الوسم: السياحية

مرحبا خواتي
معاكم ريشة عضوة جديدة في المنتدى
وممكن تعتبروني الدليل السياحي الشامل ومستعدة لأي مساعدات أو استفسارات عن أي بلد من البلدان اللي زرتها
زرت لحد الآن أكثر من 30 دولة وفوق 80 مدينة حول العالم والشكر طبعا لله سبحانه ثم للوالد اللي يعشق السفر
والحمد لله الله رزقني بزوج بعد يحب السفر

وقبل لا ابتدي وين أحلى الأماكن عندي احب اخبركم أن من أهم اسباب نجاح الرحلة السياحة من خبرتي هي الأمور التالية:
أولا : الميزانية المبحبحة خخخخخخخخخخ يعني تحطين لج ميزانية بس ممكن تخلين جزء بسيط للمشتريات الفريدة من نوعها واللي ماراح تتكرر وممكن تندمين بعدين انج ماشتريتيها وعادة هي تكون غالية مثل السوفانيرزأو لوحات نادرة أو صناعات يدوية للبلد نفسه
ودايما خلي عندج فلوس للطوارئ
نصيحتي لا تسافرين بTight Budget

ثانيا: الجو…..طبعا ممكن الحر يقلب رحلتج نكد وملل وحتى البرد والمطر يمنعج من الخروج والتمتع بأجواء البلد
حاولي ترتبين الرحلة في أجواء مناسبة ولا تفكرين تسافرين في الشتا حرام الواحد يترك بلده والجو الحلو البارد في الشتا ويخسر على أي مكان في العالم…مع اني من محبي البرد

أفضل الأوقات لزيارة أوروبا بالنسبة لي هي من شهر 2 ( أحب البرد) إلى 6 يعني تلحقين على الربيع ومافي زحمة وممكن شهر 9 بداية الخريف الجو شوي بارد بس حلو

بالنسبة لدول شرق آسيا مثل ماليزيا وتايلند طبعا معروف ان طول السنة نفس الجو بس منسوب الأمطار يتغير من 10 لي شهر 4 افضل الأوقات

بالنسبة لليابان وكوريا والصين أحلى وقت هو الربيع طبعا وقت تفتح أزهار الكرز من شهر 3 و 4 وممكن بعد في الخريف شهر 9 و 10 ولا تفكرين تروحين في الشتا برد غير طبيعي

وطبعا استراليا ونيوزيلنده وأمريكا الجنوبية وجنوب أفريقيا الصيف والشتا عندهم عكسنا أفضل وقت عندي هو وقت تحول الفصول يكون الجو معتدل

وأمريكا وكندا في الصيف حر إلى معتدل وفي الشتا برد لا يطاق بالأخص كندا تجنبي السفر في الشتا كئيب جدا

ثالثا: وبالنسبة لي أهم شي هو الناس اللي في البلد يعني شعب الدولة نفسه صدقيني له دور وايد كبير حلو تروحين مكان تحسين انج مرحب فيج وخالي من العنصرية للعرب واهل البلد طيبين ويحبون يساعدون

رابعا: الحجوزات: شوفي في بلدان ممكن انج تحجزين لها طيران والفنادق من النت وفي بلدان أبدا مايصلح هالنوع من الترتيبات معاهه
شخصيا أفضل إني احجز مع شركة عطلات معروفة تضمنين مستوى الفنادق والتنقلات والطيران طبعا مثل الإمارات للعطلات وعطلات طيران الإتحاد اللي اسعارها دايما مناسبة
مع اني سافرت وايد عن طريق حجوزات النت أهم شي ترتبين الرحلة بالتواريخ والمصارف على إكسل شيت وتسوين البدجت ( هذا تخصصي دايما )

خامسا: مستحيل أسافر قبل ما اسوي دراسة مستفيضة عن البلد وأحب اني اقتني كتاب
Lonely Planet
للبد اللي رايحة اسافر له الكتاب سعره فيه بصراحة مافي شي عن البلد مايذكرونه لج وفي نفس الوقت يذكر الكتاب كل المساوئ والصعوبات اللي ممكن تواجه المسافر بصراحة كتاب روعة
ولو حبيتي تعرفين عن الفنادق مافي أحسن من
Trip Advisor
هذا موقع ممكن تدورين عليه في الغوغل مفيد جدا
يكشف لج كل شي عن الفندق وفي صور الناس مصورينها يعني كل شي مكشوف
ومرتبين الفنادق بحسب الأفضلية والناس يكتبون تجاربهم عن الفنادق والمطاعم والأماكن السياحية في البلد

ولو حبيتي تشوفين صور للمناطق ممكن تدخلين
Google earth
تختارين المدينة وراح تطلع لج كل الصور للمنطقة

سادساً : اغتنمي الفرص …أنا دايما اتابع مواقع شركات الطيران للعروض
وكل شركات الطيران محفوظة عندي على Favorites بصراحة في عروض لقطة وخصوصا في الشتا ممكن تحجزين وتسافرين في الصيف.

سابعا: لا تسافرين وقت الزحمة واااااااايد يفرق احنا نسافر أو قبل أو بعد العطلة الصيفية
طبعا هالشي غير ممكن للي عندهم عيال وامتحانات بس حاولي دايما تسافرين في غير أوقات اللي الناس كلها مسافرة تجنبا للزحمة

النقطة الثامنة: وسيلة التنقل لها دور مهم…في المدن المشي هي الطريقة المثلى إذا كانت الأماكن السياحية قريبة
وبعدها عندي الميترو
حاولي تتجنبين التاكسي إلا في الضرورة وايد غالي وعادة يلفلفج على البلد كله قبل لا توصلين المكان اللي تبينه

في الأماكن اللي فيها الطبيعة حلوة لا تفوتين على نفسج فرصة التعرف على مناظر البلد.
أفضل طريقة عندي هي استئجار سيارة هذي الطريقة مفيدة لما تكون طرق البلد مهيأة وسهلة
أو ترتيب سيارة مع سايق أو باص صغير لو كنتوا مجموعة…وايد أفضل من الباصات السياحية المشتركة عندج خصوصيتج وتقدرين توقفين في أي مكان وتتحركين في الوقت اللي يناسبج.

بعد السيارة أفضل القطار لمشاهدة المناظر الطبيعية

وبعدها الطيارة

وآخر شي عندي الكروز السفينة البحرية مع انه تجربة وااااااااايد حلوة بس في ناس ايد يعانون من دوار البحر
والشي الثاني انج راح تكوني متقيدة ببرنامج الرحلة يعني لو حبيتي منطقة ما تقدرين تطولين فيها بعض الرحلات يوقفون في المنطقة يوم واحد بس بعد عناء وتعب الوصول والإبحار ليوم أو يومين.

أما الوسيلة الأفضل على الإطلاق واللي انصح فيها الجميع فهي السفينة النهرية شي خراااااااااافي بالأخص في أوروبا
لا دوار ولا غيره والمناظر الطبيعية من الجهتين تجربة أكثر من راااااااااااااائعة تتنقلين بين الدول الأوروبية وانتي تشوفين المناظر وفي وايد استعراضات ونشاطات
في رحلات قصيرة وفي رحلات تمتد لأسابيع وطبعا تختارين النهر والدول بس أبدا ماتحسين بتعب الرحلة البحرية

النقطة التاسعة: لما توصلين البلد حاولي تشوفين أكثر المناطق المشهورة فيه يعني أخذي جولة سياحية شاملة مادام انج وصلتي البلد
وعلى فكرة مب شرط إن المدن المعروفة واللي الكل يروحها هي الأفضل…
ممكن تكون مناطق بعيدة بس هادية وحلوة.

النقطة العاشرة:روحي خفيفة ورجعي محملة خخخخخخخخ قانون مهم حاولي قد ماتقدرين تاخذين ملابس قليلة وخلي شنطتج فاضية للمشتريات
بالأخص لما تضطرين تتنقلين من مدينة لي مدينة وايد صعب تنقلين شنط كبيرة

هذي من تجربتي اكيد انتوا بعد عندكم المزيد لا تبخلون علينا بتجاربكم
سامحوني إذا طولت عليكم
اتمنى تكون المعلومات مفيدة
ترقبوا مني موضوع جديد مميز قريبا جدا وبالصور

ههههههههههههههههههههههههه احنا الحريم مانقدر ماناخذ العدة كاملة
تخيلي لما سافرت استراليا ونيوزيلنده الجو في استراليا كان ربيعي وشوي حر في نفس الوقت الجو في نيوزلنده كان برد….اضطريت اودي ثياب شتوية وصيفية وطبعا الشنط كانت شي مهول مسكين الحمالي اللي شالهم خخخخخخخخخخخخخخ
بس في بعد حركة وحدة سويتها ممكن تفيد في هالمواقف
لو كنتي ببلد وقررتي تروحين منطقة ثانية أو بلد ثاني
خلي الشنط بالفندق واستغني عن الأشيا اللي ماتحتاجينها
لما رحت نيوزيلندة تركت الثياب الصيفية بفندق سيدني ومشى الحال
وطبعا لما تروحين فينيسيا (البندقية) لازم تسوين هالحركة ولا بتهلكين من جر الشنط مافي سيارات ولا غيره هناك
مشكورة حبيبتي ميره صغيرة على مرورج العطر

تسلمين أختي عيون شكرا للمرور

بسم الله الرحمن الرحيم …

السلام عليكم ورحمة الله وبركاته …

أسعد الله مسائكم أحبتي … بكل الخير والتقدير والأحترام …

من باب الحرص والنصح … أكتب هذا الأسطر … وهذه الكلمات … للتحذير …

في مخالفة صريحة لأنظمة المنتدى … يقوم بعض المكاتب السياحية بأرسال رسائل خاصة على الأعضاء

يروجون فيها للعروض … ويذكرون فيها بعض الحجوزات … وأنها الأرخص والأفضل ومن هذا الكلام

ومن باب النصح … والمحبة … أقول لجميع أخواني وأخواتي :

هذه المكاتب غير معروفة ولانعلم عنها شيء … أنما ( حبر على ورق ) …

وأنصح الجميع بعدم التعامل مع الأشخاص المجهولين والشركات السياحية ( المغمورة )

وأني أعرف كثير من الأخوة ( وقع ضحية ) لنصب هذه الشركات … أعرفهم شخصيآ …

والحل الأفضل والأسلم :

هو الحجز من النت … والطريقة واضحة ومشروحة بأفضل الطرق … وبالصور بعد …

وإن كان لابد من مكتب سياحي … فالأفضل التعامل مع المكاتب الشهيرة والمعروفة …

التي تعرف ( مكانها ) ونشاطها وعنوانها … وتتأكد بنفسك من مصداقيتهم وأمانتهم …

لكن التعامل مع ( مجهولين ) … مغامرة ومخاطرة … لاأنصح بها أبدآ …

وختامآ :

أسأل الله أن يوفق الجميع لكل خير في الدنيا والأخرة … وأن يبعد عنا وعنهم كل شر