مشكلة ربيعتي مع زوجها والغيرة من تلفوناته ودوامه

هلا بنات بغيت أستشيركم في مشكلة ربيعتي وزميلتي فالدوام هي توها مالجة، من كم شهر والظاهر حبت ريلها، المشكله إنها وايد شكاكة وقلبها ياكلها من أقل شي، يعني هي حاليا موظفة ووياي في نفس القسم لو تشوفونها قامت ما تركز في شغلها، كل شوي تتأفف أقولها فلانه شو فيج، تقوللي ماشي بس إتصلت به ومارد أو ما طرش مسج وما رد على مسجي أو تأخر في الرد، قلتلها إعذري يمكن مشغول، ما يفيد وياها الكلام، تيلس تقوللي أنا شو ضمنني منو يكلم، أنا أخاف يرمس حد ولا يكلم بنت في الدوام، ولا بتقولي أخاف إن شاف وحدة من العملاء وتعرف عليها وقامت تتصل له، هي من النوع واايد تغار، ماعرف شو الحل نصحتها قلتلها إوثقي فيه، تقول حتى لو أوثق أنا ما أسأله عشان ما أبين له إني أحرسه، بس واضح من تصرفاتها كله تسأله بطريقه مباشرة و ين كنت أو شو كنت تسوي أو ليش تأخرت في الرد عليه البارحة وهو يقولها أعذار عادية ، قلتلها إذا إنتي ألحين بهاي الطريقة شو بتسوين لو باجر تزوجتو بتيلسيله على الوحدة تشيكين على الموبايل وتشكين وتتخيلين اشياء، تقوللي أنا طبعي الغيرة ووايد أغار عليه من بنات الدوام اللي وياه..ماعرف شو أقولها كيف أقدر أهديها وأخليها تنسا مشاعر الشك والغيرة، وهل هالشك بعد بيزيد ولا بيخف بعدين أحس بها تغيرت وايد والله ودي أغير من هالشي لان مضايقتني ومسوتلي توتر من هالغيرة والتصرفات، قمت أشك إنها ممكن تسير له الدوام تشيك شو يسوي.. ماتتخيلون تغار عليه حتى لو سار مستشفى وكلم ممرضة ولا لو إتصل يحجز في عيادة تقوللي ماستحمل يكلم حد غيري، ظنكم هذا مرض ولا كيف..هي حلوة بس ماعرف لييش عدم ثقة ولا كيف،،بس هي ما تبينله هالشي تحاول تخش هالمشاعر جدامه..

بنات أنا كلمتها اليوم ونصحتها بعد ما قريت ردودكم..قلتلها شو السبب اللي مخلنج هالكثر تيلسين تحاتين وتفكرين وتشكين..قالت ان هي وايد تخاف أن يتركها أو يتزوج عليها في يوم من الأيام يعني تخاف يشوف وحدة تغريه ولا تسحبه يلست تقوللي إنتي ما تسمعين سوالف هالأيام من اللي يالس يستوي..قلتلها حاولي ما تفكرين بهاي الطريقة ولا ما كانوه الناس تزوجوا..الله يهديها

قوليلها لا توسوسين وايد
وخلي الامور طبيعيه الا لو شفتي شي بعينج
او شي قوي يخليج اتشكين
اما جيه بتمرض عمرها وبتكره الريال فيها

الله يهديها

الله المستعاان .. حبيبتي خل تحط نفسهاا بمكاانه !!

اذا هو شكااك ومسود عيشتهاا جيه شو بتسوي ؟!!

أكيد بتفكر بالانفصاال لان مااشي ثقه .. هيه ماا شكت الا وهي ماا تثق فيه

حبيبتي الحيااة الزوجيه لااازم يكون فيهاا الثقه و الشك يدمرهااااا فديتج

رمسيهاا واذا مااا اقتنعت فأنتي سويتي الي عليج والله يهديهاااا

الله يسعدكم عنوونااتي ^^