الاهل كبار والبنت صغيره ومقبله ع الحياه وتبغي تعيش وهم كل شيء ممنوع

بنات عندي مشكله هي اهلي ماعرف شو اقول

بس يعني مالقيت حل لهم امي وابوي كبار بالعمر ويابوني بس مايهتمون فيني
حتى كله اقول ليش يبونا وهم كبار ونحن صغار مايعرفون حاجات البنات بهالايام
يعني اهلي مال اول وتفكيرهم محدود يعني اهم شيء يوفرون لي اللقمه

والثياب وعادي لو اتم سنه ما اشتري يعني عندهم كل شيء عادي والي يقهروني

انه عندهم خير وفلوس بس يبخلون عليه يعني لو ابغي شيء اتم احن عليهم

واسوي حشره عمرهم ماعطوني شيء من نفسهم
والله لازم انا اطلب من ابويه وامي مصروفي مع انه ماعندهم غيري يعني خواتي معرسات
والي تشتغل وعندهم خير ماشاءالله لو ابا احسن سياره يقدرون يوفرونها لي

بس مول هب مدلعيني ومخليني اخر شيء يهتمون له ويوفرون طلباته
ويقولون انتي مصرفه وتدلعين وتخقين وتبين تلعبين بالفلوس

انزين حتى مايبوني اشتري ماركات يبوني اشتري حيا الله شيء تفكيرهم مال اول

والله تعبت كل يوم ضرابه ع فلوس وع الطلعه وحتى يوم ابغي اشارك بنادي الفتيات او اي مكان

ابويه مايرضى ويشك ويحط بباله اشياء يعني شو ابغي اتعلم واكون انسانه متعدده الثقافات

واكون عمري انا انسانه احب الاستقلال الذاتي بس اهلي يبوني دوم تحت جناحهم

لين متى جي بتم اطر منهم الفلوس هم يعطوني بالاف كل شهر بس بطلعه الروح ماحب جي

اذل عمري ع مصروفي خاطري مره ابوي يذكر من نفسه ويعطيني يقولي تعالي بعطيج مصروفج

بس كله يتنازع ويحتشر عليه ويسوي من الحبه قبه ومايباني اكشخ

يوم يشوفني لابسه بنطلون ولا شيء ضيج يعصب وحتى اخواني يعني شو يبوووون

يبوني البس جلابيه وايلس جي بدون كشخه ولا شيء يعني انا بنت وحلوه وفيني جمال

اذا ماهتم بعمري متى بهتم وبتعلم يعني والله حتى كله اقول جمالي ع الفاضي وبنات اخسف مني

متهنيات بجمالهم ويكشخون وانا بس يوم احط مكياج وشي خفيف اطلع حلوه يعني اقول خاطري

اتهنى بشكلي ومايبوني اظهر ولا اجتمع ولا اروح بيت ربيعاتي ويوم اعزم ربيعاتي

يحتشرن ويسوون لي سالفه يعني يبوني ايلس بالبيت وجي هم مطمنين عليه وادفن عمري وهم مرتاحين

ماعرف تفكيرهم مال اول بس الحمدلله ع كل حال بس خاطري اكشخ بدون ماحد يحتشر

وخاطري يدلعوني يعني عمرهم مافكروا بنتي تبا جي بنتي مابنخلي عليها قاصر

بس فالحين يخزنون فلوسهم ويمعون ويشترون اراضي وانا اندفن بالبيت

وما اظهر ولا اجتمع بعدين يقولون ليش بنتكم هب اجتماعيه ترى انتم تخلون الواحد يجمتع ويكون له حياه اجتماعيه

كله ممنوع ممنوع

بنات شو الحل معا الام الابو الي مايهتمون ببناتهم ويحبسونهم بهدف انهم يحافظون عليهم

لاتقولون يخافون عليه ادري بس عاد هب جي بتعقد وبعدين هم مايبون يطلعوني ويتعبون عمرهم

حتى الاماكن العاديه الي فيها حريم ومافيها شباب..وانا كبرت وخلصت سن المراهقه

؟؟

مليت واخواني كل واحد همه نفسه وبس وحرمته وعياله وبس وقت المشاكل اييون ويفردون عضلاتهم وينكم وقت الرخاء وينكم وقت يوم انا احتاج حد يظهرني