انا عضوة قديمة هني كنت اكتب ف هالمنتدى من قبل ما انخطب .. و يوم انخطبت.. و تزوجت .. و انفصالي .. و بعد طلاقي
طبعا الفترة الأطول هي طلاقي المؤلم
من فترة استوعبت اني كملت 3 سنين مطلقة و حزنت على نفسي وايد
في هال3 سنين الحمدلله الله سهل اموري و كملت دراستي و الحين اشتغل
و في هال3 سنين بعد تقدموا لي 2 .. اول واحد انسحب فجأة من نص الموضوع و الثاني أهلي رفضوه من غير وجه حق و انا للحين مب قادرة اسامحهم فيه لانهم قطعوا رزقي و الريال ما عليه عيب
في هال3 سنين .. محد رحمني.. لا الجيران و الا الناس و الاهل .. الاهل خانقيني بكل شيء بطلعاتي و دخلاتي و بلبسي و كل شي
و الناس ما يخلوني انسى.. كل ما اسير عزيمة او عرس او حفلة يذبحوني بالأسئلة " ها ليش تطلقتي؟ " " ليش مب عايبنج الريال" و انا اكتفي بقول انه " نصيب" و محد عارف سبب الطلاق الحقيقي الا امي و صديقاتي المقربات بحكم اني ساترة عليه و ما اريد افضحه عند الناس
نصيحتي لكن يا بنات ( اصبري على مينونج لا اييج اللي اين عنه ) و ( نار زوجي و لا نار هلي )
الاهل ما يرحمون البنت لي تطلقت بالعكس يتعبونها و يخلون حالتها النفسيه تتدمر و بكرا و لا حد بيسأل فيج
و ما اقول غير .. ربي اجرني في مصيبتي و اخلف لي خيرا منها
الله كريم
و يرزق كل مطلقة و عانس و ارملة ان شالله
مجرد فضفضة
تحياتي لكن
لكن لا تنسي في النهاية هذا قضاء وقدر ولازم نرظى فيه ونكون اقوى من مجتمع تعبان
الله يعينج و يصبرج و لاتتعبين نفسج و طنشي و عيشي حياتج اللي ماحترم و تدخل بخصوصياتج لاتحترمينه سمعي السؤال و طنشي ممكن تقولين صعب بس هم ماصعبتي عليهم و سالوج
الله يعوضج خير و يرزقج كل ماتتمنينه
بس اني اعتب على هالمجتمع المتخلف
ناس وصلوا القمر واحنى لسى تفكيرنا راكد
استغرب صراحه من الناس
ياخي اثنين اجتموا ع سنة الله ورسوله وشافوا ان الطبعتين تختلف وماتتناسب
وانفصلوا
مب غصب الوحده تعيش مع واحد لو ميته تعب منه عشان ترضي الناس
اللي ماشفنا من وراهم الا البلا والهم
نصيحتي اختي
ﻻتعقدي نفسج .. واسمحيلي اهلج جزء من مجتمع فاشل
انا عن نفسي اشوف الحياه مب ريال
الحياه عيال ، الحياه دراسه ، الحياه عمل ، الحياه اهل
الحياه الانسان نفسه
اسال الله الكريم رب العرش العظيم ان يكتب لج نصيب
مع واحد يقدرج ويعوضج كل اللي مريتي فيه يارب
ورحمته شملت كل شي وهو ارحم من الام وارحم من الاب
انا مرات يجيني الشيطان يوزني وااسبة خلافاتنا مع اهله وتدخلاتهم البغيضة
بس تقولي تمي كلمتين تفر راسي فررررر
وفعلا كلامج صح الاهل نااااار بعد الطلاق والحريم يتحاشونج وووو
لن عندي وحده من صديقاتي مقربة تطلقت بدون دخول واكلوها النااااس
وعقب ثلاث سنين عرست وخلفت