يسعدني أنــي اشارككم مشكــلتي وانشاء الله القالها حــل عندكم….
انا واعوذ بالله من كلمة انا ..اجتماعيـــة بدرجه ماتتخيلونها يعني ارابع من الجنسين للعلم اني متخرجه من مدرسة خاصه وعلاقتي مع الشباب زمالة اخوه لا اكثر وكان فيني طبع من ايام المدرسه ما احب ارابع الا الشباب واذا كانوا بنات لازم زلمات نادر ما اتعرف على مواطنات …المهم خلاص كبرنا واخرجنا وافترقنا وانا دخلت الكلية وطبعا اضرييت اني اعرف على البنات المواطنات ….
وتعرفت على شلــة وايد كبيرة وفنانات ووناسه كل ضحك ما شي زعل ولا شي …وعقب اكتشفت ان هاي الشلة الله يهديهم يرمسون عن بعض ويفتنون وغيره من هالاشياء المهم انا ابتعدت عنهم وتميييت لمدة سمستر بروحي وفي حالي ومااحب ارابع حد …المهم نزلت انا دبلوم في كلاس بعد حلو وفنان ( انا من النوع اللي احب الفن وايد وفي نفس الوقت اجد نفسي ذات شخصيه قويه) تعرفت على بنت وكانت هاي البنت وايد تتعدل وجي وحبيت استايلها لاني انا احب اللي من استايلي
المهم استوت اكثر من ربيعتي وعرفتني على شلتها وعلى ربيعاتها وكنا نطلع مع بعض ونسير ونرد والحياة حلوة وكل شي بخييير….
يت فترة بعد تشتت هاي الشله بس انا تميت معاهم كلهم يعني هم ما يرمسون بعض بس انا ارمسهم كلهم المهم نفس الشي يرمسون عن بعض وما اعرف شو انا راسي ورني وكل وحده اطلع بلاوي الثانيه ….ما علينا الحين هاي البنت اللي استوت هي اكثر م ربيعتي كانت بينها وبين وحده من بنات كلاسها مصلحه في شي (ما اقدر اذكر هالشي) المهم شي مب زين وايد مب زين وقامت تتغير عليه شوي شوي طلب من هذيك البنت وانا دايما اسألها شو الي صاير كل ترمسن بدوون نفس وانا اول مره انهار عشان وحده ومب اي وحده ..وحده عديتها اكثر من اختي وما اعرف شو ياها مره وحده قالتلي اذا تبين ترابعيني لازم تتحجبين وما تسمعين اغاني وما اعرف شو
قلتلها هالشي ايي من اخاطر وايي شوي شوي مب بسرعه ومره وحده المهم كملنا 6 شهور على هاي الحاله وايد تتجاهلني وترمسني بطريقه مووول مش حلوه وتقولي انتي لانج كنتي على علاقه بشباب المدارس مش قادرة تتأقلمين معايه ……
انا تعبت من كثر ما ارمسها وانا عمري ماسويت هالشي مع حد والكل يقوي خلها تولي تزوووول شو يعني تنفد وحد يقولي عامليها بالمثل بس انا ما اقدر
انتو شو تقولولي …..بليييز ابي مساعدتكم لاني خلاص بديييت اتعب نفسيا؟؟؟
واللي ما يباك لا تصيح تباه
واللي خلقها خلق الف احسن عنها
مابي اذمها او اقول كلام جارح فيها
لاني ما اعرف البنت بس ما احب نوعية
البنات اللي يتغيروون بسبة مصالح
سوي جدول بالاشياء الحلوه اللي فيها واللي مب اوكي وقارني مابينهم
ثاني شي حاولي تعرفين المدة اللي تغيرت عليج وحاولي تيلسين معاها تتواجهينها شو اللي مغيرها عليج
لو ماعطتج جواب مقتع هني أنتي سحبي منها مؤقت لمدة معينه وشوفي هي اللي راح تسأل عنج مع الوقت
بس ولا تذلين عمرج لها اذا ربي صرفها عنج فهو خير لج وربي يعوضج بصديقه أفضل عنها والسموحة .
عزيزتي ف البداية حابة اقولج شي ، اذا انتي تخلصتي من علاقتج بالجنس الآخر ف هاذي نعمة من الله سبحانه و تعالى بحد ذاتها..
الامر الثاني : انج لقيتي شخصية شراتج ، و جريبة منج وايد بحيث انج انتي عديتيها شرات الاخت و زود ، هاذي بحد ذاتها نعمة من الله…
دايما حاولي اتشوفين الجوانب الايجابية في علاقاتج مع الناس ، و من جهة ثانية حاولي اتسلطين الضوء على الجوانب المظلمة عشان اتعرفين الي يستوي حواليج ، هل هوه ينصب في مصلحتج و مصلحة غيرج او انه بيظرج و ما بيفيدج ف شي؟..؟
و بالنسبة لربيعتج ، يمكن هيه تعبانة نفسيا بسبة شي مستوي و مظايجنها ، و بدت اظهر ظيجها و عصبيتها عليج بما انج جريبة منها وايد..
حاولي تيلسين وياها و اترمسينها عن سبب التغيير المفاجئ الحاصل بينكن ، تناقشي وياها ، واجهيها ، اذا لج حق خذيه بالطيب و باسلوب حسن ، و اذا انتي حسيتي انج غلطانة ف شي اعتذريلها و بتعتبر هاذي شجاعة منج ، و اذا هيه غلطانة او انتي حسيتي انها غلطت بحقج قوليلها ما عليه هب مشكلة كلنا نغلط و نتعلم دروس وايدة من اخطاءنا ، لكن ما ييلس الواحد يتعامل بقسوة و جفاف مع انسان جريب منه…!!
فهميها انج هب زعلانة منها و انج جريبة وايد و انها غالية عليج و ما يهون عليج انج تفارقينها و السبب هين…!!
الله يصلحكن عزيزتي و لا تكدرن بخاطركن ترا الدنيا دنية و ما تستاهل الظيجة و التعب و النكد و الهموم و الاحزان ، دورو ع الجوانب الايجابية و ان شا الله بتلقون سعادتكم فيها…
الله يحفظج من كل شر…اتحملي بعمرج عزيزتي…
اختج :
/
د.حصــــــة الظــــــاهـــــري