شحالكن بنات
في البدايه حبيت اشكر ربيعتي اللي مدحتلي منتداكم ومن عقب ماشكيت لها بعض المشاكل اللي نمر بها في مقر عملنا
ماوصلت وياها لاي حل للمشكله فقالتلي اعرضها عندكم هني عسب اشوف اراءكم المختلفه والاقرب للحل
بنات والله العظيم اني مب لاقيه اي حل لهالمشكله وهالمشكله انا سميتها مشكله مع انها مايخصها فيني بس نحن ترا كلنا في نفس الدوام يعني المشكله في وحدة من البنات اللي تداوم ويانا بس بما انها ويانا فاخاف المشكله توصلنا بسببها بطريقه غير مباشره
هالبنت الله يهديها لها حركات ويا بعض الموظفين اللي ويانا يعني يوم بتسولف وياهم ماتقول هاريال وعيب امزح وياه ببعض الامور اللمفروض ماتمزح فيها ويا الرياييل
يعني نحن في مجتمع محافظ واعتقد كل بنت اهلها علموها حدود الادب وعرفوها الصح من الغلط
بس هي الله يهديها دوم ردودها ويالموظفين توصلها لمزح لاشياء اقل ماتوصف بقله الحيا
وفوق ها كل موظف مخزنه رقمه عندها وتكلمه شرات ماتكلم ربيعاتها ماتقول هاريال وعيب علي ارمسه جي
انا مابقولكم مانصحتها اكثر من مرة ابين لها بطريقه غير مباشره ان عيب تمزح جدام الرياييل بهالطريقة وفي اكثر من موقف وجهتها وقلت لها بطريقه حلوة ان هالكلام ماينطرا جدام الرياييل بس ولاجني نصحت
وفوق ها دوم تتمشى ويا واحد من الموظفين اللي عندنا يعني يوم يكون مداوم دوم تدش عنده وتضحك وياه بصوت عالي ,, وتدش وياه مرات المكتب ويصكون الباب عليهم ,في بنتين عندنا يزاهن الله خير نصحوها ان مب حلوة اتم تضحك وياه عشان سمعتها هي ردت عليهن وقالت انها ماسوت شي غلط ومجرد رمسه وياه لااكثر ولا اقل!!
انا قبل يوم كانوا البنات يرمسوني عن حركاتها ويالموظفين كنت ارد عليهم واقول يمكن هي ها اسلوبها او انها ماتقصد شي وكنت دوم اتحرا تصرفاتها عفويه وماتقصد فيها شي لين وصلنا لهالسالفه الثانيه اللي شككتني فيها
مرة يتني هالبنت اللي ارمس عنها وطرتلي وحدة من البنات اللي تداوم ويانا وقالتلي عنها رمسه وانها دوم تيلس ويا موظف الفلاني وتضحك وياه وماتحب تداوم الا وياه
انا يوم طرتلي هالسالفه انبهت وقلت كيف انتي تسوين هالسوالف ويالموظفين وترمسين عن فلانه الفلانيه وتقولين عنها انها ترمس ويافلان وتضحك وياه
من طرتلي هالسالفه يابنات والله اني يلست بغصه وحيره مايعلم فيها الا الله
يعني انتي اللي كنت اتحراج تبين توجيه وع نياتج وماتقصدين شي ترمسين عن فلانه وشو تسوي
يعني انتي تعرفين الصح والغلط وتدرين ان اللي تسويه فلانه غلط فليش انتي تسوين نفس سواياها؟؟
من عقب ماطرتلي هالسالفه وانا متغيره اتجاهها حسيت انها تقص علينا وفتحنا لها قلبنا وصادقناها وهي صاحبة سوالف ومصخره ويالموظفين
اباكم توجهوني يابنات شو اسوي وياها
وانا اباها تعرف انا نحن مب مرتاحين لحركاتها وسوالفها
يعني نصيحه ونصحناها
بس بعدها ع نفس حركاتها ويالموظفين
ماعرف لشو تبي توصل بالضبط[/CENTER]
انتي عليج بالنصيحه عشان ماتاخذين اثمها بسكوتج
ماتطاعت ادعيلها بالهداية بعد شو تسوين هي كبيرة
وتعرف الصح من الغلط
احس مرات يوم القيامة قربت >< من حركات البنات
الله يهديهاااا بس حتا السمعه ماتخاااف منهااا برايهااا الغاليه اذاا مافاد وياها هالشي انتوا نصحتوها وسويتو
كل شي عليكم بس هيه شكليها ماتتقبل النصيحه يعني تسمع من اهنيه واطنش من اهناك واترد واتسوي
شو الفايده الرمسه ؟؟ ااذاا هيه تبا تتغير بتتغير من داخلهااا هيه بنفسهاا وبتعرف الصح من الغلط . .
الله يهديهاااا بس الاخوات مابيقصرن
وبارك الله فيج غاليتي حرصج دليل على غيرتج على دينج وبنات بلادج ,,
نحن كمسلمين مأمورين غاليتي اذا شفنا المنكر نغيره ,, بايدينا واذا ماقدرنا بلسانا واذا ماقدرنا أضعـــف شي بقلبنا نستنكره 
" لا يغير الله مابقوم حتى يغيرو ما بأنفسكم "
غاليتي انتي حاولتي معاها أكثر من مرة
لكن سبحان الله تغيير الناس مب بايدينا ,, نحن نقدر نغير من أنفسنـــأ وندعي للناس بالهدايـــة
لكن هذا ما يمنع ان دام هدفج شريـــف ونيتج زينـــة غاليتي لا تياسي ,, ^_*
تابعي معاها حاولي تعرفين شو سبب هذا النقص الي عندها والي يخليها تسوي هذي الحركـــات
بكل ايجابيـــة وحوار هادف حاولي تكلمينها بينج وبينها
لإن النصيحــة جدام الناس فضيــــحة ^_^
واذا ماسمعـــت الكلام وتمت على طريقها الغلط
عليج بالدعاء لها ,, ودعوة المسلم لأخيه مستجابــة
ادعي لها بكل ثقـــة في الله سبحانـــه وتعالى وبكل طيبة خاطر
ربي يهديها ويصلح من حالها
وابعدي عليها لإنها ممكن لا سامح الله تأثر عليج أثر سلبي بدون ما تحسين !
وربي يوفقج لكل خير ويسر جميع أمورج ^_^
اللهم استرنا بسترك يارب