خدامتي وعيالي

  • بواسطة

هلا خواتي
انا الله رزقتي بخدامه بلسم تنحط ع الجرح يبرا
يت وانا كنت مربيه تقريبا لي شهرين احين ولدي عمره ثمان شهور
من شافته وهي متعلقتنه
لين احين تحبه حب جنها هي امه وراقبتها وحطيت كاميرات وايد حنونه عليه
حتى بنتي الي عمرها سنه ونص تموت فيها
هي تحبهم وهم يحبونها ومش مخليتني ادخل في الولد من ناحية لبسه وتبديله اتقول هذا ولدي
انا خايفه لان تحبه وايد وهو يحبها لو تروح عنه شوي قعد يصيح
شو الراي انا ماريد احسسها ان ماريد العيال يتعلقون فيها او شي انا خايفه من جدام لو خلصت السنتين ويت تروح شو اسسوي بالعيال ههههههه
شورن علي

والله ي اختي دامج يبتي شغاله ب نيه " تربي عيالج " .. ف طبيعي هالشي يصير
تحملينه عاد
واسمحيلي بس شي غلط من اوله .. شلون تسمحين لوحده غيرج تربي عيالج ؟
ولا تقولين ماتربيهن ، ماتباج تدخلين ف لبسه وتبديله معناه انتي عطيتيها الضوء الاخضر ..
ودام ان البيبي يقعد يصيح يوم تروح عنه كانها امه ، ف الوضع متعدي الحدود بوايييد
برايي حاولي تكوني جاده شوي وربي عيالج
وعطيها شغل البيت فقط ، اما لو يايبها عشان العيال ف هالشي راد لج اكيد
ماقول غير الله يعينج .
اسمحيلي لو الاسلوب يضايق .. انتي ك اخت لي وهالشي مارضاه لاختي .

خواتي بخبركم بتجاربي ويا بشاكيري وعيالي اغلب البشاكير اللي يبتهن كانن يساعدني بأمور عيالي فبنتي الثالثه جبرتني الظروف اني اسافر للعلاج خارج الدوله ويا ريلي واترك ولدي وبنتي الكبيره والضغيره كان عمرها حزتها سنتين بيوم عيد ميلادها سافرنا وتركتها عند امي والبشكاره وكل يوم اكلم امي وتخبري عن بنتي انها متعلقه وايد بالبشكاره ودايما بحضنها وماطيع تسير عند اي حد وان البشكاره مب مقصره وياها انها تحت مراقبة خواتي والولده كملت ست شهور خارج الدوله والله اني يوم رديت ماعرفتني وماطاعت اتي عندي وتمت اصيح اتناديها باسمها والله اني صحت بهالموقف لكن بعد فتره ردت تعودت علي والبشكاره بعدها بثلاث شهور صارت لها ظروف وطلبت انها تسافر والله ماأجذب عليكم انها تمت تقريبا شهر صياح تباها ويتها حاله عصبيه تضرب راسها بالارض وصابها امساك لفتره طويله ولكن الحمد لله الفتره على خير وتأقلمت عالوضع
وعيالي الثانيين بعد كانواالبشاكير يساعدوني بأمورهم الا اني كنت موجوده عندهم ووجودهم وياي اكثر عن البشكاره صح كانوا يهتمون فيهم والصغاريه يحبونهم بس ماكان ا يتأثرون بشكل كبير بسفرهم فتره بسيطه وينسونهم
انا كان نظامي من تنوي البشكاره السفر قبلها بشهرين ولا اقل شي شهر اييب وحده ثانيه ويا الاولى عشان يتعود عالثانيه ومايأثر سفر الاولى بشكل كبير على الصغاريه

موقف صعب احس لكن بعد لا تخلوهم عند الشغالات وايد

وام بدور ما تجوفون شر

اممم هو غلط البشكاره تربي العيال لانه لازم بيتعلقون فيهم دام هم يربنوهم شي طبيعي اوك اتساعدج فاي شي خفيف فيهم عشان لوسمح الله صار لج ظرف بتنجبرين اتخلينهم معها ولازم هالشي يكون نادر ومن تجربه اخت ام بدور يبرهن صحه هالشي

خليهم على راحتهم .. أنا ولدي كنت أحطه عند الخدامه لأَنِّي كنت أدرس تعود عليها وايد لدرجه انه يطلب أحيانا ينام عندها صحت وحزنت على هالشي ونحن مجبورين أحيانا نخليهم عند الخدامه بس فالنهاية العيال بيرجعون لج لأنج إنتي أمهم موب الخدامه ومن تجربتي بعد السنتين ينسوهم والله ..

وحتى لاحظي اذا كانوا العيال مرضى ما يبون غير أمهم و انهم مهما سُوو وتعلقوا بيرجعون لج ..

نصيحتي لج والله الخدامات ما منهم أمان حاولي اذا انتي فاضيه وما تداومين تسوين كل شي ل عيالج

و الله نصيحه حتى لو كانت طيبه بعد تحذري و استودعيهم عند الله

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.