ارجوكن ابا مساعدتكن بالمعلومات عن التوحد في الامارات الي عندهم طفل يعاني منه خبروني كيف عالجتوه شو صار فيه صراحه راسي دار مره يقولون لي اضطراب تواصل مره توحد مركز زايد قال اضطراب تواصل مركز دبي للتوحد قالو توحد
اعصابي تعبت ما اعرف مصير ها الولد كيف اتصرف وياه خواتي ابا كل تجاربكم في الامارات يمكن معلومه تافهه تفرق وياي ارجوكن فرجو همي الله يفرج همكم
1- هل في فحوص عضويه للجسم يمكن تسبب له اعراض التوحد ؟؟؟تنصحوني اسويها
2- وين احسن دول في علاج التوحد المانيا او امريكا وشو اخر طرق العلاج وهل ياخذ وقت طويل وشو اسم االاماكن
3- هل الطفل الي فيه توحد لا قدر الله احسن يروح مدرسة توحد ولا يدمج في المدارس العاديه مع مدرسة ظل ؟؟
4- هل الي فيه توحد ما يتكلم طول عمره لاقدر الله هل هو عنيف هل ما يقدر يتعلم ؟؟؟؟؟
الياهل الي عندنا ينط وايد يرفرف بايده ما يتكلم الا كلمات محدوده يحضنا عادي يبتسم لنا يلعب مع خواته يوم يبا بس ما يستجيب للاوامر يعني اوقف اقعد صفق ما عنده صبر اذا يبا الشي يوديني له ويتم يصيح عداله واذا يقدر ايبه ايبه بروحه بس يعرف يله بناكل يله بنطلع يله سياره بس ما يتكلم يسوي اصوات
حسبي الله ونعم الوكيل
عليك بالاستغفار: {اسْتَغْفِرُوا رَبَّكُمْ ثُمَّ تُوبُوا إِلَيْهِ يُمَتِّعْكُمْ مَتَاعاً }
انا ولد خالتي بامريكا عنده مرض التوحد الولد الحينه عمره 9سنوات يدرس طبيعي وييونه دكاتره للبيت يعلمونه الكلام بس ما يتكلم يعني كمعاشرتي له احسه وايد وايد ذكي, ما يتكلم ولما يتكلم عن نفسه او يبا شي يقول ريان يبا ها لانه اسمه ريان فتحسينه عايش في عالم خاص, يفهم الكلام بس ما يحب يتكلم ومرات يعيد الكلام اللي يسمعه اذا كلمه شخصو وايد حنون حساس في دراسته وايد اوكي بس مستوى الكلام عنده كطفل عمره سنتين مع انه كبير فسبحان الله ها المرض غريب ناس تقول انه بطء نمو او مرض نفسي ما يخصه لانه للحين محد يعرف شو مسببات ها المرض او علاجه
فأنصحج بالصبر وطولة البال وياه ولازم تكون له معامله ورعايه خاصه وأكيد بتواجهين نظرات او كلام من الناس لا تاخذين عليهم بالعكس لانه اللي اعرفه انه اللي عندهم مرض التوحد يكونون وايد اذكياء والله أعلم
بما انه يقدر يتكلم، يلعب مع خواته، يحضن، يبتسم .. الحمدلله …
التوحد مرض مزمن .. واللي يعانون من هالمرض اغلبهم يعيشون حياه تقريبا طبيعيه
وممكن انه يتحسن اذا عاش في بيئة تلبي حاجاته !
انا درست عن هالمرض : مااقدر اقولج يفضل انج تدمجينه في مدارس عاديه او لا .. لأنه في مختصين هم أدرى بهذا الشي ..
ممكن اذا درس في مراكز خاصه تتحسن حالته … وهم اللي يطلبون بدمجه في المدارس ..
طلب منج :
لاتهملين هذا الطفل لانه التدخل المبكر جدا مهم في تحسين حالته!!! أعراضه اللي قلتيها الحمدلله اعراض بسيطه ! وممكن يتحسن اذا في تفهم و وعي منكم كأسره!
عن طريق المراكز المختصه ، حاولي تعرفين طرق التعامل مع هالطفل ! وتساعدينه يتواصل بطريقه صح ويتعلم صح !
هالاطفال يحتاجون ل صبر
وانه نعطيهم فرصه عشان نفهمهم
كوني سلسه في التعامل معاه ..
.
.
دمتِ بخير انتي وطفلج !
واسال الله العظيم رب العرش العظيم ان يشفي كل المصابين بهذا المرض
