بنات هذا اول ولد لي ادعولي اولد بالسلامة ويكون طفل سليم معافى باذن الله
بعدي ماخذت شي وناوية قريب اخذ
مب عارفة شو لازم اشتري , مابه اشتري اشيا زيادة عن اللزوم وماستعملها واسوي زحمة بالبيت ع الفاضي .,
شو الاشيا الاساسية ناوية اخذ من حقه لين عمر الشهرين ع الاقل او 3
من اشيا للحمام , اي ماركات تنصحوني وشو الاشيا بالضبط من زيت وكريم وشامبو وشو غيره ,؟
ملابس وسرير اي انواع اخذ الكبير اللي لين عمر سنة او اكثر او السله ؟
شقد فوط وقماطات ؟؟؟
كريمات مثلا؟
بحصل كل شي من بيبي شوب ؟ والا وين اروح اي محلات ؟
نبدا بالملابس
تاخذين له الملابس الداخلية
اوفرولات
بدل للطلعة <<<بس لا تكثرين لان بسرعة الياهل يكبر وثاني شي يكون دايما ملفوف بالقماط
قماطات
فوط (خذي 2 للسبوح ) وخذي الصغار بعد لتبديل الحفاظ
طاقية للراس اتيي مرات طقم مع الافرولات
قفازات بتحصلين الابيض منها في مذركير
دلاغات للبدل
شنطة حق اغراض البيبي لما تطلعين
المدس
لحافات
اغراض السبوح والنظافة
حوض السبوح
كرسي ينحط في الحوض تسدحين عليه الياهل عشان تقدرين تسبحينه خاصة لما يكونون صغار صعب تمسكينهم … بتحصلينه في بيبي شوب … انصحج فيه واااايد يساعد
اسفنجة الجسم بتحصلينها في مذركير اتيي 3 حبات بكيسة
"اغراض السبوح خذيهم نوع سيباميد الاطفال او ماركة موستيلا … احسن شي لليهال"
شامبو
صابون الجسم
زيت الجسم
بودرة
مرطب
كريم منطقة الحفاظ
كلينكس مرطب
قطن
حفاظات رقم 1 او اللي مكتوب عليها "بداية العمر" من بامبرز
مقص اظافر
المراضع.. وحده صغيره للماي والينسون .. ووحدة اكبر للحليب "خذي نوع "AVENT" بتحصلينها في مذركير وبيبي شوب
فرشاه تنظيف المراضع
جهاز التعقيم للمراضع
علبة الطبقات لحفظ الحليب لما تطلعين
لهايات
بالنسبة للسرير
اشتري السلة تنفع لأول شهرين
وبعدين خذي السرير العود اللي ينفع لين عمر 3 سنين
هذا اللي اذكره حالياً واذا تذكرت شي بخبرج ان شاء الله 
عسى ربي يتمم لج على خير ويبارك لج في البيبي ويربى في عزكم ياربي
بالنسبة للاحتياجات حاولت اقرى من اختي ام منصور شو اللي نست تكتبه عسب اكتبه
لانها ماشاءا الله كفت ووفت وفعلا الاشياء اللي قالتها ضرورية وتناسب البيبي
وبضيف بعض الاشياء مثل
انصحج في كريم درابولين للاطفال لمنطقة الحفاظ
وزيت الزيتون او اي زيت ثاني مثل سيباميد عسب تمسحين به الياهل عقب السبوح وخصوصا
اذا كانت عنده غازات أو امساك عسبت تريحين بطنه شوي وتمسحين على بطنه وظهره
جواتي ماانصحج تشترين له ابدا من 1 لين 3 شهور <<< لانه وجودهم مثل عدمهم وهو بيبي وما بيستعملهم هالفترة
اللهم بس دلاغات
والافرولات <<< تريحج وايد في الشل وتدفي الياهل وخصوصا ايام البرد من سناء أو بيبي شوب
صابون سيباميد انصحج فيه لانه صحي حسب ماسمعت وما يكون رغوة وايدة وهذا معناته انه ما فيه كيماويات شرات الصابون العادي- والشامبو هيمالايا او بيجون ،، تلقينه بالصيدلية او بالسوبرماركت – والفودر عندج هيمالايا
كلينكس الحفاظ اذا تبين تستخدميه حقه حاولي تخففين منه لو حسيتي انه منظقة الحفاظ ملتهبة او عنده اسهال <<أو بالمرة لا تستعملينها نظفيه بالماي والكلينكس العادي او بالفوطة والماي كفاية لانها تحتوي احيانا مواد معطرة وجي تهيج البشرة عبد البيبي
غطي راسه دوم لما تظهرين فديتج مثل ما قالت اختي ام منصور،، احسن له من الجو وجي وبالمرة عن العين ربي يحفظه ان شاء الله
ارفعي عنه المكيف لما ترقدين وبالمرة لا تخلين سريره صوب المكيف .. بعديه عنه
الحليب هو الغذا الضروري للطفل بهالعمر وما انصحج تأكلينه شي لانه ما يقدر يهضم بعدنه الا فيما عدا اذا بتعطينه الشاي اللي حق البطن أو حق عوارض ثانية مثل اليانسون والبابونج << الله يكفيه الشر ان شاء الله ويحفظه
اهم نصيحة عندي لج انج (((((((((((( تقرين عليه حبيبتي ))))))))))))) خصوصا لما حد يزورج او لما بتطلعين مكان ،، ما تضمنين عيون الناس والعالم ،، وحتى لو اقرب الناس لج ،، واهلج ،، حاولي تقرين عليه يوميا وتحصنينه
الاذكار اليومية خصوصا والمعوذات واية الكرسي واهم شي اقري عليه (( اعوذ بكلمات الله التامة من كل شيطان هامة ومن كل عين لامة )) هاي المقولة كان الرسول يقولها حق الحسن والحسين حفيديه حتى يبعد العين والاذى..
حاولي قد ما تقدرين تبندين المكيف عنه لما يكون متسبح وبعد ما يخلص سبوح اتريى نص ساعة واكثر اذا بتشغلينه عسب عن يبرد ويزكم لا سمح الله.
دايما ادعي له في صلاتج ،، انه يكون ذرية صالحة وانه يرضي والديه وربه ويوفقه وتفتخرين به ،، بتتعودين مع التكرار خصوصا في سجودج .
اشتري له الكرسي الخاص للاطفال بالسيارة خصوصا لو كنتي انتي من النوع اللي يسوق سيارة ومتعودة عالطلعات وحابة تاخذينه وياج .. لانج لو ما عودتيه وهو صغير عالكرسي ،، لما بيكبر ما بيرضى يقعد عليه ،، حاولي تعودينه وتحطين جدامه شي يلهيه او بالمرة بيرقد اتوقع لانه صغير بهالسن ما بيكون واعي معظم الوقت.
اشتري له العربة عسبت لما تكونين بالسوق وتودينه وياج.
حاولي ترضعينه طبيعي بهالفترة لانه يكون الحليب وايد مفيد له خصوصا اول ثلاث ايام لانه يعطيه مناعة ،، وبتعرفين انه العكس يصير مع الاطفال اللي يرضعون صناعي بتشوفينهم وايد يمرضون ومنفخين عالفاضي من الحليب الصناعي وحساسية صدر ومدري شوي ولعوزة الله لا يراويج.
اول الايام اللي بتربي فيها بتحسين بفرحة كبيرة واحتمال شوية تعب لانج مب متعودة عالوضع بس مصيره البيبي يكبر بسرعة وبتحبينه وبتتعلقين فيه
واهتمي فيه بارك الله فيج …………
موفقة حياتي
يزاكم الله خير
