السلام عليكم
انا عن نفسي عندي أولاد 12 سنة و 8 سنوات و 8 سنوات
المهم انا اتبع معهم نظام المكافآت كالتالي
كل واحد عنده حصالة وكل يوم يحطون درهم او درهمين في الحصالة ( وممكن ما يحطون شي ما أجبرهم ) ، إذا في خاطرهم شي يطلبون مني أفتح لهم الحصالة عشان يشترون اللي في خاطرهم . ( مثال : شاف مقلمة او قلم عند صاحبة يعطيه قيمة القلم او المقلمة وصديقة يشتري له مثله )
على كل درجة كاملة في كل امتحان اعطي 10 دراهم
واذا ناقصة نص درجة او درجة اعطيهم 5 دراهم
واللي يجيب امتياز في الشهادة يحصل 100 من عندي و100 من عند ابوه
واللي اقل عن امتياز ما يحصل شي ( لان نحن مفهمينهم ان نحن لا نرضى بغير الامتياز ) لان هم قدراتهم العقلية تساعد انهم يحصلون امتياز ولله الحمد ( واذا في واحد قدراته العقلية بسيطة ) ما كنت حطيت هالقانون
وبعد الشهادات نسوي اجتماع معاهم كل واحد يقول شو يشتري كهدية عشان يستخدمها في الاجازة ( الاجازة اللي فاتت اشتروا سياكل )
وبما ان عيالي شياطين / كل ما يكسرون شي في البيت ( عن قصد طبعا ) اجيب الريال يصلحه واخليه هو يشرف على التصليح واوهمه ان هو اللي دفع المبلغ من حصالته ( بما أن مفتاح الحصالة عندي انا ) وأنا فعلا أخصم مبلغ رمزي فقط ( بدون علمه ان هذا المبلغ رمزي )
فيه بينهم منافسة كبيرة جدا وحرص كبير جدا على فلوسهم ، لدرجة انه كل ما نطلع الألعاب اول سؤال يسالونا ، الألعاب على حساب منو ؟
اذا قلنا على حسابهم ( على سبيل المزح ) يقولون لا خلاص ما نبي نلعب
المهم اختي كانت حاضرة مع خبير سلوك اطفال وقلت لها اسالي عن الفكرة هذي
الصدمة كانت
ان لازم يوقف الموضوع حالا
لان الاطفال بيتعدون ام مستقبلا ما يقدمون خدمة بدون مقابل ويرتشون أيضا
وأنا على طول وقفت النظام
هذي تجربتي وياليت اللي عنده ملاحظات او نقاش بخصوص الموضوع يتتفاعل معانا
وشكرا