عندي موضوع ابا اخذ رايكم فيه لاني صرت احس عمري صج غبية .. و صرت اسمع من اللي حولي (انتي مالي اول .. عايشة في هالزمن بالغلط)
تستويلي مواقف مع اهلي و ربيعاتي استغرب منها .. قبل كنت متاكدة اني انا صح و هذا اللي عرفناه من ديننا واللي اهلنا ربونا عليه .. بس يوم صرت اشوف هالمواقف حتى عندي في البيت مع اهلي و خواتي شكيت بعمري قلت اسالكم واذا غلط لازم احاول اتغير
بقولكم اول موقف وياريت تخبروني بصراحة يمكن صج اذا مكبرة السالفة و هالشي عادي
عندي ربيعة من ايام المدرسة … يمكن هي الوحيدة من ربعي اللي ماقطعت علاقتي فيها بعد ماتزوجت لانها بصراحة هي اللي كانت حريصة على صداقتنا .. و مهما كنت ابعد هي كانت تتصل و ابد ماقطعتني
المهم ربيعتي هاي من النوع اللي (كيف اوصفها) من النوع الدلوع .. جي خلقتها دلوعة .. هي امها و ابوها مطلقين من كانت صغيرة و اتربت مع ابوها هي و اخوها اللي اصغر عنها و ماعرفت امها لان ابوهم منعهم يتصلون فيها.. المهم فهي كانت تخبرني بكل شي في حياتها و تقولي انا اعتبرج مكان ماما مع اننا نفس العمر بس هي يمكن لان ماعندها حد… و انا بعد كنت وايد ارتاح بالكلام وياها و احسها واايد قريبة مني
المهم … ربيعتي هذي يت في يوم و نحن في الجامعه و قالتي ان في واحد خطبها و هي وافقت ..فيوم سالتها عنه اعترفتلي انها اتعرفت عليه عالجات و كان بينهم اتصالات و هي ماخبرتني لانها تعرف اني بهزبها و بزعل عليها … المهم انا فعلا عاتبتها وايد لاني كنت شايفة ان هالطريقة غلط حتى لو ادت للزواج بس بعد غلط.. بدون تفاصيل زيادة تم الزواج و للاسف صار اللي توقعته طلع ريلها هذا من اول شهر يكلم غيرها و عادي يتكلم جدامها و يوم تزعل يقولها تراني تعرفت عليج بهالطريقة و انتي كنتي تقولين وقتها ان مافي غلط ان شاب و بنية يكونون اصدقاء و اكيدانتي بعد تكلمين شباب سوء عالجات او بالتلفون … المهم و ساءت الامور بينهم ووصلت للطلاق و فعلا تطلقوا ووقتها انا كنت خايفة عليها من هالتجربة تعرفون الطلاق صعب عالوحدة خاصة لو صغيرة و توها بتبدا حياتها .. لكن تفاجأت انها مرت من الازمة هاي بسرعة ولا كانها تطلقت … اكتشفت بعد جي ان الحبيبة كانت متعرفة على واحد قبل الطلاق و هو كان يوعدها انه بيتزوجها بعد الطلاق و هي طبعا كانت تخبره بكل اللي يصير بينها و بين زوجها
انا بعد الموقف هذا ما قدرت اكمل وياها ماحبيت ان وحدة بالاخلاق و هالتفكير تكون موجودة في حياتي .. و قطعت اتصالي فيها بس هي ما خلتني و تمت دوم تتصل و تطرشلي مسجات و تقول انها محتاجتني ووعدتني انها بتودر هالسوالف و هالحركات و انها ابد ماكانت تقصد تسوي شي غلط مجرد انها تبا حد في حياتها ..فانا رديت على اتصالي فيها بس مو مثل قبل
قبل فترة ربيعتي اشتغلت في واحد من هالبنوك … و طبعا تعرفون الشغل مختلط.. الحين و هي في الدوام علاقتها بالشباب وايد فري على حسب وصفها .. يعني مثلا الكل يعرف انها مطلقة (مع اني نصحتها ماتقول في الدوام انها مطلقة تعرفون الرياييل يعتبرون المطلقة وحدة سهلة فيحاولون يستغلونها) المهم هي خبرت الكل و خبرتهم بسبب الطلاق و كل شي … و مرات تتصلي و هي في الدوام و اسمع رمستها مع الشباب هناك كله ضحك و سوالف و هي بعد يوم تكلمني تخبرني عن سوالفهم عادي فلان قال و فلان سوا واللي يقولها انا بتزوجج و اللي يقولها انتي مجنونه من حقه ريلج يطلقج و سوالف من هالنوع طبعا يضحكون بس يعني ماشي حدود .. هي يوم تخبرني تتكلم على ان السالفة عادية و يوم تشوفني استغربت من هالتصرفات او احاول انتقدها تقولي هالسوالف عادية بين اللي يشتغلون مع بعض انتي ما تفهمين و ماتعرفين شي لانج ماتداومين يالسة في البيت(مع اني اشتغلت فترة و في مكان مختلط بس كنت اداوم بنقابي و الكلام مع الموظفين كان بحدود) ..
انا الحين صارلي فترة ما اكلمها و لا ارد على تلفوناتها … احس اني مو متقبلة وجودها في حياتي .. بس مرات يوم اشوفها كيف تتصل و تطرش مسجات تعاتبني لاني بعدت عنها احسها تكسر خاطري و اقول معقوله انا مكبرة السالفة؟؟ معقولة هالامور صارت عادية و انا المتخلفة لاني شايفتها عيب و غلط..خاصة انها مو الوحيدة اللي تسوي هالشي .. اختي و مرت اخوي بعد يداومون في اماكن مختلطة و مرات يتكلمون عن الشباب اللي وياهم و سوالفهم صح انها اشياء ابسط بس ماعرف
خبروني شو رايكم في هالموقف… و بخبركم بغيره بعدين الحين طولت وايد
حاولي تنصحينها مره واثنين وثلاثه واذا وصلت لتهديد هدديهاااا بشي تخاف منه
ذكريها بيوم القيامه والحساب
واذا خفتي انج تنجرفين وياها ابعدي عنها >> لانه الصاحب ساحب
والله يوفقج حبيبتي
لكن اذا عيت معاها النصيحه وخفتي انها تأثر عليج وعلى تفكيرج اتركيها ولا تمين معاها..
لأنه الفاكهه العدله جان حطيتيها مع فاكهه فاسده بتفسد..
انتبهي على نفسج اول شي وحاولي معاها بالطيب وبالشده..لكن اذا حسيتي نفسج بدت تظعف..ابعدي عن الشر وغنيله..
ربي يهديها ويهدينا والمسلمين اجمعين لما يحب ويرضى..
الله يوفقج اختي..
انا بس مستغربة من انتشار هالشي و كيف الناس صارو يشوفونه شي عادي كانه فعلا من متطلبات الشغل و الاختلاط .. اقولكم انا في البيت يوم اختي تقول شي مثل هذا حتى امي صارت تاخذه ببساطة و تقول الزمن تغير .. فهل فعلا صارت هالاشيا عادية؟؟
يعني كلنا عندنا ربيعااااات .. وفي منهن حشيمات وفي منهن نفس ربيعتج.. عاااااادي محد كاااااامل ؟!!!! كلنّ له اخطاااائه .. بس يوووم هي ما ظرتج اشعنه اتسوين جذي ؟!!
انتي من نفسج اتقوولين اختج ومرت اخووج نفس اربيعتج هذي .. ترضين تسمعين من وحده ترمس عن اختج بنفس طريقتج ؟! او انها تبي تبتعد عنها لانها شرااات اربيعتج ؟!! ليش عيل ما اتخلين علاقتج بأختج ومرت اخووج سطحيه او تبتعدين عنهن ؟!!!
انتي اكيد اتشووفين اختج زينه .. حتى لو انها اتسوولف صح ؟!
