عندي ولد واحد عمره سنتين، وأنا قاعدة في البيت مجابلته ما أشتغل…
كنت دوم حاطة فـ بالي اني بجابله وبعلمه ولين يكمل أربع سنين بدخله الـKG على طول
بس ولدي هو الياهل الوحييييد في البيت …. ماعنده احد وياه
وبيت قوم امي صح عندهم يهال ماشالله عليهم (عيال خواتي) بس أنا ما ازورهم دايما .. في الشهر مرة أو مرتين أبات عندهم كم ليلة وكـ زيارات يمكن مرة أو مرتين فالاسبوع بس زيارات سريعة تكون…..
ويوم نكون هناك ما احس ان ولدي وايد متأقلم معاهم … ملاحظة عليه يلعب بروحه معظم الوقت أو في مجموعات صغيرة، اذا زادوا اليهال يتم يصيح ولا يلصق فيني
واذا وديته مكان عام يلعب فيه مول ولا حديقة يلعب فالالعاب روحه ما يحتك باليهال حوله….
المهم هالشي خلاني أبدا التفكير بالحضانة، أوديه ولا ماله لزمة؟؟؟
وهل بستفيد أكثر لو وديته؟؟ أبغيه يكون اجتماعي اكثر ويا اليهال ومايقعد يصيح ويلصق فيني
يعني الخلاصة،
في نفس حالتي، أنا متفرغة وأجابل ولدي وأعلمه في البيت
هل تنصحون بالحضانة لعمره (سنتين؟ او عالسنة الياية 3 سنين؟)
ولا أتريا عليه وأدخله الروضة KG على طووول؟؟؟
كـ تعليم وتدريس ما أحاتيه لأني بادية وياه في البيت أشيا خفيفة ع عمره وأحسه ماشالله عليه يستوعب…
يعني الحضانة تفكيري فيها عشان يتأقلم ع أجواء ثانية غير البيت، ويتعرف ع يهال غير وجيييه…
مرات أحسه مل من كثر ما مجابلني >.< طفر من ويهي ههههه
المهم أمهات … تجاربكم وخبراتكم ^_^
(قصه حياتي)هع..
بس انا انصحج تسجلينه بحضانه عشان بعدين مايتم بعزله ويرفض يكون بأطفال بعمره
وصح مبروووووووووووووووووووك عالنونو ولو اني متأخرة!
امممممممممممم شكلي جي بسوي وببدا ادور ع حضانة جريبة…
ندى.. تسلمين اختي… ووو صح احس يباله مجموعة بعمره! حتى يوم اودي ولدي الألعاب في المولات ما أحسه يتأقلم يلعب بروحه >.< وأي احتكاك معاهم بيكون ضرابة وبس!! الله يعين ..
مع اني اوني ابا اجابله واعلمه روحي بس احسه يحتاج (اجتماعيا) يهال بعمره يلعب معاهم دوم
حاليا احاول اجمعه مع عيال خواتي اكثر…… وبدور ع حضانة جريبة
اللي تعرف عن الحضانات في الشارجة ورا المدينة الجامعية تخبرني >.< (النوف، القراين) … انا ماعرف لهالمنطقة ولا اعرف حد ساكن جريب! مادري كيف بحصل
عشان يتأقلم ويا اليهال اللي في عمره، وان شاء الله يوم بيسير الروضة ما بيتعبج
انا عندي 2 الكبير حالياً في الكي جي 2، وكنت مدخلتنه الحضانة وعمره سنتين، ما شاء الله عليه استفاد من الحضانة سواء من الناحية الاجتماعية او حتى في الدراسة، يعطونهم اشياء على قدهم، مثل السور القصيرة والارقام و الالوان ،
ولما كبر وسار الروضة ما تعبني ولله الحمد
والحين بنتي سنتين ونص ، على خطى اخوها هههه ، داخلة الحضانة،
ونصيحة لا يضعف قلبج يوم تشوفينه يصيح يباج، عادي خليه بيتعود ان شاء الله، وعقب فترة بتحسين بالفرق
