شحالكم خواتي
عقب 10 ايام ان شاء الله بسافر لندن وباريس ^____^
وعيالي وياي اكيد. عمرهم اقل عن 5 سنوات
فشو من الاغراض المهمه الي لازم اخذها وياي
انا كتبت لسته
بس قلت اسال يمكن نسيت شي
ويزاكم الله خير
وادعولي بسفرة حلوة ^_^
لصق جروح يكون في الشنطه وياج
شليلهم لحاف او كمبل من النوع الخفيف للفندق لانه الفندق بيحط شراشف ما ادفي
الحيلب الي يشربونه
و ليفه مع لوكس للمراضع او الاكواب
بويلر او سخان ماي اصغر مقاس ولا تستخدمون مال الفندق >< لانه اكيد بيكون مب نظيف اما فيه كلس او مصدي شوي
مناديل ديتول المنديل الواحد يكفي 3 لانه وايد كبير و فيه رغوه ولا تستخدمين المطهر السائل مب زين لهم
والله يعينج معاهم ^^و ان شاء الله تستانسون
الله يعينج عليهم وان شاء الله تستانسون كلكم
شنطة ايدج:
* بطاقات ثقة في حال احتجتم تعالجون هناك أو للطوارئ (عساكم ما تحتاجونها) .
–>أذكر ريلي كان ييب اوراق رسمية من صحة (أو العيادة ما ادري) عسب تغطي البطاقة حالات الطوارئ بالخارج.
* علوك–>بما انهم اقل من 5سنوات خذي وياج إلي عادي تنبلع (بطعم الحلاو أو الفاكهة)
* مناديل معقمة.
*مناديل منعشة.–> في حال رجع حد منهم عقب ما تغيرين ملابسه وتغسلين ويه؛ امسحي ويهه وذرعانه. (عن ريح الزوع). أو دهن عود بس بعض المطارات يمنعونه وياخذونه
بالشنطة إلي بتاخذينها داخل الطيارة -بتحطونها فوقكم- :
* العابهم النقالة (ds أو psp وما شابهها ) تسليهم خلال وقت الرحلة , وتأكدي انج شاحنتها فل .
* شوية سناكز-وجبات خفيفة (سندويشات وبساكيت وعصاير) –> لا حلويات ولا كاكاوات.
* بلوزة احتياط وسروال خفيف وكيس بلاستيك صغير–> (في حال رجع (زاع أو تقيأ) حد منهم بالطيارة لا يتم بالملابس الوسخة.)
* رضاعات و كونتينرز (حاويات) الحليب البودر مال الأطفال –> في حال كان حد منهم لا يزال يرضعها.
* الأدوية (قطرة أذن + قطرات ماي وملح "مو البوكس كامل .. يكفيج صف يعني اربع حبات + خافض حرارة "ادول شراب"+ دواء للترجيع "ناسية أسمه"+ مرهم ميبو أو أي شي للسعات الحشرات وما شابه + كريم كومباكومب أو أي شي غير حق تسلخات التهاب منطقة الحفاظ).
*بامبرز (3 حبات للكل قياس) +مناديل تنظيف wet wibes + كريم لمنطقة الحفاظ -افضِّل إلي على شكل معصار او مرهم- + الفرشة البلاستيك للتبديل chamgimg mat .
–> السنة الماضية ماخذة أنا من بيبي شوب شنطة صغيرة اذا فردتيها صارت فرشة وفي واحد من اطرافها شنطتين شبك واحد للبامبرز والثانية فيه بكس بلاستيك احط فيه المناديل المنظفة .. والفها مثل الرسالة وعادي اعلقها بترولي اليهال .
*
بشناطكم الي بالشحن:
* شراشف sheets واغطية مخدات و بطانيات لليهال .
* خذي قواطي حليبهم إلي بتكفيهم طول الرحلة (البودر لأنه احتمال ما تحصلونه هناك)
*شواحن ألعابهم.
* البامبرز (أنا آخذ من كل قياس اصغر كيسة .. لين يمديني استقر واسير اتشرى لهم زيادة).
* فوط لهم (كل واحد وحدة).. خذي الخفاف مو الثقال عسب مساحة الشنطة (أنا ماخذة من المعرض خفاف وعليها ورسومات كرتونية)
*شامبو يهال ينفع للشعر والجسم ويفضل يكون اصغر حجم.
* فكس (للاطفال) حجم صغير.
* خذي لهم على لبسة وحدة ثقيلة وجاكيات ثقال ( لكل واحد واحد بس) ينفع للجو البارد والمطر+ لكل واحد اندروير ثقيل thermal
لا تكثرين ملابس : لكل واحد منهم بالشنطة 2من البناطيل 1 منها جنز وواحد برمودا و4 من القمصان او البلايز والاحسن يكون بعضها بأكمام طويلة لكن مو ثقيلة وايد. + 3 بيجامات
–>في حال احتجتم زيادة الاسواق عندكم
** بخصوص الملابس اليهال بالمطار كل واحد منهم بيكون لابس بنطلون طويل (مكيفات الطيارة تمرض اليهال + التوب يكون بكم طويل) والاحسن يكون قميص بأزرار -عسب تفسخينه بسرعة وبسهولة اذا لا سمح الله رجع ووسخ لبسه . جاكيت أو سويتر (وسط نفس مال المدارس مو ثقيل وايد)… في حال وصلتم بالسلامة هناك يمكن يكون الجو بارد برع المطار..
وأخيراً :
لازم كل ياهل تحطون عليه تعريف مثل الاسم ورقم موبايل الوالد مثلا … يا بطاقة ادبسينها بملابسه أو الي على شكل اسوارة أو ساعة تلفينها على ايد الياهل … تكتبين اسمه بالانجلش و رقم حد منكم (طبعا الرقم الي بتستخدمونه خلال الرحلة )…
ومن بيبي شوب بتحصلين الشنطة الي يلبسها الياهل ومعها خيط عسب ما يركض فجأة ويضيع .. نفس الصورة
أو الخيط من مذركير طرف بيدج والثاني بيد الياهل ..
والله يسهل عليكم وتردون بالسلامة وانتم مستانسين
وهذي اللستة هي إلي أنا معتمدتها والحمدلله ما قد تورطت بسفراتي لأني دايماً افكر بأسوأ السيناريوهات إلي بتصير معي…
لأني نفسج اسافر مع عيالي دايماً حتى لو كان اصغر واحد منهم عمره شهرين (ما اروم اخليهم عند حد)…
ودايما قولي (اللهم اني استودعتك اولادي فاحفظهم يا من لا تضيع ودائعه)
اهم شي ادول لاسمح الله ارتفعت حرارتهم
او تحاميل على حسب انتي شو تستخدمين
قطور عن الزجام وااعراض البرد
فكس ههههه اهم شي عندي
مناديل ديتول
نسيت اقولج في ايكيا يبيعون شي شرات القميص تلبسين الياهل عسبتان ما يوسخ ثيابه وايد مفيد حق طلعات المطاعم
المشاركة الأصلية كتبت بواسطة هوى الروح 
لصق جروح يكون في الشنطه وياج
شليلهم لحاف او كمبل من النوع الخفيف للفندق لانه الفندق بيحط شراشف ما ادفي
الحيلب الي يشربونه
و ليفه مع لوكس للمراضع او الاكواب
بويلر او سخان ماي اصغر مقاس ولا تستخدمون مال الفندق >< لانه اكيد بيكون مب نظيف اما فيه كلس او مصدي شوي
مناديل ديتول المنديل الواحد يكفي 3 لانه وايد كبير و فيه رغوه ولا تستخدمين المطهر السائل مب زين لهم
والله يعينج معاهم ^^و ان شاء الله تستانسون
تسلمين اختي عالمشاركة. وزين نبهتيني. كم غرض نسيت اكتبه
والله يسمع منج وتكون سفرة حلوه
