدللها ويسعدها وتميت احاول مع الوالد لين وافق واتزوجنا زواج تقليدي ….

المهم من اول يوم العرس واشوف زوجي ما يعجبه شي فيني اي شي البسه يقولي غلط البنطلون ممنوع حتى لو تحت العبايه القمصان غلط لا تلبسين الا هاي نيك ولازم وسيع التنورة تلفت الكندوره فتحت الصدر وسيعه الكعب ممنوع الميك اب ممنوع كل شي لازم استاذان وكل هذا وانا اقول حاضر وان شاء الله واللي تامر فيه … وقتها كنت ما ابا المشاكل وكنت ابا استانس معاه وبس ويوم يزعل مني اخاف واحس ان الدنيا توقفت …

كان ماجر شقه وقعدنا فيها اقل من سنه وبعدها رجعني لبيت اهلي وسافر لدراسته تميت 7 سنين في بيت اهلي يجيني بالسنه مره وحده وما يعطيني الا 500 درهم لانه يحتاج للفلوس في دراسته وبعد 4 سنوات يوم حملت زاد المبلغ 1000 درهم بس وانا ساكته واقول حرام زوجي وفي الغربه ولازم اقدر وضعه تخيلوا يا بنات ما كان يتصل فيني انا اللي اتصل عسب ما يخسر وراتبه وقتها كان تقريبا يوصل ال 30.000 هذا غير المنحه الدراسيه !!!!!!

رجع زوجي من السفر واجرلي بيت واشتغلت ولله الحمد براتب تقريبا يوصل ال7.000 درهم بينما زوجي الغالي وصل راتب لل 70.000 درهم وفتح بيت ودخلنا عيالنا مدارس خاصه وكان يصرف على القد بالضبط يعني للجمعيه للمول الاشياء المهمه جدا واحيانا كثيره يقولي روحي مع اهلج عسب ما يدفع وطبعا انا ما يحقلي ولا درهم لاني موظفه …

تم حبيبي وزوجي الغالي ايمع بالفلوس وانا ساكته وما اطالبه باي شي ويوم اجي واحتاج وايد واطلبه اطلبه من بعد سنه يمكن 1000 درهم يعطيني بس يسال ليش ؟لا ويقولي كم ميمعه من راتبج لين الحينه !!!! يعني من الله ما تصرف عليه وبعد تباني ايمع من راتبيه ؟؟؟اقوله ابا سياره للبيت يقولي لا اخاف عليج من السواقه طيب حطلي دريول يقولي لا ما ادخل ريال البيت طيب جيب دريوليه يقولي مش محصل وكل ما احصله حرمه يكلمها يرد يقولي ما تنفع (((( خلو بالكم خواتي تراني اروح الدوام وارجع بسيارة اهلي ودريولهم حتى عيالنا سيارة اهلي توديهم واجيبهم ) طيب وين كلامك ما تبا ريال ؟؟!!!))))) صبرت وقلت يالله اهم شي ان عيالي في حضن ابوهم ويتربون في عايله احسن من يتربون نصهم عندي ونصهم عنده …..

لين صار اللي خلاص ما عدت اقدر اني اتحمله …

وللبقية حديث

لا حول ولا قوة الا بالله .. الغاليه ما شاء الله ريلج وضعه الحمدلله ممتاز

نصيحتي زني فوق راسه اذا بغيتي شي حد من الريايل اذا يبا يفتك من الزن يعطيها اللي تباه وانتي ما طلبتي الا للضروره

ولا تعودين اهلج يساعدونج في المستقبل لانه بيتعود ما يسويلكم شي

الله يكون فعونج لهدرجه في ناس طيبه ؟؟!!!!!!!!!!!! ترى طيبتج زيادة عن اللزوم يالغالية واحنا في زمن ما عاد تنفع فيه الطيبه الزايدة ولا تقولين ريلي وبوعيالي حنا في زمن ياللا نفسي

اكمل معاكم يا حلوات ….

بعد كل التنازلات الهبله اللي قدمتها للحبيب وبعدني اقدمله التنازلات هذي شوفو شو صار …

اول شي جاء وزن على راسي ان لازم نطلع من البيت ونسكن عند اهله لان صاحب البيت محتاج لبيته وهو مستحي منه ، ووقتها كنت اعاني مشاكل وضغوطات في العمل ما قدرت اني اركز في الوضع فوافقت بعد ما قالي انها مسالة 3 اشهر بالكثير وننقل لبيت ثاني لين ايحصل بيت وفي غضون اسبوع واحد كنا ناقلين لبيت اهله …
وهناك عطونا غرفة وحده اظمني انا وعيالي تخيوا ….وفوق هذا زاد زوجي شغله وصار يشتغل الصبح والمساء يعني يطلع من البيت الصبح الساعه 7 ويرجع البيت المساء الساعه 10 وعلى طول على الفراش ما اشوف ويهه !!!!

وجت المدارس وحبيب قلبي بعده عنده مبلغ يوصل لل50.000 يدفعه للمدراس جاني بكل عصبيه وانتي ما تحسين بعيالج وعيالنا بيختربون ولازم اوديهم مدرسه حكوميه ولوع جبدي لين وافقت ابا الفكه من زنه وارفه وطلعهم مساكين من المدرسة الخاصة اللي كانت درجاتهم عاليه فيها لمدرسة حكوميه مافيها اي اهتمام …….

نفسيتي صارت ما تنطاق كيف اعيش وكيف اتصرف مع انسان مادي لهذي الدرجه حرمني من كل حقوقي :
الماديه ما يصرف ولا عليه اي التزامات واحلف بنات دخله شهريا يوصل ال 100.000 درهم هذا اقل تقدير .
النفسيه ما في اهتمام اصلا ما في رمسه بس يتامر وينتقد لدرجه اخاف اتخذ قرار يخص احد من عيالي او يخصني انا اخاف اطلع من دون ما اقوله حتى لو بمشي عدال البيت اخاف اوافق على رحله بيروحونها اليهال ولازم يعرف كل اصغيره وكبيره في البيت مع اني ما اشوفه وربي ما اشوفه باليوم الا 5 دقائق وان كثرت ربع ساعه …
الجنسيه مافي اي تواصل بيني وبينه وما اعرف الاسباب مع اني بالرغم من هذا كله مهتمه بنفسي واغير لوكي وجميله بشهادة الكل والكل يمدحني جدامه ….

وصلت لمرحلة بنات مش قادره اتصرف معاه ولا عارفه واخرتها شو واهليه كل ما ارمسهم يقولون لي صبري وهذا ريلج وانتي اصلا اللي عودتيه على جي ..
الكل شايف اني خايفه منه حتى انا احس فعلا انا خايفه منه بس شو الاسباب مدري!!!! طول الليل امس وانا افكر ومش مستوعبه الوضع اللي وصلتله بنات مثل اللي كنت نايمه وصحية فجاة من النوم …وقررت قرار اتمنى من ربي ان يكون فيه العلاج السحري لمشكلتي واللي هو

((((مركز ****** للاستشارات الاسرية))))

هيه بنات انا قررت وفعلا اتصلت امس وخذت موعد اليوم الساعه 8 الصبح ورحت الموعد وقلت كل الكلام اللي كتبتلكم اياه فوووق …..

وتعالوا معايه بعلمكم الرد

اشكرج على الرد حبيبتي بس انا طبيعتي جي ما اعرف اطلب او ما تعردت اطلب وهذا شي غلط المفروض الوحده تتعلم كيف تحافظ على حقها ولا بتضيع وبتضيع عيالها معاها

اشكرج على الرد حبوبه

والله غمضتيني في أنواع من الأزواج الله يهديهم يقهرون بصراحة ما يطعون الحرمة حقوقها أنا أتريا شويصير معج أختي وأن شاء الله هالخطوة تغير حياتج لأحسن .