همسه للحوامل البكر . ^_^

الحالة الأولى :

وحده سوّت كل الأمور و التجهيزات اللي فوق ..
وما خلت شي ما سوّته
و عقب اسبوعين من الولادة ..
اتضح ان الجنين يعاني من تخلف عقلي ..

الحالة الثانية ..

و هي قصة واقعيه لأحدى الأخوات الحبيبات في المنتدى
جبر الله خاطرها وألهمها الصبر و السلوان ..
فقدت جنينها بعد 20 يوم من الولادة بسبب إصابته بإلتهاب رئوي حاد ..
عوضها الله خيراً و جعله شفيعاً لها ..

حالة ثالثه … و رابعه … و خامسه ..

كل واحده منا ترى و تسمع في المجتمع المحيط بها قصص يوميه
عن حوادث فقدان الجنين ..

—————————-

لست هنا اليوم لأثقل عليكم بحديثي حبيباتي

و لكنها مجرد همسه و تنويه ..
لأخذ الاحتياط و الحذر .
لأن العين ( حق )
ولو كان شيء سابق القدر سبقته العين ..

ما عليه ..

الوحده تهتم بالترتيب و التجهيزات المعقوله ..
ما شي حرمه ما تبغي تكون في افضل حله ..
و لا شي وحده تبغي شي ينقصها في يوم سعيد مثل يوم ولادة طفلها الاول ..

—————————-

بس المغزى يا الغاليات ..
ان الوحده ما تبالغ بالشي ..
يعني تخلي كل شي حلو، و ما تقصر بحق ضيوفها ..
لكن بالشي اللي يرضي رب العالمين أولاً..
و يرضيها هي و ضميرها ثانياً ..

الحين انتي ما تخافين على ضناج حبيبتي ؟

فديته تترينه من شهووووور
و تقولين آه متى بربي ..
متى بشوفه ..
متى بشم ريحه الحلوه ..
متى بخليه إيود صبعي و يلعب به ..
يالله .. لحظات كل حامل تتمناها ..

فـ ليش الوحده منا تخلي عين الناس تصيبها ..
الحين الحريم بيدخلن ربع ساعه ..
و بيقولن ..
ما شفتن فلانه شو سوّت ..
يالله شي شي ..
المفرش من المكان الفلاني ..
و التجهيزات من المكان الفلاني ..

ياااااااااا الله ما شفتوا توزيعاتها .. ما خلت شي ما سوته ..
و شفتوا باقات الورد اشكثرها .. اسميها خسّرت و حطت و سوّت …

و إلا عقب يومين ..

الولد تعبان ..
ما دري ليش ولدي طول الوقت يكح ..
يمكن فيه حساسيه في صدره ..
جمجمه راسه من فوق مب كامله ..

لا و غير هذا ..
يوم الناس يسمعون عنج قبل الولادة و عن تجهيزاتج ..
سبحان الله الولادة ما تتيسر ..

يعني فديتج اقصري الشر ..
و سلامة ولدج أو بنتج تسوى الدنيا و ما فيها ..

اوجه كلامي لنفسي و لكل امة محمد صلى الله عليه و سلم

و سلامة راسكم
واللي في بطنكم