مرحبا خواتي..
مشكلتي مب يديده ولا غريبه ….
بس اعتبرها فضفضه نوعا ما…
أنا خلاص تعبت 
(((… تعبت من السكن ويا أهل زوجي…….
احس اني مهمومه .. وعايشه في هم…. ابغي اطلع اليوم قبل باجر….
ابغي اكون في بيت بروحي ….
اربي عيالي على كيفي….
اخذ راحتي..
اسوي اللي اباه ..
اعيش مرتاحه ما ابرر تصرفاتي لأحد ولا احد يفهمني غلط ولا أتلوم في حد … ولا حد يبوز في ويهي … ولا ابوز في ويه حد …
والله اني أنش مهمومة .. اطلع من البيت مهمومه .. وارد مهمومه……
تعبت
تقربت منهم أول ما ييت … بس تعبتني تدخلاتهم وآراءهم …
ابتعدت وسويت حواجز … ماقدر اتحمل .. مرضت .. ومحد حس فيه..
تعبت من المجامله .. ابا اعيش مثل ما أنا ….
بس بعدنا نتريا الاسكان..
كل يوم اتضارب ويا ريلي ابا اطلع من البيت..
بس ارد اقتنع ان الله بيسر امورنا قريب..
واني لازم اصبر على هالوضع..
عشان اساعد ريلي ..
بس انا مب مرتاحه (((…….
احس انه ما تسوى عليه هالعيشه ….
انا ما اشتغل ويالسه في البيت عشان الاطفال فقط …. ويوم بغيت اداوم لوعوا جبدي اهل زوجي …
الله المستعان
الله ايسر امرج اختي..
عندي لج نصيحه وحده… الصبر + طنشي … فكري في شي واحد العمر يمر وانا بعيش مره وحده فليش اضيق على عمري واحرق في اعصابي ونفسيتي زفت… اضربي كلهم بعرض الحيط وسوي اللي ربي يامرج عليه وابعدي نفسج عنهم… سيري عندج اهلج ربعج اشغلي نفسج وااااايد عنهم… (( مع العلم انا يالسه ويا اهل ريل وانا متغربه يعني مب في الامارات عايشه ولا اهل عندي ولا شي بس اهله)) فطنشي وطنشي …
والله يهديهم ويصلحهم يارب..
انتي تركتي بيت ابوج وأصبحتي فرد من عائلة ريلج صح؟
حاولي تندمجين وياهم واتكونين صديقة لكل واحد في البيت…. خليج انتي الحنونة…. اذا وحدة من حمياتج اتضايقت تلجألج وتفتح قلبها لج… وأم ريلج تراها يدة عيالج ولها الحق انها تآمر وتنهي واتقول ليش جي لابسين وليش وليش وهي من حبها لهم اكيد تخاف عليهم واكيد عيالها لما كانوا ضغار جي كان أسلوبها معاهم لا تفتكرين أن طريقتنا في التربية بتكون نفس طريقتهم….
أختي أنا أغلب طلعاتي للمولات والمطاعم أعزم عمتي وحمياتي وآخذهم وياية والله انا نستانس ونفرح ويا بعض…. قبل العيد بشهر آخذلهن قطع عشان يخيطن للعيد…. لما زادوا راتبي خذيتلهم هدايا…. دايما اخاذلهم هدايا (تهادوا تحابو) …
أختي انتي لازم تفهمين أنهم متعودين على ان أخوهم يكون معاهم ويلبيلهم طلباتهم ويعطيهم فلوس اذا احتاجوا بس لما خذاج أكيد هاي الاشياء قلت فشي طبيعي يغارون ويحسون بالنقص لا اتلومينهم ترا نحن بعد حسينا بفقدان اخوانا بعد ما عرسوا…
ليش معيشة عمرج في هم وانتي الحل بإيديج….. لا تترين الناس تتغير عشان ترتاحين…. انتي تغيري ….
اذا مرة كنتي ضايجة افتحي قلبج لوحدة من حمياتج وعطيها الثقة… اذا بيزورون بيت خالتاهم والا عماتهم سيري معاهم دوم…. سوي طلعة جماعية بسيارتكم مرة كل اسبوع او اسبوعين…. بالمختصر المفيد خليج جزء منهم تفكرين مثلهم وعشانهم وصدقيني بترتاحين وبيحبونج وبيعزونج وعقب بالتدريج خلاص بتخف الغيرة من قلوبهم وبتحسين اهم تركوج في حالج….
كلامي هذا عن تجربتي انا واختي والحمدلله اهل رياييلنا حاطينا فوق روسهم…. الحمدلله الحمدلله الحمدلله….
