الوسم: البامبرز

مرحبا خواتي ……..

عندي بنت عمرها سنتين 4 اشهر ابي اودر عنها البامبرز ومب عارفه كيف هي بنتي الوحيده

مب عارفه باي طريقه ……….. ممكن نصايحكم … كيف علمتواا عيالكم على دخول الحمام وانتوا بكرامه … متوهقه.. واسمحوليه

ويزاكم الله خير

؟؟؟؟؟

احس بعدها صغيره انا ابدا اهيئهم من عمر سنتين لين ما يوصلون سنتين ونص يبدون يتعلمون

وين صغيره فديتج عمرها سنتين و4 اشهر ………… كنت اعرف وحده قبل لا اعرس من يكملون السنه تعودهم على الحمام ………..

اشكرج ع مرورج

اوه اسمحيلي اختي ما انتبهت اتحراها سنه و4وشهور
دام سنتين و4وشهور بعمر بنتي فديتها الله يحفظها انا حاليا
قاعده اهيئها افسخ عنها البامبرز واخليها اسويها بالحمام
فديتها اسويها وارد البسها البامبرز الحين قامت اتقول
شوي شوي بروح الحمام وان شاااء الله من اتكمل السنه
والنص بشيله عنها

مشكورة حبيبتي

انا ابا اعرف بعد عمر ولدي سنة ونص ابا اهيآه لهالشي

بالتوفيق اختي

ويه بعدها صغيره اصبري عليها شوي لسنتين ونص او 3 اتكون فهمت شوي

صبري شوي عليها لبعد السنتين

بنتي بعد نفس عمر بنتج واحسها صغيره بعدها
ناويه ابدا وياها عقب السنتين ونص

شحـــــــــــــــــــــــالكم يا سيدات الامارات ؟؟؟؟؟

عندي شكله مع ولدي خلاص كبر على بامبرز كيف اخليه يودره حاولت معاها شارتله نونيه نفس كرسي وفيه موسيقى ماشي فايده يخاف يلس فيه واشتريت نفس سلحفاء بعد يخاف ييلس فيه والله تعبني نصايحكم يا خوات………….

حتى بنتي تخاف…والحين ما شاء الله سنة و 8 شهور و ما شئ فايدة…أخاف تكمل سنتين و إتم على نفس الحالة

انتي بنتج سنه و8 شهور انا ولدي سنتين و4 شهور يعني لازم مايلبس ……..
خواتي ساعدوني ابي نصايحكم …….

مرحبا خواتي… قريت في موقع في النت أن الطفل تقدرين تعودينه على النونية يوم بيكون جاهز
بالنسبة لعيالكم ,,,, سنتين و 4 شهور,,, وسنة و8 شهور…بعدهم صغار ,,, ليش شالين هم

الطفل بتبين عليه بوادر انه بدا يفهم شو يعني (كاكا والبيبي) ولما يحس انه يبا يسوي شي ,, وبعدين تدريجيا تقدرين تعودينه على النونية,,,,

اذا في مجال ان اكتب عن اسم الموقع ,,عشان تقرون الاشياء المفيدة اللي عن هالموضوع,, انا حاضرة

نفس ماقالت الاخت توكة ..عيالكم بعدهم صغار..حلو انج تعودينهم بس اذا مايبون خليهم الين ماهم يطلبون منكم هالشي..

بالنسبه لي انا ولدي الشهر الياي يكمل ال3 سنين والحمد لله مايلبس البامبرز غير وقت الرقاد .ترك البامبرز من 6 شهور تقريبا…حتى انه يقول لي ياماما انا عود لا تلبسيني البامبرز ماابى
بالنسبه للنونيه مالته عاديه جدا شرات الكرسي..سياستي ..كنت في البدايه اخليه يقعد عليها عادي ويطالع التلفزيون..وطبعا اخليه بدون الحفاظ ..وعقبها صار يوم يبى الحمام يخبرني واقول له مافي وقت تسير يالا سويها هني ..الين ماتعود وصار هو بروحه يسويها في النونيه ..وفي كل مره يسويها يخبرني وانا اجازيه باني افتح له مثلا البرامج اللي يحبها يعني تليتبيز او بارني ..او احيانا اعطيه حلاوه او اي شي يحبه ويباه..وطبعا طول اليوم مدح جدام ابوه واي حد من اهلي اخبرهم انه بطل وسواها في النونيه ..يعني حركات تشجيعية..في البدايه بتتعبين لان ممكن يسويها في ملابسه الداخليه بس عادي تحملي وبسرعه الياهل يتعلم ونصيحه لا تزاعقين عليه لو وصخ ملابسه ..خلي الموضوع عادي وكلميه كانه عود مثلا ..اوووه سويتها في ثيابك حبيبي مب مشكله فديتك اكيد ماقدرت تمسكها صح ؟؟ وعقب قولي له المره اليايه بسرعه تسويها في النونيه …يعني حاولي تبتعدين عن الاحراج والزعل ..

ان شاء الله ساعدتج بمعلوماتي لو شوي ..بالتوفيق..ودعواتج

مب شرط اتعلمينه على النونيه اتسويلج سالفة غسال على طول علميه على الحمام المرحاض

شوفي اول شي لازم اتعلمينه بالكلام

يعني لازم يعرف الكبيره والصغيره على حسب ما اتعلمينه كاكا وبيبي او اي شي

بعدين اتعلمينه انه يقول انا بسير الحمام

انتي يوم بسيرين ابوه او اي حد لازم اتخبرينه انج بتسيرين لانه الولد بيقلد

خبريه انج بتسرين الحمام بتسوين الشي الفلاني وقوليله انتي كبيره

وكل ساعتين وديه الحمام وقوليله انته شاطر وكبير اتسير الحمام مثل ماما وبابا..بس لا اتعقينه في البدايه لين ما يقولج ماباه

ولما يسوها في البامبرز..جززيه فيها خاصة الكاكا وقوليله واع وسخطه واستوى غايس

وقوليله في المرحاض يسون واذا سواها في المرحاض راويه وشجعيه وصفقي وقوليله يسوي باي باي وجر السيفون

وحاولي بالبتدريج بس لا اتعصبين عليه كله يبغي صبر واذا عصبتي بيزيد

والسموحة على الاطاله

من اي سنة لازم اتخلون عيالكم يودرون البامبرز

هلا خواتي
انا البس بنتي حفاظه بامبرز ولاحظت من يومين انها وايد اتسرب وخاصه وقت النوم يعني تسويها بس مره وتسرب وحليلها غامضتني لاني ابدلها ملابسها وهي راقده وتنش مضايقه,,,
مادري شو اسوي يعني ابدللها نوعيه الحفاظه ولا اغير المقاس
اتمنى اللي عندها خبره لاتبخل وتساعدني
مع العلم بنتي عمرها سنه نص وتلبس رقم 5

الغالية بدلي المقاس …هاي نفس بنتي …فاكتشفت إني لما بدلت البامبرز ….اختفى كل شيء

الغاليه العيب مب من بنتج من الحفاظ ساعات تصير مع ولدى يمكن تى نوعيات رديئه فى البامبرز وتسرب جربي اخذى من مكان ثانى غير المكان اللى متعوده تاخذين انا جيه اسوى

انا بعد جي بولدي و رحت غيرت الحفاض له و الحمد لله ماشي تسرب

اشوووووووووووف الهجييييييييييييييييز وايد اوكي …..

البامبرز يوم كنت البسه بنتي يسرب وكنت اشم ريحه وغيرته ….

حاولي تشتريلها اللي ينلبسن نفس الهافات …..

خذي هجيز

صدق الكلام الي قالته الاخت بس انا استخدم بامبرز بصراحه انا خفت ممكن تفيبدوني شوالبديل

ليش شو فيه ؟؟؟

شوووووووووووووووووووووو فيه
شووووووو السالفة؟؟؟؟؟

انا مثلج استخدمه من سنين حق اعيالي كلهم الله المستعان ماخلو شي

السلام عليكم حبوبات
موضوعي باين من عنوانه
أنا هالفترة أعلم ولدي على ترك البامبرز عمره سنتين و سبع شهور
الحمد الله خطينا خطوات كبيرة و لله الحمد
بس في مشكلة وحدة مب قادرين نتغلب عليها
ولدي إلذا يبى يسوي كاكا يقول و أوديه الحمام بس ما يقدر يسوي ما أدري ليش يتم يحاول بس ما يقدر
لازم ألبسه البامبرز و عقب يسوي
تعبت من هالموضوع
أهل الخبرة عطوني خبرتكم
شو الحل

وينكم يا أمهات
أفيدوني هذا أول ولد عندي
فيث انتظار حلولكم

مـع المحاولات بدون بامبرز بيتعود
طولي بالج عليه

وان شاءلله بيتعود مع الأيام

هلا اختي .. اعتقد انه السالفة مطولة لانح اشوي اتاخرتي عليه يعني كان المفروض اتعلمينه وهو اصغر اشوي من يكمل سنة ونص .. لانه البيبي كل ما يكبر يتعلق بالبامبرز اكثر ويتعود عليه وايكون أسهل حقه من الحمام..
الحين لازم اتفهمينه انه خلاص ماشي بامبرز ولازم ايروح الحمام .. غلط انج اتردين اتلبسينه البامبرز.. حتى لو تقعدين ساعتين بالحمام لين ايخلص أو كل اشوي اتودينه الحمام
واذا اتخافين يسويها على نفسه .. بتلاقين عند مذركير اندروير قطن بس مبطن من داخل بنايلون .. والسالفة فديتج يبالها صبر لين يتعود..

والله يا اختي انا مشكلتي اصعب … انا ولدي عمره 3 ونص ومو طايع يخبرني ما يحب يسويها الا بالبامبرز
والله اني تعبت ومو عارفة شو اسوي معاه

تمي ميلستنه على الدبليو سي ووطولي بالج عليه وآخر شي بيتعلم

^__^

خليه يطول واصبري عليه حتى لو كمل عشر دقايق عادي
اصبري عليه
اذا قال بامبرز قولي له ماشي بامبرز خلص
وممنووووووووووووع البامبرز طول اليوم والمساء
مسموح بس بعد مايروح الحمام قبل النوم والصبح اول مايقوم على طول الحمام
يعني البامبرز بالليل بس احتياط مب عشان يتبول فيه خاصة الصبح

هلا امهات عندي طفل عمره 3سنوات ونص وطول اليوم ما يلبس بامبرز بس من فليل لين فليل واريد اتركه حتى فترة الليل بس ما اعرف؟؟؟ ساعوني يا امهات اللي مجربات؟؟؟ شو اسوي هل اوعيه على الساعتين ولا كيف…
وشكرااا

ليش ولا رد لين الحين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟

شوفي اذا كان من النوع اللي يسير الحمام بين فترات جريبه وعيه مثلا اذا يرقد 10 وعيه الساعه وحده بعد نص الليل

واذا كان عادي مثلا اذا تبول الصبح ما يسير الا الظهر عادي خليه راجد وقوميه ع الفير حتى لو بال ف الفراش مب مهم

سوي تحتة نايلون وشرشف جديم احتياط وشوفيه كمن يوم وبتعرفين بروحج الترتيب اللي يناسبه بس لا تعطيه ابدا سوائل

بعد العشا موووووووول ؛؛؛؛

والسموحة اتمنى اكون فدتج

أول شي حبيبتي جيبي غرشة ماي وقصيها نص اوكي

ثاني شي قبل النوم خليه يروح الحمام
ثالث شي كل 3 ساعات صحيه وبدال متتشلينه الحمام خليه يوقف وومسكي الغرشه ويسوي فيها وطبعا خلي
معاج كلينكيس في ماي عشان تمسحيله
رابع شي بعد فتره يعني أسبوع لاسبوعين شليه يروح الحمام

و أن شاء الله أكون فدتج

انا بنتي عمرها 3 ونص ..يوم كان عمرها 3 سنين دربتها ترقد من دون بامبرز ..والحمدلله ماتبول بس بعد كمن اسبوع تمت تبول والين الحين.. وما قدرت البسها بامبرز لانه يقولون بياثر عليها ..والحين دايما تبول يمكن مره او مرتين في الاسبوع ماتبول ..عيزتني ما اعرف شو اسويلها..

ادعو لي اني اقدر اعق البامبرز عن بنتي
عمرها الحين سنتين و شهرين
وايد تعبت مع اختها اللي اكبر منها
دعواتكم

الله كريييييييييييييييييييييييييييييييييييييييييييييييي يييم

لييييييييييييش البامبرز غير موجود فالاسواق ؟؟؟

والله دورنا كل سوبر ماركات والصيدليات وما حصلناه وبتحديد رقم 6

زوجة اخو ريلي بعد اتقول نفس الشي
وهي من بوظبي
بس في الصيدلية الي عدال بيتنا انا حصلت
مادري والله شو السالفة؟!

واناا بعد ماحصلت مال رقم 2 فكارفور .. شوو السالفه صح ؟؟

غريبه نحن متوفر عندنا في الشارجه

رقم 6 من زمان ما عدت حصلته
اما بقية الارقام امس اشتريت من الجمعية رقم 4 و5
مشكلة لو بينقطع احس ان ما له بديل

شوفي في الجمعيات أو المجمعات

اختي بتحصلينه ف كارفور انا شايفه شكثره
ف بديل عن البامبرز انواع ثانيه والله احسن ع البامبرز

السلام عليكم

الصراحه عندي مشكله مب عارفة احلها اتلعوووووووزت

عندي بنتيه عمرها 3 سنواات

لين الحين تلبس الباامبرز <<<< بتقولون ليش ماتفجينها عنهاااا

لان يوم افجها ماتروح الحماااام موووول كيف جيه مااعرف يعني لو خذت 5 ساعات ماتسوي شي في الحمام

اتقولي ماما ابا الحمام اوديها ماتسوي شي 20 الف مره

وعقب اظطر البسها بامبرز اول ماالبسها تبووول كرمتوا !!!!!!!

تقولي ماما بلت خلاص !!!!!!

الحين السستم كيف

اول ماتنش من الرقااد افج عنها البامبرز عقب صلاة الظهر البسها
اخليها شووي وافجها عنها والععصر نفس الشي البسها واعقها لين الفليل البسها وترقد

طبعا هذا يوم نكوون في البيت

يوم اطلع لاازم البامبرز

شو اسوي ابها الحين كيف اقلع عنها البامبرز !!!!

السنه اليايه بتروح المدرسة شو اسووي

خذت الها الكرسسي مال الحمام وانتوا بكرامه بعد نفس الشي ماتروح !!!!

حبيت ارفعلج الموضوع

ماعندي فكرة

مشكورة الغاليه ويزاج الله خير

حبيبتي اذا تبين تعودينها ع سيرت الحمام لازم تنسينها شي اسمه بامبرز يعني اذا فصختي عنها البامبرز خليها بس انت حاولي تودينها الحمام وانتو بكرامة كل ربع ساعة تقريبا حتي اذا ماسوت شي ماعليه صبري عليها ترا يبالها وقت لين ماتتعود وحاولي انج ماتردين تلسينها وعقب بتشوفينها سوتها ع عمرها في اي مكان في البيت مب مشكلة خليها بس الحين بي دورج أنج تعودينها ع الحمام وانتو بكرامة بكلامج ألها واسلومج معاها يعني غايضيها انج تحبين اخوها او اختها لانهم يبولون في الحمام وانتوا بكرامة وهي شاطرة وانا ما احبج خلاص انا زعلانة ما اباج وعقب من الغيرة هي بروحها بتقولج خلاص بروح الحمام مرة ثانية وحاولي اتمين معاها بهالاسلوب……. وع فكرة اذا عن الليل اذا تشوفين عمرج بتنشين كل فترة عشان تودينها الحمام زين بس اذا لا ماعليه لبسيها بس تكون راقدة ما تحس انج قاعدة تلبسينها….وان شاءلله اكون فايدتنج بخبرتي

أكبر غلط انج ترجعينه عليها .. نفسيا حاطه في بالها انها ما تسوي إلا في البامبرز وتقدر تمسك عمرها وما تسوي إلا يوم تردينه عليها ف شي طبيييعي انها ما بتسوي إلا فالبامبرز ..

أنا بقولج تجربتيه مع بنتي الحين عمرها سنتين وخمس شهور وابنتديت معاها يوم هيه سنتين وشهر .. والحمدالله ما تسوي إلا فالحمام .. أسبوع ما طلعت معاها فالبيت وأصبر عليها وقت البول والكاكاه (الله يعزج) .. وعقيته عنها وما رجعتلها إياااه لأنه إذا ردييته بينفتحلها المجال انها وقت ما تباه بتلبسه .. وصبررررت علييها ..

بنتج شكلها متروعه من الحمام ف عطيها فرصه واصبري وطولي بالج عليها ولا تعصبيييييين إذا سوتها بالعكس شجعيها وإذا سوتها فهميها انه شي مب حلو وطووووووووووووووووووووولي بالج ..

ان شاء الله أشوف ردج بعد أسبوع انها عقته خلااااص ..
وااايد سهل التعليم بس يباله طولة باال

حليلها يمكن ارتبط في ذهنها البامبرز يعني البول حاولي تشجعينها قوليلها اللي بيبول في الحمام بشتريله شي واايد حلو وشوفيها انا رشودي فديتة بعد بو 3 شهور يعني ماعندي تجارب بس قلت يمكن افكاري تنفع والسموحة

مرحباا اختي اشحالج واشحال النونو
المهم اول شي لازم تغيرين البامبرز
كل ماحسيتي انه فيه بول يعني كل
فتره جيكي عليه لو بلمس طبعااا
بتكونين حاطتنه فحجره دافيه حاطه
كلينس وكوب فيه ماي داافي واغسليه
ونشفيه عدل بفووطه اذا المكان محمر
حطي له اي كريم بس يكون زين للاحمر
واذا مافيه شي يااما ادهنيه بفازلين
انا مانفع الفازلين ابدااا احط له طبقه
من كريم سيباميد اللي بابااابونج وعقب
لبسيه بس لا ترصين عليه والبامبرز
وعطيه بوسه عوده ورضعيه وقمطيه
وبيرقد رقده حلوووه

هههههههههه مشكوره فديتج ويعطيج العافيه

حبيبتي
مبروك على النونو إذا أنت أم يديده
من خلال تجاربي العريقه ويا اليهال والحفاضات أنصحج
بعدم استخدام البودر نهائيا لانه يستوي مثل العجينه على جسم النونو
ويؤدب إلى الالتهابات
يستحسن استخدام الفازلين بكميه بسيطه بعد التجفيف طبعا
وأهم شي الامهات الجدد ينسونه هو تهوية النونو
يعني كل يوم ساعه يبقى البيبي بدون حفاض
إذا هو وايد صغير تفتحين الحفاض تحته
وإذا هو يتحرك تلبسينه هاف واتخلينه يتمشى في الحوش
وفي حالة أي إلتهاب ولو بسيط أعلني حالة الطوارئ
وهي استخدام المكروكروم الأحمر(الآيدين) مع ترك الحفاض حتى ينشف
واتحملي ترى في نوع حار
اتمنى أكون أفدتج
لاتنسين الرضاعه الطبيعيه يا حلوه

امممممم .. انا انظفه بمناديل جونسون .. عقب احط له فازلين .. وخلصنا ^^

انا اغسله بالحمام .. بصابون اذا مسوي العودة .. اذا لا بس بمناديل .. واحط له مرات بودرة