الوسم: الانفلونزا

الله المستعان

انا بديت من اول امس …

يبت حبة سودا وحطيتها في الجرن الصغير ودقيتها دق خفيف لين ما شفت الحبات تفتحت وطلع الي بداخلها لونه ابيض وطلعت ريحتها ..

بعدين يبت عسل طبيعي وحطيت منه في طاسة وحطيت الحبة السودا وخلطتهم مع بعض وصرت كل يوم اكل انا وعيالي وريلي وحتى الخدامة منه تقريبا خاشوقة صغيرة

واليوم سويت طاسة روب فيها 4 فصوص ثوم مهروسة مع شوية ملح ونعناع ناشف وشوية ماي وكلنا منها مع الغدا .. مع ان الثوم يتعبني بس شاسوي تحملت

شدو حيلكم .. بس ابي اعرف وين اقدر احصل اليانسون النجمة ؟؟ Anis Star ?? اذا حد يعرف يخبرني

والله يحفظنا ويحفظكم من كل شر

ماشالله عليج ماقصرتي بالوصفات الله يحفظج ويحفظ عيالج

ان شالله من الشر

انا بعد ادور اليانسون …*

نحنا طايحين في اليانسون ونجمته نشرب منه وشتريت بو فاس السائل ووزعته على عيالي كل ما اطلع من البيت احطلي في كلينكس واشمه

انا بديت من زمان اشربه بس مب كل يوم

الله يبعد عنا الامراض امين

بسالكم ليش بالذات النجمه
مايصير اي ينسوووون ثاني

نفس السؤال

موجود في الخلطه غناتى وهو عباره عن بهار هندى على شكل نجمه يسمى اليانسون الهندى

السلام عليكم !!

بنات شحالكن .. بدخلن فالموضوع ع طول ..

مقهوره من اختي بدرجه فظيعه فظيعه .. توه من شوي ولدها ياي من الشارجه من بيت ابوه .. يا سلم ع امه وحبها ع راسه ويا سلم عليه انا بعد ,, المهم ..

والاهم

عقب ما سلم سألته أمه منو يابك قالها ان أبوه عطاه بيزات وقاله روح ردت عليه تستاهل محد قالك تروح ..

بس المشكله العوده .. شو السبب الرده ..

سألته ليش انزين رديت قال ان عماته وعيال عماته وريايلهم .. مرضانين فيهم زجام وبلاعيم وحمى واسهال ..

هنيه انا طرطرت اعيوني .. وع طول دار ف بالي شي واحد واللي هو بسم الله عليكن ( انفلونزا الخنازير )

..

لان واحد من معارف ربيعتي نفس الاعراض وتنوم فالمستشفى بس طبعا تعالج والحمدلله طلع ..

نرد لموضوعنا .. طبعا انا ع طول قلت ماشاءالله الولد يايب لنا الوبا والام عادي عندها .. طبعا هي كاتن تبيني اسكت عن الموضوع وخاصه خالتي يايه من الهند وما تباها تحتشر بس منو قال هاي صحتنا ومافينا عليها انا عاد خبرت خالتي .. بس المصيبه العوده اني الولد لمسني .. وهو من يومين فالشارجه وطبعا عماته ما تعالجن لانهن يعرفهن ان فيهم المرض واذا درت الدوله عادي ينومونهم .. بس ليش هالانانيه روحوا تعالجوا شو فيها .. بس لا منو قال عمته و ولدها او ريلها راحوا عمان اونهم عاد عسب يتعالجون عند مطوع واييبون العلاج وياهم .. برايه طبعا انا ما يخصني ..

بس ..

الحين ابغي اعرف انا شو اسوي ف هالحاله .. لازم اللي فالبيت يعرفون وان قلت بيلسون يقولون ان خيفانه ومن عندي اطلع اشاعه لان الولد صاحي ومابلاه شي .. طبعا معروفه ان المرض ما بيبين الحين ويباله 10 ايام لين ما يبين بس هالجهلى منو يقولوهم ..

مادري .. مادري

بس ابغي حل ..

ابغي اشتكي عليهم بس ماعرف وين ساكنين واذا سويتها خوفي انهزب .. ابغي ألحق بعمري واسير المستشفى اسوي فحوصات بس هو ما بيبين الحين لاني توني لامسه الولد ..

وثانيا والاهم

باجر وراي داوم وان كانت فيني العدوه مافيه اعدي اللي وياي فالدوام .. ماعرف خايفه .. مب ع عمري ع اللي وياي فالداوم

حتى توني ارمس وحده من معارفي تقولي يمكن انتي خايفه واتحسين بهالشي .. قلت لها ان الولد يوم لمسني وقال ان عماته مرضى حسيت بحكه ف خشمي ..

وان في شي مب طبيعي

بليييييييييييييز لا تبخلون عليه ..

ابغي حل ها مشكله عوووده .. بالنسبه لي

عادي ان الله ماكتب لج يصيبج من الولد
ممكن اييج من الي فالدوام
بعيد الشر
بس تحصني بالاذكار

يزاج الله خير فتاة راك

ان شالله البنات يفيدونج ..
الله يعافيكم وان شالله مافيج الا الخير..

اخبرج اختي يوم الله بيكتب لج المرض حتى لو حفرتي حفرة في الارض ودفنتي عمرج ياينج ياينج
وها كله مب خيفانه على عمرج بس على الي في الدوام
وهذا المرض منتشر بشكل فظيع في الدوله وياكثر الجنسيات في الدوله
ويمكن حتى موجود في دوامكج وانتي ما تدرين الكل قام يسير الصيدلية وياخذ اي دواء ويتعافى
قولي الحمد الله والله يعافينا من كل مرض

الحمدلله .. ع كل حال

حبيبتي يمكن يكون هذا وسواس ،، وان شاء الله ما فيج الا كل خير

أنا ولدي عمره سنه و نخطط نسافر شهر يونيو المانيا و النمسا و أخاف يزكم من تغير الجو و نتلعوز ؟ شو رايكم ؟

حبيبتي اليهال عادي يزكمون في السفر
خذي وياج أدوية احتياط

وحتى لو زكموا عادي ختيه
من استوينا واحنا نزكم في السفر
بس الحين عشان الكل يتكلم عن الأنفلونزا استوى عندنا قلق غير طبيعي !

اتوكلي على الله وسافري
وإجازة سعيدة مقدما

انا طعمت بنتي من شهر 11 عن الانفلونزا الموسمية

بس و لا كأني طعميتها … لانها ما استفادت شي …

توكلي على الله و شلي وياج خافض حرارة و دواء عن الزكام بس ..

و الله الحافظ إن شاء الله …

السلام عليكم شحالكم خواتي طبعا كلنا كاولياء امور قاعدين نحاتي عيالنا من عدوى انفلونزا الخنازير في المدارس ومااتوقع الوزارة تعطي الطلاب اجازة ففكرت ان لو كل مدرسة توزع مدرسات او مدرسين عند البوابات الرئيسية وكل مدرسة معاها مقياس حرارة يقيسون حرارةالطلاب واللي فية حرارة يردونةالبيت يعني مثل الاحتياطات اللي في المطارات شرايكم احس هذي الطريقة تحسسنا باالاطمئنان عاى اولادنا اكثر انا بقترح على مدرسة عيالي جذي وانشاءالله يهتمون

اقترااح حلو منج سوسو مام

بس ياااريت الوزاره الطبقه مدامهم ما بيعطوهم اجازه

وبنفس الوقت اتشغل النااس ال ما عندهم وظايف مؤقت

هيه والله صدقج

فكرة حلوة بس أنا عن نفسي ما بدخل ولدي لين الكورس الثاني

الله يحفظ عيالتا من كل شر

حلووووووووووووه الفكره..

بس انا باجر ان شااااااء الله بسحب اوراق ولدي

وما بدخله المدرسه.. عقب ما سكرو كمن مدرسه من هالمرض بصراحه مب مستغنيه عن حشاشة يوفي ^_^

خاصه ان مدرسته مختلطه من كللللللللل الجنسيات واكيد توهم رادين بلادهم..

هيه والله صدقج