والملل عامل عمايله فيني
قلت بنزل تقرير سفرتي
لاني لاحظت وايد يسألون عن تركيا
وخاصة انه موسم سفر وان شاء الله كل اللي بيسافرون لهذه الدولة الرائعة يستفيدون من تقريري
رحلتي التي طالما حلمت بها
بلاد الأتراك
( تــــــــــركــــــــــــــيـــا)
المدة : 18/5/2017 – 27 /5 / 2024
المسافرون : أنا وريلي وبنتي عمرها 9 شهور الله يحفظهم لي
الطيران : طيران الإمارات.
الحجز : عن طريق شركة السفينة للسفر والسياحة في رأس الخيمة.
التفاصيل : 5 ليال في اسطنبول ( فندوق ايليت وورد 5 نجوم ) 4 ليال في بورصة ( فندق الميرا 5 نجوم)
التكلفة : التذاكر + الفنادق = 11،800 درهم / المصروف شامل الرحلات والمشتريات والهدايا : 10،000 درهم تقريباً.
التصوير : كاميرا نيكون دي 90 كل الصور من تصوير ريلي
البداية ^^
كنا محتارين شو نسوي فالاجازة
وكنا متخوفين وايد من السفر لانه بنتنا صغيرة ونخاف نتلعوز وياها فالسفرة
بعد التفكير والتفكير بين لبنان وتركيا قررنا نسير تركيا ^^
واكيد انا وايد استانست لاني من زمان وانا خاطري ازور هالبلد
قريت وايد عن تركيا في المنتديات المتخصصة في السفر والسياحة
ونهلت من معلوماتهم وايد وايد وسجلت أهم الاماكن السياحية وكيفية الوصول اليها ..
من خلال بحثي اكتشفت انه المواصلات في تركيا وايد غاليه وتكلف وايد
فقررنا انه نعتمد على عمرنا والتنقل اغلبه كان فالمترو والحمدالله كان سهل ومريح وممتع جدا ^^
في الطريق إلى مطار دبي
بخبركم عن الموقف اللي استوالي فالدرب
.. كنا نسمع اذاعه الشارجه وطرحو سؤال في البرنامج وانا من الملل طرشت الاجابة
وشوي اسمعهم يقولون الرابحة هي ………… انا خخخخخ ما صدقت اول مره في حياتي اربح واااايد استانست وارتبشنا الرحلة من اولها وناسة الحمدالله ^^
وصلنا إلى تركيا
ما كنا حاجزين المواصلات من قبل عشان جي حجزنا من المطار سيارة برايفت كلفتنا 60 ليرة = 138 درهم
وصلنا فندق ايليت وهاذي صورة من الانترنت <<<< ناسية تصور الغرفة
صور من اطلالة الفندق ( كان عيد الاستقلال عندهم وفكل مكان كنا نشوف علمهم )
صور من فطور الفندق
ريحنا في الفندق واتجهنا للعشاء في شارع الاستقلال الشهير الشارع كله كافيهات ومطاعم ومحلات وزحممممممة بس وناسة
هالميني قطار .. قطار صغير يوصلكم لين اخر الشارع ويرد فيكم بس نحن ما ركبناه لانه عندنا عربة
واحد من اللي يبيعون اسكريم ^^ بس شكله مميز
قررنا اول رحلة تكون الى جزيرة الأميرات
سالنا الرسبشن عن مكان محطة المترو وكانت جريبه من الفندق وصلنا المحطة
وركبنا الى محطة ميناء كبتااش ومن هناك قصينا تذكرة ساير راد إلى الجزيرة التذكرة اضن ب 10 ليرة للشخص ولا 20 مب متاكدة
والمترو يكلف ليرة ونص للشخص يا بلاش وانصحكم بنات ما تعتمدون على الشركات السياحية اللي بتنصب عليكم خاصة في هالرحلة.
هالسفينة اللي توصلكم تمر على اربع جزر والخامسة هي جزيرة الاميرات الرحلة تستغرق ساعه ونص تقريبا
مناظر من الجزيرة
يلسنا في واحد من الكافيهات وشربنه الشاي التركي
الحنطور اللي ياخذكم في جولة ونحن اخترنا جولة النص ساعه وكلفتنا 25 ليرة = 57 درهم تقريبا
وكانت جولة راااااااائعة الجو حلو والناس تلعب وتشوي والمناظر روووعه ^^
قطاوهم كيوووت احبهم يوم يكونون بعييييييييييد
هالقطوة ما خلتني اتغدا مثل الناس وريلي مستناس عليها و طايح فيها تصوير 
ونحن نتمشى فالجزيرة يت سفينه ونزلو منها مجموعه كبيييييرة من الشرطة وبدو بالعرض العسكري
اليوم الثالث
قررنا نسير منطقة السلطان أحمد اللي تشتهر بالاثار التاريخية
وبالقرب منها شي اسواق شعبية المنطقة رووووعه ومن اكثر المناطق اللي حبيتها فالرحلة ^^
لقطات من الاثار التاريخية ( مسجد السلطان احمد ومتحف ايا صوفيا )
عقب تغدينا في واحد من المطاعم
هالاكلة المشهورة عندهم ( سكندر كباب) بس انا ما عيبتني كان ريلي يطلبها
صورة اوضح للاكلة من مطعم ثاني
وسرنا سوق قبالي جارشي والسوق المصري هي الاسواق تقريبا مداخلة فبعض تدخلون سوق وتطلعون من سوق ثاني
اللي حبيته في هالاسواق البيجامات بس للاسف ما رمت اشتري شي فجأة تغير الجو وطاح مطر غزيييييير ماشاالله
واضطرينه نركض ونطلع من المكان ونرد الفندق عشان البنوته
رحلة البسفور
ركبنا المترو كالعادة ^^ ومحطة المترو صادفنا هالشيبه كان يعزف موسيقى تركية
ووصلنا للبسفور وركبنا السفينة اللي تاخذنا في جولة لمدة ساعه على بحر البسفور
واللي يطل على جانبي اسطنبول الاروربي والاسيوي وفي الرحلة بتشوفين مناظر عجييبه للقصور التاريخية
صور للسفينة
وهالضيف اللي رافقنا في الرحلة
مناظر خلابة
وانتو نازلين من السفينة بتحصلون صيادين يبيعون سندويش سمج
ريلي قال ياللا انجرب تخيلو سمجة بعظمها فالسندويشه والله كليت من اليوع خخخخخخخخ
الحديقه عبارة عن مجسمات مصغرة لمعالم تركيا
روووعه المكان صراحه ما توقعت اني بستانس الجو الجو كان خبااااال والمنطقة رائعة
شي وحده تصوركم وانتو لابسين الملابس التركية التراثية نحن لبسنا وتصورنا ^^
صور من الحديقة
كنا فليل نسير المولات كل يوم نتعشى فمول لانه الاماكن السياحية اغلبها تسكر فليل
ومن اهم المولات ( جواهر مول ، كانتون مول ، مترو سيتي مول ،اوليفيوم اوتلت مول .. الخ)
عرض امام جواهر مول
هذا احلى مول ( كانتون مول) ديزاينه مفتوح بس كله ماركات نفس اللي عندنا طبعا
بشكل عام المحلات اللي في المولات نفس اللي عندنا
شي محل اسمه LC WAIKIKI بتحصلونه في كل مول واسعاره حلوه
ملابس اطفال وملابس نسائية ورجالية انا خذت وايد فساتين حق بنتي من هالمحل ^^
الحمام في كل مكان في اسطنبول وشي حريم واطفال يبيعون الحب بنتي وايد استانست عالحمام
هالولد اللي اشترينا عنه تم يلاعب بنتي ويطير الحمام جدامها يحليله ^^
شارع الاستقلال فليل
حلويات
وهالعربات كل مكان
والكستناء
ووالذذذ شي خاطري الحين ابا منه ( البقلاوة عندهم خباااااااااااااااااااااااال)
ووجهتنا ( بورصة )
سرنالها عبر الفري بوت
خذنا سيارة من الفندق وصلتنا ميناء ياني كابي ومن هناك ركبنا الفري بوت الى بورصة
تخيلو سرنا من وقت واااايد تقريبا قبل الرحلة باربع ساعات لانا ما كنا نعرف اصلا متى مواعيد الرحلة ولا سألنا
وتمينا فالكوفي نتريا ونتريا لين الموعد بس الوقت الحمدالله مر بسرعه
بين السوالف والضحك والاكل خخخخ
التذكرة ب 20 ليرة للشخص و الرحلة تستغرق ساعه ونص تقريبا
وشي كافتريا فالسفينه عندهم كل شي بس اسعارهم اغلى عن برع
صورة من نافذة الفري بوت
وصلنا فندق الميرا
فبورصة اعتمدنا على التكاسي مع انه اسعارهم غاليه بس اضطرينا لانه المترو عندهم ما يوصل المناطق السياحية
اول رحلة كانت في بورصة
التلفريك ( جبل اولداغ)
وقفنا تاكسي وقلناله يودينا التلفريك ويوم سرنا كانت الصدمه انه المحطة الثانية من التلفريك اللي توصل للثلوج تحت الصيانه
ركبا لين المحطة الاولى بس
عقب هالرحلة توجهنا على منطقة الشلالات
وتغدينا هناك المكان روعه
