السلام عليكم ورحمة الله وبركاته
ليس الالم في رحيل من تحب..ولكن الالم في رحيل ارواحنا معهم..
كتبت لكم قصه تتكون من جزئين طبعا يبغيلها طولة بال لان الجزء الثاني بعرضه فموضوع يديد..وان شاء الله مابستغرق وقت طويل فعرض كل بارت..عاد اتمنى تعيبكم..هذي مب اول كتاباتي طبعا عندي كذا قصه لكن هذي من احلاهم..
((شخصيات القصه خياليه لكن مضمونها واحد وهي حادثه من حوادث الدنيا:الزواج,الطلاق,الموت))
بعرفكم ع الشخصيات خلال القصه..
`·.¸¸.·´´¯`··._.· (البارت1) `·.¸¸.·´´¯`··._.·
اليوم الاربعاء,الساعه 10ونص المسا
(في بيت بو حمد بالتحديد في الصاله,تتجمع العائلة السعيده "سيف ونورة وسعيد وعليا وبوحمد و ام حمد")
نوره:ههههه والله ضحكتني انا باجر بستلم وظيفتي وانت اتقولي باخذ سيارتج وبعطيج سيارتي,من زين سيارتك يعني عسب تبادلني.
سيف:نوروه لاتستهبلين,انا عرسي بعد كم يوم واستحي اسير لحرمتي بهالسياره.
نوره:وانا شو يخصني فيك يعني,مايخصني اجر أي سيارة ليوم الحفله وايد بسيطه يعني.
سيف:نوره حبيبتي,انا لو عندي بيزات جان سرت اجرت بس من وين ياحسره.
سعيد:نوروه لايقص عليج وتعطينه سيارتج,باجر بتتوهقين.
سيف:وانت شو يخصك,انطب احسن لك.
بو حمد:سيف خلاص فك البنت,يعني انت معاشك الحمدالله زين,سر دورلك سيارة حلوة,وخل نورة وراها دوامها وبعدين باجر ان عطيتها سيارتك الله يعلم توقف عليها ولا شي,انت مب مال سيايير,باجر ان عطتك سيارتها بتسير اتكسرها شرات مامسوي فسيارتك.
سيف:ابويه الله يخليك,والله فضيحه اروح لميثه بهالسياره,انزين انت سلفني وبردهن لك فلوسك ماباكلهن.
بو حمد:والله يابويه لو عليه انا جان عطيتك بدون سلف,بس ادريبها سوالفك الطايشه,باجر اتسيرلي عوافي وغيره وتكسر السياره وترجعلي تبغي غيرها.
ام حمد:لاتدلعه وايد,خلاص استوى ريال وخله يعتمد على نفسه,باجر بيفتحله بيت وهو عقله فركبته.
نوره,سعيد,عليا,بو حمد:ههههههههههههههههههههههههههههههه
سيف:اوهوو وانا شو خلاني ايلس وياكم اصلا.
(يجبل صوب الباب)
سعيد:صك باب الصاله وياك عن الذباب.
(يظهر سيف ويصك الباب بالقوو وراه)<<طراااااخ.
سعيد:خيبه تخيب العدوو,حشا زين ما كسر الباب وراه.
عليا:يالله تصبحون ع خير انا بسير ارقد.
ام حمد:وين عليا تو الناس الساعه 11انا ما احيدج ترقدين هالوقت.
عليا:بيلس اذاكر ورايه نشه الصبح.
بو حمد:الله ايسهل عليج امتحانج ويوفقج ياعليا.
سعيد:عليا تريي شوي ابغيج فسالفه.
عليا:مايستوي تتأجل يعني؟.
سعيد:لا مايستوي.
(ظهرت عليا من الصاله وسايره غرفتها ووراها سعيد)
نوره:امايه عندي موعد حق البروفا باجر عسب فستاني.
ام حمد:انزين وشو المطلوب؟.
بو حمد:يعني شو المطلوب تبغي بيزات.
نوره:هههه فديتك يابويه تفهمها وهي طايره.
ام حمد:هيه لازم يفهمها وهي طايره,لأن البيزات بتظهر من عندي,انا مايخصني ماعندي سيري لبوج.يالله تصبحون ع خير.
نوره:ابويه يعني ماشي غيرك,يالله قرقش مخابيك.
بو حمد:هااا!! ما اسمعج,تصدقين اذني اصطمت,بسير ارقد شكلي الا مدوخ.
نوره:هيييه يابويه اللي تبغي تسمعه تسمعه وان يبنا طاري البيزات تصطم اذنك,هههههه يالله عطني,يرضيك نوره بنت سالم الــ…. ماعندها ولا فلس فشنطتها.
(بو حمد يظهر بوكه من مخباه)
بو حمد:لا حشى مارضاها,اندوج هااي البيزات تسدج 2024؟
نوره:هيييه هيييه اتسدني فديتك يابويه.تسلم يالغالي.
(تحب راس ابووها وتركض غرفتها,ههههه لازم نصبت ع ابوها وخذت فوق المبلغ ياللي بغته)
(بو حمد يسكر ليتات الصاله وكالعاده يقفل باب الصاله ويحط مفتاح الصاله فالدريشه عسب سيف وحمد يدخلون البيت)
(فغرفة عليا):
سعيد:عليا دخيلج,والله ماروم اتريا.
علياء:عيب عليك والله,انت ترضاها اذا انا استوابي نفس الموقف واخوها اتصلبي ورمسني.
(سعيد اينزل راسه)
سعيد:يعني خلاص اظهر؟.
عليا:هيه اظهر وسر ارقد وخل البنت تخلص دراستها وفالك طيب.انا برمس امايه عنها وبنخطبها لك.
سعيد:اخاف ان حد يخطبها غيري.
عليا:سعيد لاتعور راسي اذا الله كاتب بيستوي واذا مالك نصيب خلاص بنات البلاد وايد وماخلصن وبتحصل وايد احسن عنها.
سعيد:الله كريم,بس انا مابغي غيرها,انتي لمحيلها.
عليا:ان شاء الله خير لاتفكر بشي وسير ارقد,واللي فيه الخير بيستوي.
(يظهر سعيد ويسكر الباب وراه)
(صوب سيف):
سيف:يالله ياميثه لهالدرجه مالي قدر عندج.
ميثه:سيف الله يخليك لاتضغط عليه,ماقدر اشوفك,امايه امصممه مانلتقي الا بعد العرس.
سيف:الله يخليج لو من بعيد,ماقدر اصبر للعرس.
ميثه:انزين خلني ارمس امايه بعدين برد عليك.
سيف:الحينه هي واعيه؟
ميثه:لا والله كلهم رقود الا انا يالسه فالصاله اتابع فلم.
سيف:انزين فديتج لاتيلسين بروحج فالصاله.
ميثه:ههه يالسه فالبيت مب فالحوي.
سيف:اخاف عليج حتى من الهوى ياللي تتنفسينه.
ميثه:……
سيف:امممم ياويلي ع المستحى,انزين عاد لاتصخين سولفي وياي.
ميثه:اممم بسير ارقد.
سيف:ميثه تو الناس.
ميثه:شو تو الناس الساعه 1؟!
سيف:اوووويه قولي والله.ياربي الله يستر باجر كيف بسير الدوام,كله منج ياميثوه يا بنت سلطان.خبلتيني,حتى الوقت ماقمت احس به.
ميثه:هههه يالله الغالي لازم اسكر عنك الحين انت وراك دوام وانا ورايه سيره الصالون من الصبح.
سيف:انزين الغاليه يا ام فهد,سيري ارقدي واول ماتنشين الصبح اتصليبي.
ميثه:هههه ان شاء الله يا بو فهد,تصبح ع خير.
سيف:ربي يحفظج,وانتي من اهله.
(سيف توه مسكر التيلفون ويشوف ليتات سيارة واقفه صوب البيت)
سيف:منو هاا الحينه ياينا؟خييبه الساعه 1الفليل؟؟!
(سيف ساير يفتح الباب)
(وشوي ويشوف اخوه حمد وربيعه راشد عند الباب)
سيف:يامرحبا والله,شحالك راشد؟
راشد:بخير دامك بخير,يامرحبا والله بالمعرس.
سيف:ها شو الشباب اليوم سهرانين لهالوقت؟!
حمد:هيه والله تونا راجعين من السينما,شحال عيالي؟
سيف:بدال ماتسير تهيت لنص الليل وعقب اتيي تسأل عنهم,جابلهم وايلس وياهم وجوف شو ناقصنهم.
حمد:سيف لاتتفلسف عليه وايد بروحي مب متفيج.
راشد:يالله برخصتكم انا بروح,سلموو ع الوالد وايد.
حمد,سيف:يبلغ ان شاء الله,ربي يحفظك.
راشد:فمان الله.
حمد:درب السلامه,اول ماتوصل خبرني,ولاتنسى موعدنا باجر.
راشد:ان شاء الله.
(دخلو حمد وسيف البيت)
حمد:شو هالاسلوب البايخ ياللي رمستني فيه جدام راشد؟!
سيف:ياخوي حرام عليك هاللي اتسويه,انت تهيت وعيالك فالبيت طايحين ومحد عندهم.
حمد:يعني وين يالسن فالفريج؟!عنبو يعني الواحد مايظهر ويستانس شوي الا وخربتو مزاجه.
سيف:ياخوي ارجع لحرمتك احسن لك,العيال بيضيعون والسبه عنادك هذا.
حمد:خل نصايحك لك,تصبح ع خير.
سيف:الله يهديك,وانت من اهله.
(دخل حمد الصاله وسيف وراه)
`·.¸¸.·´´¯`··._.· (البارت2) `·.¸¸.·´´¯`··._.·
اليوم الخميس,الساعه 9الصبح
(في بيت المرحوم بو ميثه)
ميثه:يالله امايه انا مستعيله بسير الصالون.
ام ميثه:ميثه تريي شوي تريقي وبعدين اظهري.
ميثه:يامي مابغي شي,مالي نفس آكل شي.
ام ميثه:عنبو شو بلاج جي مستويه نفسيتج خايسه من الصبح.
ميثه:يامي والله تأخرت ع الموعد,لازم اروح الحينه.
ام ميثه:انزين بصبلج حليب اشربيه فالدرب وانتي سايره.
ميثه:انزين انزين يامي استعيلي.
ام ميثه:اندوج يامي وهالله هالله فدرب,لاتستعيلين.
ميثه:ان شاء الله,يالله فمان الله.
(تظهر ميثه من البيت)
(عليا تحديدا فالكليه):
عليا:امممم فطيم لو حد تقدملج فهالفتره بتوافقين ولا تتريين اتخلصين دراستج؟
فطيم:والله تبغين الصراحه بيني وبينج ودي يكون عندي حد يهتم فيني واهتم فيه يعني يكون عندي ريل,وفنفس الوقت ابغي اكمل دراستي,بس تعالي.ليش هالسؤال؟
عليا:لا ماشي بس كنت افكر شو الي فخاطرج.
فطيم:ههههه ليكون بس مخطوبه وماتبغيني اعرف.
عليا:هيييه يافطيم اذا عني ياليت اعرس اليوم قبل باجر ودي اعيش الرومانسيه.
فطيم:لاتستعيلين فديتج,ان شاء الله نصيبج بييج.
عليا:الله يسمع منج.
(نوف اتدرعم عليهم)
نوف:هااااي.
عليا,فطيم:هايات.
نوف:شو تسوون؟
عليا:شرات ماتشوفين انسولف.
نوف:اممم ليكون بس قطعت عليكم الرمسه؟.
فطيم:لا حشا,حياج الله.
عليا فخاطرها:افففف منها فطووم على كيفها تعزم.
فطيم:عليووه بلاج صخيتي.
عليا:لا ماشي بس شوي بطني يعورني.
فطيم:بسم الله عليج,اذا ماترومين اتصلي فحد اييج.
عليا:لاماعليه انا بروح الكلاس ان خلصتوو سوالف تعالي.
(روحت عليا الكلاس)
(صوب ام حمد وحمد بالتحديد في غرفة حمد):
حمد:امي دخيلج خليني ارقد,راقد متأخر البارحه.
ام حمد:عنبو شو هالحاله وياك يعني؟لاشغله ولا مشغله.نش دورلك ع وظيفه بدال هالرقاد.
حمد:انزين انزين بس انتي خليني ارقد الحينه(ويغطي راسه بالكفر)
ام حمد فخاطرها:الله يهديك ياحمد.
(صوب سيف تحديدا فالاذاعه وتلفزيون دبي):
سيف:اففف منج ياميثه هذا وانا موصنج البارحه تتصليبي اول ماتنشين.وين راحت هاي ماترد ع الفون.
علي:بلاك تهذرب بروحك.
سيف:هاا!! لالا ماشي.
علي:ههههه ماشي ولا تفكيرك الحينه فالعرس.
سيف:ياريال والله زايغ من شي واحد بس,رصيدي ع الصفر,حشا يابوك مب عرس هذا اللي يلسنا ع الحديده,لو مب الوالد الله يحفظه ساعدني فالعرس جان انا بايع ثيابي من زمان عسب هالعرس.
علي:ليش ماتدخل وياي شريك فمشروع صغير.
سيف:لاتقولي محل جاي وكرك.
علي:هههههه ويا راسك كنت افكر فيه بس عاد غيرت رايي.
سيف:ادري تراني اقرا افكارك,عنبو انت امك توحمت ع دم هندي شكلها من جي يمشي فدمك عرج هنود.
علي:ههههههههه لا وحياتك يدوه هنديه.
سيف:ياسلام كملت.
علي:بس صدق صدق سيف ارمس جد,شو رايك نفتح دوبي,صدقني بنستفيد.
سيف:امممم فكره بس عاد ماعندي بيزات ياحسره,اقولك يالس ع الحديده.
علي:لالا لاتحاتي البيزات الحينه انا بدبرها وعقب بنتفاهم.
سيف:اذا اتشوف ان المشروع بينجح اتوكل على الله.
(صوب نوره تحديدا في بلدية دبي):
نورة:السلام عليكم ورحمة الله وبركاته.
لجين:عليكم السلام ورحمة الله وبركاته.
نورة:انا الموظفه اليديده اللي خبرج عنها استاذ منصور.
لجين:ايوا عرفتك انتي نوره؟
نورة:هيه.
لجين:تعالي معي حبيبتي لفرجيكي وين مكتبك.
نورة:امممم الغاليه بس حبيت اسألج اذا فالقسم اللي بكون فيه شي رياييل ويانا.
لجين:هههه تؤبريني شو مهضومي انتي وين جايي ع مدرسي,لكان كيف بدك دائره حكوميي لئلك بس,اكيد في شباب بيشتغلو كمان هون.
نوره فخاطرها:ضحكتي من سرج ان شاء الله.
لجين:هون مكانك وهيدا زميلك راشد.
نوره:السلام عليكم ورحمة الله وبركاته.
راشد:عليكم السلام ورحمة الله وبركاته,يامرحبا.
لجين:هيدي نوره الموظفه الجديدي وبدي اياك تعلمها الشغل كويس.
راشد:انزين ماما لجين,أي اوامر ثانيه طال عمرج.
لجين:اي نسيت احكيلك,استاز منصور عم يستناك.
راشد:يعله…..شو اقول عنه الحينه,جني اشتغل عنده ولا عند ابوه كل يوم والثاني زاقرني يقولي ودلي وسولي,عنبو انا مب موظف انا فراش عنده.
لجين:ههههه اييي كلنا عم نشتغل فراشين هوني.
نوره:وين مكتبي.
لجين:ايي حبيبتي تعي لفرجيكي,هيدا مكتبك وفي اوراء على المكتب بس خليهم هيدولي تبع عبير الموظفه السابقه بس لتجي وتجمع الاوراء بدها كم يوم.
نوره:انزين ومتى ببدا اتعلم ع الشغل.
راشد وهو مستعيل بيسير للمدير:اترييني الحينه بيي وبعلمج,بس لين اشوف هالعله وراجع.
نوره مستحيه:ان شاء الله.
لجين:يالله حبيبتي ازا بدك شي هيدي تحويلتي(…)حاكيني.
نوره:تسلمين وماقصرتي,تعبتج وياي.
لجين:لأ ولو.
(راشد فمكتب استاذ منصور):
راشد:آمر طال عمرك.
منصور:تفضل راشد,امممم عندي اوراق ابغي توصلها مختبر البيئه ماعليك امر.
راشد:الحينه طال عمرك؟
منصور:والله مادري عنك,شو رايك انت.
راشد:هيه بس انا عندي موظفه يديده ابغي اعلمها ع الشغل اليوم مداومه والشغل كله ع راسي ابغيها شوي تتعلم عسب اتشل عني شويه من الشغل,المندوب وينه؟
منصور:المندوب اتفنش ياطويل العمر,ولو تسمح يعني اتسير انت توصل الاوراق لو ماعليك كلافه.
راشد فخاطره:يعلك…….والله وجنه يرمس فراشه,لو مب محتاي وظيفتي جان مسكتك من هاللحيه اللي جنها لحية تيس.
منصور:اندوك الاوراق والله يحفظك.
راشد:ان شاء الله طال عمرك.
(راشد يظهر من مكتبه ودمه يغلي من القهر)
(نوره تتعبث فالاوراق اللي ع المكتب)
راشد:لااااا هاا مب شغلج عن تخربطين الاوراق توني مرتبنهم.
نوره فخاطرها:خيبه تخيب العدو.
راشد:انا بسير مختبر البيئه عندي شغل هناك,وكلها ساعه ونص راجع,اندوج هذي بيانات ابغيج اتدخلينها فالكمبيوتر,كل اسم وعداله الرقم.
نوره:ان شاء الله بس كيف ادخله,اقصد وين يعني.
راشد:الاخت نوره ماتعرفين تشتغلين ع الاكسل.
نوره:يعني شوي.
راشد:لا والله احلفي بس انتي كيف وظفوج.
نوره فخاطرها:ماعليه شوي زخي اعصابج يانوره توه اول يوم اتمسكني لين ماتتمكنين بعدين سوي اللي تبغينه,شكلي بقم بصفعه.
نوره:والله عاد اللي وظفني يعرف خبرتي فشو.
راشد يطالعها من طرف عينه:عطوج بطاقة الدوام.
نوره:لا والله بعدهم ماعطوني اياها يقولون مادري شو خربان عندهم فالسستم.
راشد:انا بظهر الحينه وان رجعت بعلمج كم شغله.
نوره فخاطرها:اذلف.
نوره:ان شاء الله خير.
راشد:اشوفج ع خير.
نوره:الله يحفظك.
(يرن تيلفون نوره)
نوره:الو.
ميثه:هلا نوره شحالج؟
نوره:اهلين يامرحبا والله فالعرووس,ها اشو اوضاعج؟شو التجهيزات.
ميثه:امممم الحمدالله ماشي الحال,نوره سيف وينه؟مايرد ع التيلفون!!انتي وين؟
نوره:مادري عنه والله,انا فالدوام,اليوم استلمت وظيفتي.
ميثه:لاوالله مبرووك فديتج.
نوره:الله يبارك فيج حبيبتي.
ميثه:خلاص برايج حبيبتي بس بغيت اتطمن ع سيف اتصلبه ومايرد عليه.
نوره:يمكن مشغوول لاتحاتين اذا فضى بيتصلبج.
ميثه:ان شاء الله خير,اووكي فديتج بخليج الحينه.
نوره:الله يحفظج فديتج سلمي ع الاهل.
ميثه: يبلغ.مع السلامه.
(حمد توه ناش من الرقاد):
حمد:ياويل الحال واايد رقدت شكلي,خالانش آكلي شي بموت من اليوع.
ام حمد:صح النوم ياحلو.
حمد:هلا والله بام حمد,هلا بالغاليه,فديتج شو الريوق.
ام حمد:لا والله احلف بس انت أي ريوق الساعه 12الظهر.؟؟!!
حمد:امي عادي انا ريوقي فهالوقت.
ام حمد:الله المستعان بس,انا اقول سر دورلك ع وظيفه احسن لك من الرقاد الصبح والسهر آخر الليل,عيالك محتايينك,لا ابو يصرف عليهم ويدري عنهم ولا ام تحاتي عيالها وتاخذ علومهم.
حمد:امي لاتعورين راسي توني ناش من الرقاد ونفسي فخشمي.
ام حمد:دومك نفسك خايسه اول يوم يعني.
(حشرة اليهال فالصاله)
خوله:بابا جوف عمور يضربني.
حمد:والله بكفخج انتي وعمور لاتخلوني اعصب بشل العابكم وبزولكم ترقدون.
ام حمد معصبه على حمد:حسبي الله عليكم يبتو العيال وعقيتوهم فجبدي انا,وبعد تبغي تضربهم جدامي,عنبو شو قالو؟!!,مافي فقلبك رحمه حتى على عيالك!!
حمد:اوهوووه قسم بالله انتوو اللي ييلس وياكم اتفرون مخه وتحرقون اعصابه.
ام حمد ودموعها فعينها:نفادك التعن.
عمر:يدوه شو فيج اتصيحين.
ام حمد:مافيني شي حبيبي سير انت وخوالي العبو فحجرة الالعاب ولاتسوون حشره.
خوله:بابا كله يصرخ على يدوه عسب جي اتصيح.
ام حمد:اللي مايسمع كلام يدوه بتزعل منه,يالله سيرو العبو داخل الحجره.
(صوب سعيد تحديدا في شرطة دبي):
خميس:سعيد بلاك ياريال شكلك تعبان اليوم.
سعيد:هييه والله ياريال رقاد البارحه مب راقد واحس راسي بينفجر,مصدع.
خميس:اتوكل انزين سير ارتاح.
سعيد:لا ياريال مابترخص مافيني بعد كل يوم والثاني قالو طالع.
خميس:انت الله يهديك كثرت اجازاتك المرضيه وطلعاتك من الدوام,شو عندك كل يوم صاكنها مرضيه ولا طالع اونك عاد تتميرض.؟
سعيد:هههه شو اسوي ياريال الواحد اتييه فتره يمل من عمره.
خميس:هيه بس جي عاد بتسويلك سوالف وياهم.
سعيد:خاليولون يعني حلال عليهم وحرام ع غيرهم.
خميس:انت من وين اتييب اجازاتك بالذمه..؟؟
سعيد:هههه هاا دكتور ربيع اخوي سيف ومايقصر فالاجازات من قلت له مزجم ولا فيني كحه قالي لالا احسن لك ترتاح فالبيت ويصكني مرضيه.
خميس:عطني رقمه هذا بلعن بو خامسه,بشتكي عليه بيفنقشونه.
سعيد:هع يفنقشونه ليش..!!عنبو عسب عطى اجازه لمريض.
خميس:مريض ولا تتميرض!!
سعيد:هههه كله وااحد,خميس بغيت اسألك.
خميس:هاا.
سعيد:اممم كم يبالي ايمع للعرس..؟
خميس:هههه مستعيل اجوفك,بس زين والله يوم اتفكر جي.
سعيد:هيه شو اسوي ياريال اللي فسني كلهم عرسو وعندهم عيال وانا بعدني عزابي.
خميس:امممم جوف انا يوم عرسي كله كله ظهر عليه 80000وفيهن مهرها وبيزات ذهبها وزهبتها,طبعا من غير فستانها وصالونها والقاعه وليلة الحنه كانت فبيت حرمتي والفواله وغيره كله عليه انا.
سعيد:خيبه وايد.
خميس:هههه ايه وين تبا,انا اهل حرمتي بعد راعووني اونه لاني كنت توني متوظف وماعندي بيزات.
سعيد:الله يستر والله,يعني كم ايمعلي تقريبا.
خميس:كم عندك حاليا.
سعيد:اممممم50000
خميس:حلوين بعد يمعلك وعاد فكر فسفر وغيره,وطبعا الاهل مابيقصرون من كل صوب بيحطون فايدك.
(صوب نوره):
نوره:افففففف.
راشد:السلام عليكم,هاا طولت عليج.
نوره تتطنز:لا ابدا.
راشد:انزين عاد اسمحيلي ادري طولت.
نوره:لاماعليه مسموح.
راشد:هاا دخلتي البيانات.
نوره:هيه.
راشد:هيه زين,جوفي اختي بعلمج كم شغله وباجر بتطبقين.
نوره:ان شاء الله خير.
(بدا راشد يعلم نوره الشغل,ونوره وايد خجوله وتستحي وماتروم اتجوف راشد فويهه,يعني الدوام شوي ماعيبها,لانها بغت وياها حريم)
(صوب ميثه تحديدا فالصالون تتكشخ للعرس):
ميثه:لو سمحتي تعالي شوفي صبغة شعري احس وايد تحرقني.
ريتا:لأ كمان شوي لسه ماصبغت.
ليلى:ميسا حبيبتي خليهن يخلصولك الباديكير والمانيكير لبال ماتخلص ريتا صبغة شعرك.
ميثه:انزين,بس حبيت اسألج عن الحنى متى ايي الصبح ولا العصر؟
ليلى:لحضه شوي خليني شوف,انتي يوم السبت عرسك ماهيك؟
ميثه:هيه.
ليلى:اي موعدك الساعه 9ونص الصبح.
ميثه:خلاص ان شاء الله خير.
(ميثه تتصل فام ميثه)
ام ميثه:الو.
ميثه:هلا امايه,شحالج؟
ام ميثه:هلا فديتج,وينج يا امي انشغل بالي عليج.
ميثه:فديتج يا امايه انا آسفه شو اسوي لين اخلص حمام مغربي واقص شعري واصبغه واسوي حلاوة واخلص الف شغله مارمت اتصلبج.
ام ميثه:خلصتي ولا بعدج.
ميثه:امممم مال ساعه تقريبا وبيي البيت,بس عاد لاتترييني اتغدي.
ام ميثه:لا يا امي بترياج انا تعرفيني ماحب آكل بروحي.
ميثه:اخاف اطول عليج ياامي,اذا يعتي كلي لاتترييني.
ام ميثه:انزين لاتهذربين وايد,خلصي شغلج وتعالي البيت,باجر ان عرستي وظهرتي عني مادري شو بيستوي فيني بروحي بتخبل.
ميثه تدمع عيونها:افا عليج يا امايه مب من بعد بيتنا,خطوتين الا وانا عندج,انا بخلص شغلي وبيي البيت انزين,يالله عيل امايه مع السلامه.
ام ميثه:شوي شوي ع الدرب يا امي والله يحفظج.
(ميثه تتصل فسيف)
ميثه فخاطرها:ياربي وينك ياسيف اتصلبك وماترد عليه خليتني احاتيك.
(صوب نوره):
راشد:وبس.
نوره:مشكور وماتقصر يعطيك العافيه.
راشد:الله يعافيج,اممم الساعه كم.
نوره:1ونص.
راشد:انزين باجي نص ساعه ع نهاية الدوام,شي ملفات يبغيلهن ترتيب انا بييبلج الملفات وبنيلس انرتب ويا بعض.
نوره:مابيمدينا الحينه,باجر بنرتبهن.
راشد:لا احسن الحينه باجر الله يعلم شو من الشغل بيعطيني اياه هالعله منصور.
نوره:هو ليش مايطرش المندوب يوصل الاوراق وغيره.
راشد:المندوب مفنشينه وعاد ماشي حد يكرفونه غيري.
نوره:الله يعينك.
راشد:اندوج الملفات,كل ملف برقمه.
(نوره وهي تسحب الملفات انكسر ظفرها)
نوره:آآآآآآآآي.
راشد:هاا خير ان شاء الله,تعورتي؟(يقرب من ايدها يشوفها)
نوره:هاا لا ماشي بس انكسر ظفري.
راشد:ماتشوفين شر,هههه دواج,عنبو انا مادري شو تحبون فهالاظافر الطويله اللي جنها اظافر قطاو.
نوره قافطه:احم عفوا اخوي راشد مايخصك فسوالف الحريم,ولاتتدخل فخصوصياتي.
راشد:عفوا ماقصدت شي,اسمحيلي.
نوره اتطالعه من طرف عينها:لا ماعليه مسموح.
(فبيت ام حمد):
(يرن تيلفون البيت)
ام حمد:الوو.
………….:السلام عليكم ورحمة الله.
ام حمد:عليكم السلام.
………:اختي هذا منزل سيف الـــ……
ام حمد:هيه نعم,منو وياي..؟؟
………:اختي سيف سوى حادث ودخلوه الانعاش,الله يصبركم ويطمنكم عليه,وان شاء الله يقوم بالسلامه.
ام حمد اتصارخ واتصيح:شوو استوى؟؟أي مستشفى؟؟
……..:اختي قولي لا اله الا الله,اذكري الله,ان شاء الله يقوم بالسلامه,فمستشفى ………,ان شاء الله بيخبرونكم بتفاصيل الحادث وبيطمنونكم عليه.
(ام حمد تتصل فبو حمد)
ام حمد رمستها متقطعه وتصيح:بو حمد تعال البيت بسرعه.
بو حمد:خير ام حمد شو مستوي؟؟!!
ام حمد:سيف……………
بو حمد:الووو,ام حمد,الووو.
(وصل بو حمد البيت بسرعه وخذ ام حمد وسارو المستشفى)
المشاركة الأصلية كتبت بواسطة هنودة 
