خواتي حبيت اعرض عليكم تقرير بسيط عن عرس اخويه الي كان تاريخ 27-6-2017 يوم السبت الماضي في العين
للرياييل والحريم في فندق العين روتانا
البطاقات مالت الحريم طلعت رووووعه وكانت من تصميم الاخت فاطمه لوتاه من المصمم للبطاقات وكلمة روعه شويه عليها وكانت باللون الوردي والسلفر
وللرياييل من عند المطبعه العصريه وكان ديزاينها يديد والحمدلله بعد عيبت الكل
للعرس حطينا للرياييل خيمتين وحده للاستقبال ووحده للعشا وخلينا ساحه للعياله والرزيفه
والحريم كان في قاعة زاخر
للرياييل كنا حاجزين ل800 شخص ولكن ما شاء الله يونا فوق ال الف
والحريم 450 وين حريم ما شاء الله وبقت طاولتين فاضيات يمكن او 3 ووايد حريم تعذرن لان فالعين وقالن بعيد ونحن من دبي وخاصه انه يوم السبت واليوم الثاني دوامات
طبعا يينا الفندق من الصبح لان راعي الكوش كان يشتغل فالقاعه من الساعه 12 وشي فليل وسرنا 6 او 7 سيارات يالله يالله كفتنا نحن وضيوفنا الي يايينا من برع البلاد واغراضنا
وانا طول الليل ارمس راعي الكوش بالمسجات اسال عن الترتيبات وشو سوو ووين وصلو وماقدرت ارقد من التفكير والمحاتاه الا الفجر وهو كان يطمني وماقصر حليله
اتعاملنا بالنسبه للديكور ويا مصمم فرنسي من space & flower الي كان عليه الكوشه والسنتر بيس وطاولات العطور والمدخل ومفارش الطاولات وشوية اضاءه للكوشه ومسكة العروس
طلب اضاءه مساعده للكوشه غير المحطوطه فالفندق بعد
فخذت 13 اضاءه مع كشاف العروس من استوديو الاطلال فالعين وكان سعرهم جدا مناسب وحلو
تعاملنا ويا حرمه مبدعه الله يجزيها كل خير سوتلنا اشكال حلوه لعلب الكلينكس بحدود 45 او 50 حبه وصياني العرس وفعلا كانت تستاهل اكثر من السعر الي طلبته
وللرياييل يبنا عياله وفرقة المزيود الحربيه
والحريم يبنا طيران فرقة وفاء وكانت ربششه ربشششه من الخاطر
واول مره عرس من اهلنا جي يكون ربشه ورقص ترا عيب عندنا يرقصون
الممر ماكنا نروم نمشي فيه من الرقص
وفاء رقصت والصبابات كلللهن وهل السعوديه وهل البحرين وهل الكويت والسودان وانا واختي وبنت خالتي وبنات العين وبوظبي وحريم ماعرفهن بعد رقصن واستانسنا وااايد واايد
والحمدلله الفرحه كانت باينه ع الكل والله يديمها
والله يتمم لاخويه الثاني ان شاء الله واراويكم تقرير عرسه السنه اليايه باذن الله
الصبابات من خدمة بنت الباديه
الاكل للرياييل كان من قرية البوم السياحيه وللحريم شي من قرية البوم وشي من الفندق نفسه
يعني نوعنا فالاكل
الحلويات سوينا 13 صينيه من باتشي صينيتين وبنشوا صينيتين والباقي كله من شغل حريم مواطنات امسيات وغيره
العطور من الجود للعطور لراعيته ام محمد وشغلها صراحه روعه لا يعلى عليه وكل عرس يستوي عندنا من عطورها ناخذ ولزهاب عرايسنا من عندها بعد
فساتينا كانت من عند ازرا لابركتن فيه انا وخواتي والعروس
امي سوت عند جوليا دوماني
وام العروس عند اروشي وكلهن افتكن من ازرا وصدعته
ماخلصو فساتينا الا بالضرابه كانو مخربينها ومخربين فستان العروس حليلها مع ان مخلتنهم يسوونه من شهر 1 وكانت عاطتنهم موعد العرس قبله بشهر لكن ماسلمولها اياه الا قبله بيومين
لكن الحمدلله فالنهايه عقب الضرايب كلها والتعديل طلع روعه فستانها
العروس وامها وامي وحرمة عمها اتمكيجن عند ريحانه
وانا وخواتي وبنات خالي وضيفاتنا من برع البلاد مكيجتنا كاتيا من اكاديمية مي كاب فور ايفر
شعرنا العروس وامها وامي وخواتي وانا وحرمة عمها وبنت عمي سوتلنا ماتيلدا
والضيوف سوتلهم رنده الي طلعت من صالون مورا
ويبنا برشلونه للتصوير الفوري
وتصوير العروس من استديو الياقوت وحتى الرياييل بس طلع ان في كذا مصور عند الرياييل
الحين بنبدا ويا الصور
اول شي صورة كلينكس العرس
هذيل طاولات العطور قبل مايخلصونهن وقبل مايحطون عليهن باقات الورد وغراش العطور
حطو 3 ع اليمين و3 ع اليسار
وهذي الكوشه
وهذي السنتر بيس بس مب واضح في ورد داخل الماي وفي احجام من الزجاج المدور
هذي طاولات العطور عقب العرس وعقب ما شلو الورود وعقب ما شلو غراش العطور
من هالصوره كنت ابا اراويكم الليتات الطوال هذي كانت منتشره في قسم الاستقبال لين طاولات العطور وعاطيه منظر حلو
وشوفو ورا كيف ساندينهن ع اليدران
واخيرا هذي مسكة العروس من نفس المحل واستخدم فيه نفس الورد والصوره مب واضحه لاني صورتها بتلفوني من صوره
والي عندها اي استفسار انا حاظره
وامانه ادعو لاخويه ان الله يسعده في حياته ويا حرمته ويتمم لاخويه الثاني واختي عرسهم ع خير ان شاء الله ويسعدهم
والله يسعدهم ويهنيهم ويا بعض ويبعد عنهم عيون الحسد وبل المبارك عليكم
حبوبه الوشه من وين وجم سعرها وايد عيبتني؟؟
بس لو صغرتي الصوره شويه .. ؟؟!
الكوشة روووعة …
ماشاء الله وااايد حلووو ..
الله يسعدهم ان شاء الله ..ويوفقهم فحياتهم ..ويتمم لاخوج واختج عرسهم ع خير ان شاء الله …
وانا بعد الله يتمم زواجي ع خير ان شاء الله ^.^
انا بعد ناويه اسوي الورود للعرس والمسكه عند سبايس اند فلور =) عجيب هالريال 3>
حسيت انه كان روعه عرسكم بس الصور كبيررررره
