1) اكبر غلطة تغلطينها انج (تخرين) قصة حياتج واسرارج كلها بدون تفكير ..
انتي راح تكونين مندفعه بالغرام … ومنجرفه للحياة الزوجية .. لكن الريال راح يكون تفكيره غير
مثلا .. لو كان له علاقة سابقة .. ماراح يقولج مهما بلغت هذه العلاقة …(غالبا .. ويمكن يقول)
اما انتي قد تقولين له انك كنت معجبه (بفلان) .. او كلمتيه مرة او سلمتي عليه ..
ريلج راح يحط هالقصة في باله طول عمره … ولها اثار سلبية ..
اجلي مثل هالمواضيع شوية لما تتعودين عليه … وتعرفين طبايعه وميوله وافكاره ..
ويمكن ما يكون له داع تقوليله عن قصة مرت عليج ..
2) لا تذكرين عند الرجل عيوبك .. " انا عيبي ما احب احد يطلبني كذا .. وما احب احد يقعدني من النوم …الخ"
بعد ما تعرفين طبائعة وافكاره … اتركيه هو يعرف ان كان فيك عيب .. لتحاولي ان تغيريه او هو يغيره .
لان تنبيه الرجل على عيوبك فيه انتقاص منك .. تسلطي الضوء عليه
وفي نفس الوقت …. لا تبالغي في وصف حسناتك … لانها تنقلب ضدك
فخليج طبيعية وتواضعي … وهو يكتشف كل شئ بنفسه
……………… بس نبهيه قوليله انا بشر ويمكن عندي غلط او عادات ما تحبها … تحملني ونبهني عليها
3) لا تذكري له احلامك اللي قد يفهم منها انك طماعه او متطلبة ..
مثلا: لا تقوليله انا حلمي يكون عندي سيارة بينتيلي !!!
هو راح يتفاجئ ان لزوجته احلاما اكبر من امكانياته … بتصك فيه الدنيا
…… ولا تقولي انها مجرد احلام .. فهو قد يحسبها حساب ثاني …
4) تعودي ان تتركي له الخيار حتى لو جعل هو لك الخيار .. او اختاري الاقل حتى يعرف انك قنوعة
مثلا : قالج شرايج نروح نتعشى في شيراتون والا نقعد عالبحر …
قوليله … انت شنو اللي يريحك ؟؟ شنو ودك ؟؟
اذا اصر انج تختارين … قوليله نروح عالبحر عشان نقعد بروحنا بدون ازعاج وجرسونات .. ومن هالكلام
5) لا تبدئي بالتململ والحنة من بدايتها ..
وينك ما كلمتني البارحة ؟
كنت ناطرتك .. ليش رحت الديوانية ….الخ
اذا كنتي تبين توصليله الرسالة … بعد ما تسألينه وينه امس .. قوليله صراحة اشتقتلك البارحة .. او ضاق خلقي حدي كان ودي اكلمك …. ومن هالحكي
6) الاتفاق .. الاتفاق .. الاتفاق
لا تطيرين بالزواج والطلعات والوناسة ……………. وتنسين مستقبلج
من اول شئ … بهدووووء … وذكاء … ورقة … وانوثة
سأليه كل اللي في بالج حق المستقبل …
مثلا : شنو خطة السكن ……… وتناقشو
السفر … هل يحب السفر ويقدر عليه ………… وتناقشو
الديوانية
مشكلة كل بنات الكويت …. عرفي نظامه بالديوانية …. وقوليله خصص وقت لبيتك ووقت لربعك … ربعك انا اشجعك على انك تروحلهم وما تتركهم … بس بيتك لازم تعطيه حقه …
7) *********
عرفي هو شنو يبي منج … شنو يتوقع منج … جري لسانه … قوليله انا ما عندي خبره بالحياة
راح احاول اسوي اللي يرضيك … بس علمني شنو ودك اكون … وشنو ودك اسوي
قوليله …. تحملني … اصبر علي .. علمني … ابيك العمر كله … فلازم تتحمل وما راح اسوي شي ما يرضيك عمدا … انت نبهني اذا شئ يضابقك
قوليلة …. لا تتسرع بالحكم علي … التفاهم احلى شئ بالحياة
8) حاولي تعرفين بذكاء وبطريق غير مباشر …
مقدرته المالية … عشان تعرفين حدود طلباتج … وحدود مقدرته
علميه على الاقتصاد وعدم التبذير … عشان تبقون سعيدين ما تمرون بظروف صعبة
9)
مشكلة .. مشكلة .. مشكلة
امه … وامج … اهله .. واهلج
قوليله … ما شاء الله اهلك وايد طيبين (حتى لو ماكانو كذلك ) …
لكن ……… حبيبي … احنا حياتنا بروحنا
نعيش بيني وبينك باللي يرضينا … ونعيش معاهم باللي يرضيهم
راح اجامل اهل باللي يرضيني واللي ما يرضيني باللي اقدر عليه … لكن لا تزعل اذا صارحتك بشئ ما يعجبني
انت زوجي وسري عندك
لا تتضايق اذا قلتلك عن شئ بالعكس ساعدني
(( بس تاكدي من نوعه .. في رياييل … كلشي عنده ولا امه … لو غلطانه ما يرضى عليها .. تاكدي من علاقته معاهم))
10) ملاحظة .. ملاحظة .. ملاحظة ..
ديري بالج وانتي تطبقين اللي قلناه … مو تصيرين دفشة
تعاليله بهدوء .. واختاري الوقت المناسب … تشوفين انه متقبل اي شئ ..
واعرضي الموضوع باخف طريقة ممكنه … لا يحس انج قاعده تطلبين .. لا .. حسسيه انج تفكرين عشان متقبلكم ..
وو تقطين كلشي مرة وحدة … جنج تعطينه درس !!!
كل فتره او طلعه … قطي عليه وحدة .. جنه صدفة
الذكاء .. الذكاء .. الذكاء
استخدمي ذكائج .. حركي عقلج وانتي تتعاملين بهالامور … صيري لبيبه
( يعني عن البقارة ) ….. سوري .. انفعلت
شوي شوي … كل الامور تمشي … لا تصيرين مطفوقة متسرعة .. اول فكري بعدين تكلمي
مو .. قرقرقرقرقرقر .. على قولة الهنود
الله يوفقكم … ويسعدكم … ويتمم عليكم
وادعولي بالتوفيق والصلاح
…………………………. وتبقى مجرد وجهة نظر
م ن ق و ل
ملاحظه
يوم قريت هالموضوع وحبيت انقله لكم لن تذكرت في نقاط انا طحت فيها وقت ملجتي وصدق مشكله
يوم ريلج يكون فترة الملجه بالبدايه عسل ويقولج لا خشين عني شي انا ريلج لو الوحده مظايجه هني
من شي بحياتها عادي اطلعه وتقوله حتى لو من هلها وهذا اكبر غلط لا تقولين له شي عن ماضيج ولا عن مشاكل اهلج ابدا ابدا ابدا
دعواتكم لجوهرتكم بالتوفيج
احبكم في الله
