السلام عليكم ورحمة الله وبركاته
بحثت في النت قبل السفر وللأسف ماحصلت معلومة تفيدني للسفر لكوريا الجنوبية
والدي مريض بالسرطان اسال الله العظيم رب العرش العظيم ان يشفيه
تيسر له العلاج في كوريا وكنت متخوفة خصوصا انه اعتذر عن استقبال حالته احد المستشفيات وواحد مارد ومارد علينا الا مستشفى سامسونج
وبفضل من الله ترتبت الامور
بداية طلعت للسفارة الكورية شارع الدفاع اظن المنطقة يسمونها معسكر النهيان
واخذت معاي جوازات وخطاب من مكتب العلاج بالخارج وصورة شخصية لكل واحد ومبلغ اتوقع 165 درهم لكل جواز ، ناسية صراحه
ولخدامتي (حسبي الله عليها، لانها شردت في كوريا) خذت جوازها وصورة شخصية والمبلغ وشهاده راتب لي وكشف بنك لي لثلاث شهور
وخطاب بخط يدي يفيد انه انا مسؤولة عنها وعن مشاكلها لو سوت شئ وتذكرة ع طيران الاتحاد (درجة سياحي فقدتها) وحجز الفندق
وفي نفس اليوم المغرب استلمت الجوازات فيها الفيزا لان حالة ابوي عاجله
وعطونا فيزا لمدة ثلاث شهور دخول لمرة واحدة
قبل السفر لازم بنات يكون معكم صور شخصية لكم لان بتتبهدلون لو احتجتوا صور شخصية لتجديد الفيز ويكون معاكم صور من وثائقكم مثلا جوازات السفر.
بنات في المطار على هالبلاوي الى انا شلتها حصلت بنيه مواطنه تجنن ساعدتني وايد ربي يوفقها ويسعدها وانا من منبري 
هذا أشكرها
أسمها شيماء الزرعوني في طيران الاتحاد رجال الاعمال على التذاكر يالله شو أخلاق شو طيبة شو روح ربي يحفظها لعين ترجاها
انا داشه عليها بكرتون كبري وانا واقفه قالت وزعوها فورا وفرت لي كرتون ثاني وزقرت الحمالين وساعدوني وزعو قواطي التونه بين الكراتين
لانه بناتت لازم مايزيد وزن اي كرتون او حقيبه عن 35 كيلو
طبعا ربي يحفظ دولتنا انا وامي وابوي درجة رجال اعمال (كانت رحلة مأساه من شدة ماكان ابوي تعبان ومانام يتقلب طوال فترة الرحلة (8:25) هذي مدتها
اما العودة ترى (10:15) ادري اطول ولكها سيده بس اتوقع السبب يمكن عكس اتجاه دوران الارض <<< بدت ام العريف تتفلسف
أما شنطة الروشن 
إليكم التالي:
مكعبات ماجي … هيه ماجي حبيبي الأزلي ماعرف اطبخ بدونه بتحصلون ماجي في شارع العرب (ايتاوان) (Itaewon-dong)
لكن الماجي عندهم تقولون حصاة لاطعم ولاريحة
هريس أو جريش
قهوة ومعاميلها مثلا هيل وزعفران
بهارات
دهن (سمن)
تمر
إلي يحب ياخذ عيش (رز) ترى فيه في شارع العرب بتحصلون نوع خمسة كيلو كيسته خضراء بلاستيك قوية هذا زين كبسات.
لكن الي يحب العيش الابيض (رز سادة) ترى ولا رز بستمي حلو في كوريا ينطبخ بروحه ماعندهم الا نوع او نوعين وماتنفع سادة عشان مايبين الطعم
خبز خبز خبز (على قولتهم خبز وقافي) او هاتو خبز من الدكان وجمدوه هنا مايعرفون الا التوست
دقوس (شطة) ماعندهم الا تباسكو الحمراء حتى الخضرا موب عندهم وانواع ثانيه في شارع العرب تمشي الحال لكن ثقيله موب سائلة مثل دقوس بوطير
الجبن الكريمي مثل بوك وكرافت ماعندهم. الي عندهم جبن شرائح وجبن مثلثات ماعندهم جبن كريمي. عندهم بس لبنة فيلادلفيا
قواطي التونه بالذات الى بزيت دوار الشمس خذت معي قواطي بالهبل عندهم تونه لكن للان ماتوفقت في نوع لذيذ
الاندومي في كوريا أشكال وألوان لكن انتبهوا اغلبها مطبوخ بمرق الدجاج او مرق الخنزير، فبلاش منه
والله يعينكم على شارع العرب تشترون اندومي من هناك اذا اشتهيتوه
وأكياس لحم من كارفور أكياس بلاستيك لانه راح تشترون لحم اكيد في كوريا ودجاج فلازم قبل تجمدونهم توزعونها لكل وجبه في كيس، اسهل للتذويب قبل الطبخ
سفرة بلاستيك خذو اخف شئ تجي خمس ربطات صغار تنباع مع بعض تعرفون وراكم شحن
ماي زمزم لابد منه
عسل سدر للعلاج لانه ماعندهم
حبة البركة + خيلة (حلتيت) + مرة + قسط هندي (ومن الطب الشعبي) لاتقصرون
لاتنسون البنادول ترى ماعندهم بنادول
الباقي متوفر حتى الحليب هنا متوفر كرنيشن بس في شارع العرب ، الروب كله عندهم بسكر الا انواع بشارع العرب نفس روبنا
اللبن الحامض موب متوفر
الخيار غريب نحيف وطووويل وكل حبه مغلفه
انا اخذت معاي كالعاده ممنوعات 
وهي (إقط) و (لحم شريح) يعني لحم حاشي مجفف بالملح وتحت الشمس 
اللحم (لحم التيوس) الشباب المواطنين يتواصلون هنا مع واحد عربي في مزرعه خارج سيؤول ويوفر لهم الذبيحة بعد ثلاث ايام تيوسهن صغار حيل
اما الدجاج متوفر في شارع العرب، نصبحه خذوا دجاج بعظم انا تميت فترة بدجاج منزوع العظم صراحه هو منزوع طعم وعظم ماله طعم اعزز النكهه بمكعبات ماجي
خواتي انصحكن من قلبي اخاف عليكن من الحرام
بنات لاتاكلون بيتزا بدجاج او برجر دجاج او اي نوع لحوم على اساس انها اكل اهل الكتاب (اغلبهم بوذي او ماله دين)
ترى لحومهم كلها لحوم ميته ولايجوز اكل الميته لانهم مايذكونها يذبحونها بالصعق او مكائن وانا موب مفتي لكن ابحثوا واقروا
خلصنا من الروشن، ننتقل لامور أخرى متفرقة تهمكم
الاتصال والتواصل:
لحد منكن تاخذ تلفون نوكيا بو بجلي (بوكشاف) عشان تشغل فيها شريحة كورية أو شريحة الامارات كله عشان ماتشيلين شريحة الامارات من الايفون والسامسونج <<< هاهاهاها أحلمي ياختي
لان نظام التشغيل عندهم ماينفع فيه تلفونات بوطقة لا لازم تلفون سنع عشان تشبك الشبكة وتستخدمينه
لحد يسألني عن خدمة النت ماعرف انا من بين السكن والمستشفى والواي فاي متوفر وانا موب من اهل البلاك بيري فماراح افيدكن
بس سمعت ان النت خدمة سنوية بحدود 190500 وان >>> يروع صح خلاصته 19 دولار امريكي ونص
النظام عندهم غريب شوي (طريقتين)
الطريقة الأولى: أما تشترين تلفون كوري مستعمل بشريحه في الشارع العربي أقل من (100 ألف وان)
حد اعرفه أخذ موبايل بشريحته بمبلغ (50 ألف وان) من واحد بنغالي في شارع العرب
أما أختكم في الله أشتريته (190 ألف وان) من غانجنام (Gangnam) ومستانسه على بالي انا كسبانه، ضحكوا علي.
وعلى فكرة بتكتشفون هالامر (أقصد سلعة في مكان وسعرها في المكان الثاني الضعف او اكثر )
واذا الموبايل شاريته من كوريا احلمي تكتبين مسج بالعربي او تستقبلين مسجات عربية.
الطريقة الثانية: تستاجرون جهاز مع شريحة موبايل مع شريحة وهذا الامر مكلف إذا انتم علاج وبتمون أكثر عن شهر ، فماله داعي خذي مستعمل ومتى ماسافرتي بيعيه في شارع العرب 
وعندي كم نصيحة للتواصل مع الاهل في الامارات:
اول طريقة اذا عملاء اتصالات خدمة واصل تشتركون في خدمة تستقبلون مكالمات في الشهر مدتها 500 دقيقة بمبلغ 200 درهم
ثاني طريقة لاتقصرون في السكايبي والتانقو والفايبر وهالسوالف المجانيه تهبل 
ورخيصة وتبرد الخاطر شوف صورة وسمع صوت
نجي للأواني :
حافظات حرارية (مكبة) مابتحصلونها ابدا كثروا منها ومابتندمون ، فناجيل استكانات
دلال (ثلاجات للقهوة) تعرفونها الدلال هذي موب متوفرة بنفس الاحجام الي عندنا حدهم ربع لتر كانها مال الماي الي نحضر فيه رضعات المواليد
عني أنا بقول لكم شو شلت بس لاتنصدمون
حافظات حرارية ثلاث أكبار وثنتين وسط وثلاث صغار (روعه للتوزيع على الجيران وفي المستشفى)
الدلال تقريبا خمس دلال مختلفة أحجامهن من لتر لحد لتر وثمانمية ، واستكانات وفناجيل
قدر ضاغط لزوم الذبائح أعرف العرب الي وياي يحبون يعزمون وعلى تيوس بعد
صحون كبار للعيش 2
فرن كهربائي تعرفونه مال خبز الخمير (نفعني لان شقتي مافيها فرن والحمدالله حمرت فيها الدجاج)
وصاج لخبز الرقاق ومااستفدت 
لانه عين النار صغيره خفت احرق الطاولة لو حطيت الصاج
وغلايه ماي استخدمها للقهوة من اللولو بحدود 65 درهم (من داخل الابريق مافيها وايرات ولا حدايد ساده)
وغلايه ماي صغيره حق نفرين اخذتها من كارفور 78 درهم
وكوايه بخار فيلبس من كاروفور اقل عن 300 درهم لونها ابيض وراسها عيناوي حلوة
وشواية توست مااذكر كم اخذتها بحدود مية درهم من كارفور
الكهرباء:
الفولت 220 مثل الامارات لكن فيه مشكلة ثانية في الامارات راس الفيش او راس الواير ثلاث حدايد صح وفي الجدار ثلاث فتحات.
في كوريا للاسف بس فتحتين فكيفكن تحبون تشترون محولات لاجهزتكن بين ثلاث روس والفتحتين عشان ماتتوهقون فهذي نصيحتي.
الملابس :
انتي مسلمة أعتزي بعابيتج ، المسلمات المغتربات سواء للدراسة او للعلاج ماشاء الله عليهن الكل هنا إلى بحجابها والى بعبايتها
وبعضهن والله العظيم بنقابها وقفازاتها وعباياتهن السودا
ولا عليهن من حد ويروحون ويردون على التاكسي وفي المستشفى وفي السوق ومحد ضايقهن
لاتظنون بتغييركن لبسكن انكن خلاص ضمنتن الامان
وعلى فكرة الكوريين شعب طيب جدا يطالعون للمرة الاولى ويخزون من الصدمة وعقب يصدون
اساسا منو فاضي يطالعكن؟؟؟ حسستوني انكن نجمات هوليود
بتشوفونهن يراكضن لانه موب متفيقين حق المطالع
شعب يحب الفزعه والمساعده بس وتبون تتأكدون مسكوا خريطة بتشوفون الكل يفزع حتى لو مايعرف انجليزي
على طاري الانجليزي اه ياللغه بتفطسون ضحك واللغه مكسرة ام التكسير او للاسف ولا شئ ولا كلمة ولا بتفهمون شئ
وهنا اشتغلو حركات بالراس واليد وكل شئ عشان يفهمون
اذا مريضكم في مستشفى وفي اي فصل من فصول السنة ترى مستشفياتهم وفنادقهم حاااارة التدفئة نظامها تحت الارض يعني وانتي تمشين الارض دافية وحر فلاتظنون برد وتتعبون بشيل اللبس الثقيل
متى يسكرون التدفئة شهر أبريل قبلها تدفئة
والله كلنا يالمواطنين في المستشفى صرفوا لنا مراوح في عز الجليد والبرد
ابوي مرقد وبرى جليد والمستشفى حار مانقدر ننام وهم يقولون نظام التدفئة مانقدر نتحكم فيه
لا خففو اللبس الله يرضى عليكم خذوا لبس واحد للطلعه متين
لتجديد الفيزا:
لتجديد الفيزا لو تميتوا اكثر عن ثلاث شهور قبل تنتهي الفيزا بثلاث اسابيع السفارة الاماراتيه بتطلب منكن التجديد
ولازم تاخذون خطاب من السفارة للمريض الى مرقد في المستشفى قبل تودون جوازه وياكن عشان ماتتوهقون وتتاخرون مثلنا ويردونكم
والطريقة سهله فقط وفروا صوركم الشخصية وسيارة السفارة بتشيلكن مع مترجم لمقر حكومي خاص بالفيز وبتدفعون على كل فيزا (130 ألف وان )
تقريبا (450 درهم) وأسبوعين وتظهر الجوازات وكله عن طريق السفارة (ربي يطول بعمر شيوخنا ويديم بلادنا)
الفلوس والصرف:
السفارة تصرف لكم كل يوم خميس (للمريض 200 دولار أمريكي وللمرافق الأول 200 دولار أمريكي وفي حال وجود مرافق ثالث 100 دولار أمريكي )
طبعا عدد المرافقين يتحدد حسب عمر المريض ان كان المريض فوق 65 سنة يحق له 2 مرافقين
وان كان اقل من 14 سنة اظني نسيت يحق له 2 مرافقين وماعرف اذا فيه شروط اخرى مثلا اذا المريض حرمة مادري.
نصيحة فتحوا حساب في بنك نفس البنك الى تصرفون شيك السفارة منه أريح لكم من شيل الفلوس وسهل جدا فقط صورة جوازكم
على طاري صورة الجواز السفارة بتعطيكم بطاقة فيها معلومات بالانجليزي وبالكوري وصورتكم وتعتبر اثبات هوية بدل الجواز
لانه المرافقين الرسميين والمريض السفارة بتمسك جوازاتهن ، ومتى حد منكن تبي ترد للبلاد بتاخذ جوازها لكن بالمقابل راح يخصم المبلغ الى يصرف للمريض
الدرهم الاماراتي يساوي تقريبا بنات (ثلاثمائية وان) (300W)، وعشان ترتاحون في الحسبة كل ألف وان تساوي تقريبا دولار امريكي
في عقلكم حسبوها لكن موب يكون معكم دولارات وتشترون بها على اساس ان كل الف وان يساوي دولار لا لايضحكون عليكم، لان الدولار اعلى من الالف وان
وفي حال بقى معاكم فلوس كورية قبل تردون ابوظبي حولوها دولارات أمريكية والله انهم بيخسفون ام العمله الكورية وبتخسرون وايد
اسالو مجرب يتنا اختي وردت وخسرت وايد في الصرف
العملة الورقية عندهم (50 ألف وان) لونها أصفر
و (10 الاف وان ) لونها أخضر
و (5 الاف وان) لونها وردي
وعندهن ألف وان لونها أزرق
اما المعدن مختلفه
وفيه (T money) هذا حلو تعبونه من المكينة فلوس بدال ماتشيلون كاش ومعادن وهو على اشكال اما مثل البطاقه مالت البنك او مثل الفلاش ميموري وتعلقونها في الموبايل
مكائن بيعه في كل مكان تقدرون تحاسبون المواصلات وبعض الدكاكين بواسطته
المواصلات:
التاكسي اول شهر بتتعبون نفسيا من الريحة الشنيعه ثوم مركز عقب بتتأقلمون وماعاد تشمون الثوم
وطبعا التكاسي هنا أكثر من شركة بكتب عن أشهرهن حسب الالوان لاتحرجوني تقولون شو اسمائهن
فيه التاكسي الرصاصي يوصلني للمستشفى من 8 الاف لحد 10 الاف وان
فيه التاكسي الابيض من 8 الاف لحد 10 الاف وان
فيه التاكسي البرتقالي من تسع الاف لحد عشرة الاف وان
فيه التاكسي الاسود (هذا يعرف انجليزي وللاجانب مثلنا) 17 الف تقريبا
التاكسي الاسود مفتري لانه للاجانب ولان الكرسي الى بالخلف يعني كراسينا تقدرون تتحكمون بها وبين الركاب ورى سناده تتحكمون بالمكيف وغيره
القطار او السب وي تاخذون تذكرة من المكينه وتحددون الموقع من الخريطه ويطلع الكرت تقريبا المشوار من 1600 وان لحد 3000 وان
والحلو فيه مكينه ترد لكم فلوس اذا خلصتو الرحله قبل تظهرون من المحطه دخلو البطاقه في مكينه وترد لكم 500 وان وناسه 
والسب وي (القطار) اغلب خطوطه تحت الارض و روعه لكن ساعات الذروة انتبهوا منه ومن التاكسي وغيرها زحمه شنيعه
القطار تكدس بشري ويمكن تمر ثلاث قطارات ورى بعض وماتقدرون تطلعون فيها من الزحمة
والتكاسي والباص من زحمة السييايير
ساعات الذروه حسب تجربتي الصبح للساعه 8 ونص
والساعه ثلاث العصر للساعه ست المغرب شنيع الدرب زحمة
الباص اذا انتم عائله لاتجربونه بتلوع جبودكم من كثر مايوقف ورخيص تقريبا كل واحد 1600 وان
القطار اذا انتم اكثر من ثلاثه التاكسي اوفر لكم
في حال لاقدر الله مرضتوا لاتحرجون اعماركن وتدقون على السفاره وتقولون احنا صايبنا حمى ولا حساسية ولا …
بلاش احراج شلو اعماركن لاقرب طواري وودوا معاكن بس اثبات الشخصية اسمكم كتبوه اول شئ العائله عقب اسمكم الاول
واهم شئ تاريخ ميلادكم وبطاقه الفندق ورقم تلفون عشان تعبون الطلب
بيكلف تقريبا الكشف حدود 80 الف وان يعني 80 دولار امريكي
مو مستاهل الامر نترجى حد في السفارة يفزع لنا صح بنتبهدل في اللغه لان لتهم الانجليزية عدم بس مشوا اعماركن
في الطيارة:
لازم معاكن عنوانكن في كوريا بالانجليزي ورقم تلفوناتكم في كوريا وفي الامارات لو مو متوفر كوريا لاعوان ولا رقم مو مشكلة
ووظيفتكم بالانجليزي
بيوزعون عليكن ثلاث اوراق
كل واحد يعبي ورقتين والورقه الثالثه للعائلة وهذي الطامه هالورقة فيها اسئله من ضمنها هل معك لحوم ومنتجات ألبان طبعا معي كتبت لا مامعي شئ
الورقتين فيها بيانات شخصية وعن الحواز وعنوانكم وايضا عدد الدول الى زرتوها في اخر عشر ايام وهل زرتم اي مرزعه في هالايام
عبوها قبل تنزلون عشان ماتتعبون في المطار
آخر شئ الهدايا:
حلو بنات تاخذون من الامارات هدايا تذكارية للكوريين
مثلا مجسم الشيخ زايد الله يرحمه او مجسم برج خليفة او سفينه عليها شعار الدولة
وايضا لو تاخذون بطاقات عليها شئ من بلادنا نكتب فيها عبارات شكر
ولاتنسون التمر المغطى بالشوكليت او المعمول
او اساور تدلى منها براقع او مجسمات عن تراثنا هدايا للمرضات
ليش انا اقول هالشئ لانه احنا باخلاقنا وبطيبتنا نبي نعطي الكوريين سمعه طيبة عنا
وهم شعب خدوم ومعطاء ونصيحة دخلنا مستشفى سامسونج حصلنا ناس يذمون رئيسة المترجمات (أسمها العربي فلة)
وناس يتكلمون في المسؤله بين مستشفى سامسونج وهيئة الصحة أسها (آآن)
والله للان ثلاث شهور ماقصرو ابدن في الاسبوع الواحد بدون مانطلبهم شئ
يطلون علينا ويسألونا شو بخاطركن مرتاحين ولا لا واي شئ نطلبه يوفرونه
فلاتاخذون تجارب الغير وتحكمون على الناس من تجربتكم بتكتشفون ان غيركن اخطأ وعق خطاه على غيره
طبعا للان الاسر الاماراتيه تتوافد حد من الشمال حد من دبي حد من بوظبي حد من دلما (البيت متوحد ربي لك الحمد)
وموزعينا في مستشفيات كوريا احنا في مستشفى سامسونج في بنايه اسمها مركز السرطان غرفها شوي ضيقه وفيه في المبنى الرئيسي
وهناك قصة مضحكة في دور في المستشفى في المبنى الرئيسي رقم 19 هذا لشخصيات الهامة
فيه صالة عوده فيها جلستين وحاطين على كل طاوله تعليمات انه رجاء ممنوع التحدث بصوت عالي
ممنوع احضار الاكل هنا
ممنوع وضع الارجل على الطاولة
فديت اهل بلادنا استحلو الصالتين وكل شئ ممنوع سووه وماعليهم من حد
معاهم بوطير <<< خخخخ
اشتكوا الكوريين لادارة المستشفى
حاولت المترجمة تتفاهم معاهم عصبوا ، المشكلة انهم يشوفون انه من حقهم الي يسونه وماعليهم من حد
طيب ياعالم تراكم اقل عن مليون في بلادكم وماراح يطب كوريا في السسنة منكم الا بالكثير مئة مريض
كيف اخسر 12 مليون كوري عايشين في سيؤول فقط
الله يهدي اهلنا ويهدينا
بنات تعبت وتيبس ظهري
اتمنى اكون نفعتكن
وأسأل الله العظيم رب العرش العظيم ان يشفي ابوي وجميع مرضى المسلمين
في امان الله
اي سؤال من عيوني بس ماعرف اخاف تنط لي وحده بعد سنة تسال واكون ناسيه
ومحد ضامن عمره وقتها <<< بسم الله علي
فسامحوني مقدما
عموما انا حاضرة لاسئلتكم
البشكارة هربت (خدامتي الفلبينية) فأخذت ورقة من السفاره اتوقع 50 ألف وان الرسوم تفيد ان خدامتي هربت وراسلو الهجرة والجوازات الكورية
وعطوني صورة من الخطاب وسالوني اذا كان جوازها وياها قلت هيه قالو ممتاز عشان مانتوهق في الجواز ولازم تطلبون منهم يدخلو هروب الخدامه في النظام .
الخطاب مدته شهر فلازم خلال هالشهر تودون الخطاب لابوظبي وتصدقونه من الخارجية بالدرهم الالكتروني اتوقع اقل عن 200 درهم
وعقب تروحون للجوازات يلغونها (الله ياخذ حقي منها قاهرتني لانها للان تكلم البشاكير في ابوظبي وتعلمهم بعلومها)
الفلبينيات لسن بثقة الا من رحم ربي
سبحانك اللهم وبحمدك اشهد ان لا اله الا انت استغفرك واتوب اليك
اتمنى والله دوم انفع الكل
بخصوص الهدايا كتبت مجسم الشيخ زايد انا قصدي مجسم مسجد الشيخ زايد الله يرحمه ويغفر له
واسال الله العظيم رب العرش العظيم ان يشفي والدي
نسيت اخبركن ترى في مطار كوريا قطار ينقلنا من مبنى الى نزلت فيه الطيارة لمبنى الجوازات واستلام الحقائب فعادي يوم ينزلون الناس من الطيارة سيروا وياهم واستمتعوا
بالتوفيق
المشاركة الأصلية كتبت بواسطة حلا الشام 
ياويل حالي
أحرجتيني .. أستحيت .. فديت الى تمدحني وين بنات المنتدى تسمعون حلا الشام الله يحرر شامنا
آمين
بوركتي أخيتي
اسال الله ان ينفع بما كتبنا
ممكن اعرف السفر لكوريا اول مرة وعلاج على حساب الدوله يحتاج فيزا
