مندي الدجاج بطريقة سهلة جدا وتنفع للعزائم والولائم !! من مطبخي وبالخطوات المصورة !!

يبتلكم طريقة جدا بسيطة وسهلة للمندي

والطعــم ولا أروع !!

وتنفع الطريقة يوم تكوني عازمة ناس , وما عندج وقت
فهالطريقة تساعدج انج تخلصي بسرعة , والطعم والشكل روووعة !!

اول شي نييب قدر كبير ونحط فيه الدجاج عقب ما نغسله زين
ونحطه ع النار ( انا سويت دجاجة ونص )

عقب ما يتوغر نضيف له البصل المقطع قطع صغيرة , وعقب الثوم والزنجبيل المفروم
واذا حبيتي ممكن تضيفي له فليفلة ونضيف له الملح والفلفل الاسود والبهارات الصحيحة مثل : القرفة والهيل والسنوت والزبيب .

ولين مايستوي الدجاج , نحضر الاتي :

1- نغسل العيش ( انا سويت 3 أكواب ) ونحطه بماي به ملح ( هالطريقة تخلي حبات العيش تطول ).

2- نخلط ملعقة صغيرة من ملون الطعام الاحمر مع ماء الزهر او ماء الورد (ولو عندج زعفران يكون أفضل بدل الملون ).

3- نجهز فنجان او كوب معدني صغير بزيت الزيتون او زيت الذرة .

4- نجهز هالخلطة عشان عقب ما يستوي الدجاج ونطلعه من الماي , ندهنه بالخلطة وندخله الفرن عشان يتحمر .
والخلطة هي : (مكعب ماجي + بهارات الدجاج + شوي خل + زيت زيتون +عصير نص ليمونة + ربع ملعقة صغيرة ملون الطعام ).

وعقب نحط العيش بماي الدجاج ونضيف له الملح ونخليه يغلي لين ما يستوي العيش نص سواء ونشخله.

ونضيف شوية سمن بالقدر ونحط فوقه العيش , ونحط كوب الزيت بوسط العيش وعلى اطرافه نصب ملون الطعام بماي الورد.

وقبل ما نسكر غطاء العيش , نحط جمرة فحم ع الزيت ونسكر العيش بغطاء محكم الاغلاق .

ونخليه يستوي ع نار هادئة , وعقبها ب 10 دقائق نحط قطع الزبدة فوق العيش .

ونخليه مدة ربع ساعة ونسكر عنه النار .

وعقب ما يتحمر الدجاج نحطه فوق العيش وقت التقديم .

وبالهنــاء والعافيــة ^^

ودعواتــكم لي أربي بالسلامـة ,,