عندي مشكله للمره الرابعه اصيد ريلى والفون بالدسه.. وين فاسيارة مخشوش .. ماعلينا بعطيكم المفيد
عندي ولدين .. بعمر السنتين والثاني 4 شهور ..
صدته للمره الرابعه واعترف اني هالمره ناويه اطلق
خلااااااااااااااااااااااااااااص
مش نفس اول وثاني وثالث مره حليت الموضوع اول مره تسامح ثاني مره نزاعه ثالث مره هجرته فتره
هالمره قلتله بطلق خلاص لانك مب كفو ومب ريال مالك كلمه تحافظ عليها
استخف واول مره يعترف سيدا ما انكر وطى راسه وقال انا حيوان قلتله من زمان
يبت الشنطه وحطيت ملابسى ودقيت ع اخوي يمر ياخذني .. وخلال هالوقت يترجاني اتم واسامحه
وقال لو تنطبق السما عالارض مابطلقج مابحصل نفسج ومن هالخرابيط املعتاده
لازم يتمسك فيني انا برستيجه جدام الناس .. انا الي امثل كماليته هو الي يحب يتظاهر بالمثاليه والكمال
اهم شي سمعته عنده.. اهم شي
قلتله بلوث سمعتك وبخبر اهلي واهلك هالمره مابسكت لو سالوني سبب طلبي للطلاق
بقولهم خااااااااين وسترت عليه وايد على بالي ريال وكفو وعنده كلمه بيحافظ عليها بس خرطي
سار زقر امه وابوه وقال قولي جدامهم كل شي وتميت اصيح واعترفت لهم اني للمره الرابعه صدته يخوني وماقدر
اسامحه اكثر وبسير بيت اهلي
استخفت امه وتمت تنازعه وهو راسه بالارض اول مره اشوفه منحرج جي حتى ابوه انصدم منه !!!
وتعاهدت امه ان مايكرر فعلته للعلم حطو فبالكم امه من النوع القوي جدا وماتحبني
حماه شريرررررره جدا .. بس اول مره توقف بصفي
( طبعا ولدها غلطان ) ..
تميت اصارخ وانا اصييييييييييييح ابا اسير بيتنا مابسامحه خاين الود والعشره الحرمه تستحمل كل شي
الا خيانة الريال اصعععععب شي خصوصا لو هي مش مقصره
وقلتلهم ما با عيالي يكبرون وهذا الانسان ايكون قدوتهم.. ترجوني واستحيت اردهم المهم اني للحين فبيتهم
دق ع اخوي وقال له سوء فهم يافلان واختك زعلانه وبرضيها ومن هالكلام الي مشى ع اخوي
طبعا دقو اهلي يتطمنون مثلت ان بخيرررر وانا بمووووووووووووووووووت من الغيض والقهرر
يا عندي وتم يتاسف ويعتذررررر وشلني للسياره غصب وداني المول خذلي عطور .. خذلي دخوون..
هو يدخلني المحلات غصب ويتشرا يتحراني برضى بهدايا …
قلب يعورني منو يحس فيني ثاني يوم دشت امه علي الظهر قالت لي ليش ماطلعتي تتغدين قلتلها مابا وشافتني اصيح
ردت تقول انتي ماتسوين لي اعتبار
خذيها كلمه مني الي مارضاه ع بناتي مارضاه لج لو رد وخانج وتكررت هالفعله باأي شكل من الاشكال انا المسووله
ومالج الا طيب الخاطر خلاص انسي الموضوع وعيشي حياتج
انتي غلطانه مادخلتينا من البدايه قلتلها حياتي ماحب حد يتدخل فيها خصوصا المشاكل
قالت بس موضوع الخيانه كبير انتي تبين توصلينه للطلاق ونحن مانبا نبعد عن احفادنا
اول مره ادخلينا في مشكلتكم جربينا …
خبرووووووووووووووووووني يستوي جيه بهالسهوله انسى واسااااااااااامح عشان اهله طلبو مني هالشي!!!!!!!!!!!!!!!!!
طلعت من الحجره وياني انهيار تميت اصيييح واشهق تمنيت انجلط عشان اطلع من بيتهم
يا صوبي وتم يعتذر وشوي اشوف الريال صاح من صاح انا تيبست
شوي تم يبوس ريلي اعترف ان اول مره اشوف ريلي بهالحه من الذل وقاللي لاتذليني اكثر
اوعدج اخر مره انا مابا اخرب بييتي وافرط فيج شو اسوي عشان تصدقين المشكله اني ماقدر اثق فيه
قلتله بتستحمل هالشي مابقدرررررررررررررر اثق فيك مول يبالي وقت لين ارد اثق قال بستحمل
مثل ماستحملتيني !!!!!!!!! قلتله انت هدمت كل شي قال ببني كل شي من جديد بس ساعديني وعطيني فرصصصصصصصصه
مر اسبوع هالكلام .. ودخل رمضان ..
خذ اجازه وقاعد مجابل ويهي عشان ما اصيح وانهار. او ادق ع اهلي وارد
اعترف ان وجوده خلاني اتماسك بشكل غريب لو كنت فبيتنا بنهار اكثر وبطنشه مستحيل ارد ع فونه او مسجاته.. هني لا ..شعوره بالذنب والندم والذل عالج شوي من غيضي
بس بعد احسني تعبانه نفسيا ..وماعرف شسوي استخرت 3 مرات وماحس بأي شي
اخر شي قلتله انا عشان امك وابوك بس ولاخر نفس بتم اصيله ومابردهم ولا انت ماتستاهل
اصلا هو يعرف انه لو مادخلهم فالموضوع كنت بسير وبخليه
قلتله بتم عندك بس فتره رمضان .. لين عقب العيد
يعني وجودي مؤقت طبعا هالكلام بيني وبينه قلتله اذا مارتحت مافي قوة فالارض تجبرني
ايلس عندك
وبتم استخير .. ساعدوني في حل ثاني ممكن يساعدني
هيه وطلبت رضوه مهر يديد وسار سحب سلفيه ويابلي اياه فبطاقه بنك يديده ..
لاحول ولا قوة الا بالله
الله يهديه ويصلحه لج يارب
اختي خليج قويه وخليج ايمانج بالله اقوي
ودامه رجع يترجى ويبوس ريلج معناته مش منه من رفقاء السوء او من دوامه لو في دوامه بنات وغيره
مجتمعنا للاسف كثر فيه الفتن
والله يعينا ويعين بنات المسلمين عليها
عندج كذا اوبشن :
1- يا انج تسامحينه و تحطين لج شروط معينة مثلا ما يسهر لين ها الوقت حده الساعه كذا – رقاد برى البيت ممنوع …………….الخ
2- يا انج تنفصلين
3- يا انج تعيشين وياه جسد بدون روح و اطنشين غلطاته
شوفي شو الحل الاحسن لج
