ياااه ييتي على العوووق ..
أنا كنت موظفه وقدمت استقالتي والحمدالله ارتحت نفسيا ..
كنت انسانه خجوووله وطيبه و استحي ارد اي حد واستحي ادافع عن حقوقي ولا أطالب بحقي ابدااا …
والنتيجه كانت انهم استغلوني و كلوا حقي وفوق هذا كان عندنا دوام شفتات وكانوا يظلموني ويحطوني شفت مع انه المواطنين كلهم في المركز محد فيهم يداوم شفت الا الوافدين بس ويوم رمست قالوا انتي ايديده والقوانين احين تغيرت والجدامى بس ما يمسكون احين غير .. سكت
وبعد فتره لاحظت انهم فعلا قاصيين علي وانا امسك مرتين في الاسبوع وغيري ما يمسكون ولا مره !!
قمت اشوي اشوي احتج وارمس واتحرطم .. كانوا يقولون انتي ايديده واقبلي بالوضع ولا تحتجين علشان ما تضيعين على عمرج وملفج و و هالخرابيط كلها علشان يسكتوني للعلم كلهم تقريبا وافدات ما عدا 2 مواطنات في القسم اللي انا فيه .. و كل حد يداوم على هواه .. تخيلوا هم يظهرون الساعه 12 او 1 كل يوم بحجه انه عندهم شغل وامور خاصه او عندهم عزيمه او وراهم طلعه مع رياييلهم ويبون يتجهزون !! و انا اتم اكرف لين يخلص الدوام والناس كلها تروح وانا اقعد اكمل الشغل لانه ما يتأجل ( دم وبلاوي تخترب اذا تمت ) وكنت اخلص واقعد ادخل النتايج وو و و … كنت فعلا اعاني و ولدي في الحضانه و يخلص موعد الحضانه ولازم استلمه واذا تأخرت يحسبون علي اوفر تايم 50 درهم
بعد ما طفح الكيل وحسيت انه الوضع زاد عن حده قمت ما اكلم مسؤولتنا لانها انحيازيه وااايد
قمت اسير للمسؤوول الاداري على طووول واشتكي فصاروا يحسبون لي حساب ومرات اذا السالفه تستاهل اسير للمدير واهني صاروا يخافون مني ويقولون هاي تشكل علينا خطر خخخخ
بعد ما صرت قويه و اواجهم حتى الشفت ما قمت اداومه خير شر انشااال عني بأمر من المدير !
صرت اروح الساعه 1 بعد ما كنت اقعد للساعه 4 واكثر مرات …
صرت آخذ اجازات اذا ولدي مريض او انا تعبانه و محد يقوللي لاااا !!
ما صرت أستأذن صرت بس أطرش مسج انا ما بيي اليوم عندي ظرف !!!!
للعلم قبل كنت اسير اداوم يوم ولدي مريض وانا قلبي يتقطع وحرارته 39 وفوق وحتى حركه ما يتحركها واقولهم بستأذن يقولون لا نحن عندنا وايد شغل وضغط …!!! هذا كله لاني طيبه ..
والله نفسيتي تعبت وحسيت انه المكان اللي انا فيه وسسسخ و القوي فيه ياكل الضعيف !
لاني شفت نفس حالتي ناس ضعاف وصار لهم سنيييين وهم نفس حالهم ما تغيروا واللي شرانيين ولاعبين بذيلهم كل سنه يترفعون ويزيد راتبهم !!
والله الدنيا ما فيها خير و قلت دام السالفه فيها أخلاق ومبادئ فأنا افضل اني اقعد في البيت و أربي عيالي لين الله يرزقني بوظفيه انسااانيه مع بشر يخافون ربهم !
و صح كنت استحي قبل وااايد من ريلي بسالفه البيزات لو احتجت ريال مستحيل اطلبه ..
ولو ابغي شي من الجمعيه لو شي ضروري للبيت اتم احتااااس وما اعرف كيف اقوله من المستحى واكتب له في ورقه او اطرش له مسج يوم يطفح الكيل … بس بعد ما دوامت بفتره احس صار فيه تغيير في هالناحيه لانه صار عادي ياخذ مني يوم يحتاج بيزات وطبعا انا مصاريفي زادت انا و ولدي عسب انه يسير الحضانه ومن بعدها صرت يوم احتاج اطلب منه عادي للضروره يعني ^^ خف الخجل المادي اشوي يعني