شحالكن خواتي
اليوم يايتنكم عسب اخبركم قصه ولادتي لبنتي الميتة … الله يعوضني ان شا الله
سبب كتابتي لهالقصة لاني مابي اي وحدة تغلط الغلطة اللي غلطتها واللي كلفتني اني خسرت اغلى شي كنت اتمناه … سبحان الله كانت غلطة بسيطة لكن ثمنها غالي وايد
فالبداية انا عروس يديدة وحملت من ثاني شهر من العرس والحمدلله اموري كلها كانت تمام من بدايه الحمل وسبحان الله حتى وحامي كان خفيف وما تعبت منه وايد يعني ما كان في اي ترجيع لدرجة ان ريلي شك اني حامل هههههه اللهم طول الوقت خاطري ارقد وهالشي كان مخليني كسلانة طول الوقت … المهم عدت الشهور الثلاث الاولى على خير واطمنا ان الحمل استقر كنا انراجع فعيادة خاصة عند دكتورة للاسف الكل يمدحها وسمعنا دقات قلب البيبي وهالشي ريحنا اكثر واكثر … فالاسبوع ال16 سرنا المراجعه والدكتورة خبرتنا اني حامل ببنت … فرحنا وايد واول ما طلعنا من العيادة بشرنا اهلنا كلهم لان كلهم كانوا متحمسين لهالبيبي …. مرت الايام عادي ومن تقريبا اسبوعين كانت يايتني كحة وكانت متعبتني فالليل لاني ماقدر ارقد بسبتها … فقلت لامي اني بسير العيادة الحكومية على اساس يعطوني دوا يخوز عني هالكحة .. دخلت عند الدكتورة وقالت صعبة اعطيج اي شي بسبت اني حامل قالت لو تبين ممكن اشيك لج على البيبي بالالتراساوند قلتلها اوكي … على اساس اني مشتاقة لبنتي وابغي اشوفها … وقتها كنت فنص الشهر الخامس وكنت مستغربة ليش للحين ما حسيت بحركة البيبي … دخلت الغرفة وسويت الالتراساوند وسبحان الله سمعت نبض البيبي والدكتورة قالت لي انها نايمة طمنتني على كل شي بس اللي خوفني انها قالت لي ان ماي الجنين ناقص شوي … وقالت لي يوم بتسيرين عند الدكتورة اللي تراجعين وياها هي بتقولج شو تسوين وطلعت من عندها
الاسبوع اللي طاف كان عندي موعد وكان يوم الفاجعه … سرت العيادة انا وريلي وكنا متحمسين … دخلت عند الدكتورة ولما رقدت عسب تسويلي الالتراساوند اول ما حطت الجهاز على بطني اشوف ويهها تغير وتقولي شو هذا … خفت قلتلها شو قالت البيبي موت ….حسيت وكأن حد جلع قلبي من مكانه … تميت اصيح والممرضات يحاولون يهدوني … سألوني اذا ريلي موجود وبالغصب قلتلهم اسمه ونادوه دخل مسكين وهو منصدم من صياحي … الدكتورة خبرته بالخبر وقالتله لازم تآخذها الحين المستشفى عسب يعرفون شو سبب موت الياهل … يا ريلي صوبي يحاول يهديني وطلعنا من العيادة ونحن فحالة صدمة
كنا مب تارفين وين نروح او شو نسوي … ريلي سأل اخوه وقاله خذها مستشفى خاصه ورحنا وفي الطوارئ كان زحمه وطولنا شوي لين ما دخلنا عند الدكتورة … سويت الالتراساوند مرة ثانية لعل وعسى نسمع اي نبض او اي شي يعطينا امل ان البيبي حي لكن الدكتورة قالت ان البيبي صار له اسبوعين ميت فبطني …. وهذا الشي اللي خوفهم لانه ممكن يسببلي تسمم او اشيا ثانية فالدم … ونقلوني بسرعه على غرفة الولادة وقالولي بتمين هني لين ينزل الياهل… خلال ساعتين سوولي تحاليل وعطوني مغذي وفيه طلق .. واكتشفوا ان دمي كان نازل وايد ووصل 6 وهالشي كان خطير وللاسف الدكتورة اللي كنت اتابع عندها ما طلبت مني التحاليل الا فالشهر الرابع ولما سرت لها النتايج بعدها ما كانت واصلة لان احتمال بعد ما ينزل الياهل يصيرلي نزيف وممكن اروح فيها … فالمستشفى قالوا لازم نحولها لمستشفى حكومي عسب ينقلولي دم
وسرنا المستشفى الحكومي ويا ليتنا ما سرنا … اولا المكان استغفر الله ما يوحي انه مستشفى ثانيا الممرضة اللي كانت رافعه ضغطي لاني كنت تعبانة على اساس ان الطلق بدا وياي …. هذا غير الدكتورة حسبي الله عليها شافتني وقالت انا مآقدر اسويلها شي غير اني اعطيها مسكن ورجعوا البيت واليوم الثاني تعالوا بنسويلها التراساوند ونتأكد اذا صدق. البيبي ميت والا لأ وعقب يوم اللي بعده بنحولها على الدكتورة النسائية وهي بتشوف شو بتسوي .. قلنالها ليش تترين لين ثاني يوم نحن يايبين تقرير من المستشفى الخاص قالت والله انا مآخذ تعليماتي من مستشفى خاص اهلي قالولها لو صار نزيف وهي فالبيت ودمها ناقص شو بنسوي قالت هذا قضاء الله وقدره … وقتها ريلي عصب وقالي خلونا نطلع …. واضطرينا نسير مستشفى خاص فإمارة ثانية …. خلوا الدكتورة اتيي مع ان الوقت كان متأخر وطمنتنا وقالت انها بتعطيني تحاميل كل 4 ساعات وفنفس الوقت بتنقل لي دم … على الساعه 6 الفير حطولي اول تحميلة وكان الالم فظيييييييع يوم ادخلها داخل رحمي … كانوا يسألوني اذا في الم وكان الم شرات الدورة بس كان بسيط وعقب فترة كان يخف …. الساعه 10 الصبح حطولي وحدة ثانية ونفس الحالة … عقب ع الظهر تقريبا حطولي مغذي وفيه طلق … وهني بدا الجد … بدت الآلآم خفيفة وع العصر زادوا الجرعه لين 150 وبدت الويع يزيد اكثر واكثر كان كل دقيقتين واهلي وريلي كانوا وياي يحاولون يخففون عني شوي … عقب ساعه زاد الالم اكثر لدرجة ان بين الويعه والثانية بس دقيقة طلبت مسكن لكن ما طاعوا وخذوني على غرفة الولادة وقتها كان الالم ورا بعض بس المشكلة ان الرحم ما كان فاتح كامل واضطرت الدكتورة توسع لي بإيدها وكان الم لا يطاق … كنت اصرخ صراخ فحياتي ما صرخته لدرجة ان امي الله يخليها لي ما قدرت اتم برع ودخلت غصبن عن النيرسات … الدكتورة قالت لامي انهم مضطرين ينزلوني العمليات لاني كنت فحالة ما تتحمل اي تأخير وقالت احتمال اذا نزلوا البيبي ممكن ينزل مقطع واذا استعصت الامور بيضطرون يشقون بطني ….. وقتها قلت لهم سووا اللي بتسوونه المهم ريحوني و راحت الدكتورة ويابوا الاوراق لريلي عسب يوقعها ويابوا السرير عسب ينزلوني للعمليات فهالوقت امي فديتها تمت تكلمني وتقولي ساعدي عمرج وحاولي تنزلين البيبي وتمت تقولي عسب ادفع وسويت اللي قالته لي مع اني كنت منتهية من التعب والالم وغير جي كانت الدكتورة معطتني مسكن … دفعت مرة وحسيت ان شي بينزل دفعت المرة الثانية وحسيت ان نص البيبي طلع قلت لامي وتمت تقول للنيرسات بس هم مب مصدقيني … لين ما يت الدكتورة وشيكت و شافت البيبي نازل قالت الحمدلله … هاي رحمه من ربي عسب اني ما اتبهدل فالعمليات … عقبها قالت لي ادفع مرة ثانيه عسب المشيمه وطلعت كاملة الحمدلله … وقتها ارتحت و ما حسيت بعمري كنت اسمعهم بس ما كنت اقدر ارد عليهم .. فالوقت اللي كنت راقدة شيكوا بالالتراساوند والحمدلله ما احتجت ان يسوون لي تنظيف ونقلوني لغرفتي وانتهت معاناتي
ادري طولت عليكم بالسالفه بس هدفي اني انبه كل حامل انها تحافظ على صحتها ولا تهمل ادويتها والفيتامينات بعد مهمه … سووا الفحوصات والتحاليل كل شهر … واذا حسيتي بأي تعب على طول روحي للدكتوره لانج ما تعرفين فأي لحظة شو ممكن يصير واذا كان اول حمل لج اسألي عن الفحوصات والتحاليل اللي لازم تسويها الحامل … وفاة بنتي كان بسبب نقص الدم عندي اللي كنا ممكن نكتشفه لو كنا مسوين فحص الدم بس الله يسامح الدكتورة والحمدلله على كل حال
دعواتكم لي ان الله يعوضني عن بنتي و يصبرني ع فراقها
و هاي طير فالجنه تشفع لج و لابوها
اممم اختي انا فيني فقر دم و يوصل ل٦ مرات
وابا احمل
شو لازم اسوي!
مع اني خذت فتره حبوب حديد عشان تزيد الدم
لكن بعد ما خلصتهم رجع دمي ونزل !
هاي عصفورة الجنه
وبتشفعلج انتي وبوها انشالله
والله يعوضكم انشالله
واذا بتحملين مره ثانيه لاتروحين
عند الدكتوره اللي قبل شوفي وحده
احسن اذا انتي في بوظبي روحي هيلث بلس