الوسم: العهد

[/URL

في نص الشهر الخامس قالتليهـ دكتورتيهـ جنس الجنين ولد وكان واضح الحمدلله ، وسرت عند غيرها واكدت لي أنه ولد

بس .. ماخبرت ريلي كنت افكر في طريقه حلوه وقبل الموعد الاخير كان ريلي مداوم اترخصت منه وسرت مع حميتي خذت علبة حلاوه صغيره يعني ممكن انها تنحط في الشنطه ..

خلص دوامه الصبح واتريقنا وظهرنا سرنا المستشفى ، ويوم خلصت دقيت له ومايرد ف خفت ماتنجح الفكره ونتأخر
واخيرا وصل كان في المسيد حليله و ركبت عنده ، قالي بيمر الصيدليه لانه مصدع يبا بندول المهم خلص من الصيدليه وسألني : ماتبين ورد حق البيت؟

(ترا قبل ما نظهر قتله ابا ورد حق البيت وانا اصلا اباه حقه)

رفضت اسير المحل لانه مصدع ومتأخرين ف اصر انه نسير ناخذ ورد وهو يحب الورد مبونه

وصلنا المحل بغا ينزل حلفت عليه ماينزل لزوم المفاجئه ،

اخترت من هالالواح

واخترت الورد وخبرتها بالمناسبه وأبدعت في ترتيب الباقه

حطينا اللوح في الباقه

كتبنا الكرت

علقنا الكرت في اللوح

وخذت كرت ثالث لزقته على علبة الحلاوه وكتبت فيه :

(في كل مملكه شيخ … ومايلزم الشيخ
الا ولي العهد .. وهذي بشاره بولاية عهد جديده ،
وبصفتك ابو ولي العهد المنتظر .. حبيت انك اتكون
اول من ياكل حلاوة الشيخ الصغير … وولي عهدك
ونجلك الغالي … هذي البشاره ويتك
وعاد عليك تختار له اسم حلو … يتربى في عزك

من : أم ولي العهد)

بعد ماخلصنا

اشرت لها ع سيارة ريلي كان واجف جدام المحل ، وقلتلها بسبقج عشان اصوره

وانتي تعالي وراي وعطيه الباقه

لاحظوا كان كسلان قبل المفاجئه تراه هاه !!

نيي لردة فعله :

ركبت السياره وتعذرت بأنيه تعبت من الوقفه ، ويت الفلبينيه دقت الجامه وبطل الجامه ، طلع بوكه

وسألها : جم حسابج؟؟

قالت : هذا هديه من زوجتك ومدفوع ، وقالت له مبروك

قال : مبروك!!

تم يطالع الورد ويطالعني ، رد طالع الورد وطالعني ، اشرت عشان ياخذ الورد ، وخذاه وشكرها وسارت

اول شي سواها شم الباقه وقال : الله ريحته حلوه بعد !!

عقب انتبه للوح وقرا العباره : (wellcome boy)

بدت عيونه تصغر وابتسامته تكبر تكبر تكبر ، وطالعني حتى ماقال لاتصورين

وعقب قرا الكرت اللي ع الباقه مب متأكده من الكلام صح ولا؟
(congratulations! to your new angel comming on your way)

المهم ورد طالعني ، وشاف كرت ثالث ملزق ع علبة الحلاوه ، وبصوت عالي وابتسامه عريضه قراه :

بدى يقرا في (كل مملكه شيخ ومايلزم الشيخ الا ولي العهد)

قال : صـح

وكمل : (هذي بشاره بولاية عهد جديده وبصفتك ابو ولي العهد حبيتك تكون اول من ياكل
حلاوة الشيخ الصغير وولي عهدك نجلك الغالي)

قال : نجلي ؟ نجلي انا والله صدق ؟!!

وكمل (هذي البشاره ويتك وعاد عليك انك تختار له اسم حلو … يتربى في عزك)

قال : امين ان شاء الله ! .. متى خبروج !! .. اكيد ولا لا!!!

ف بغيته يشك في الموضوع ويحتار قلت له : لحظه لحظه شوه فهمت؟ مب يمكن فاهم غلط

قال : فهمت طال عمرج البيبي ولد

قتله : لاء مب ولد

قال بتردد : شوه بنت ؟؟

قتله : ولابنت ريال من فضلك ..!

قال : اصلا عارف وترا ازرق مب وردي يعني ولد آآآآآآآه والله كان قلبي حاس

وبطل الجامه وفر علبة البندول ، قتله : ليش ليش ليش!!

ضحك وقال : ماباه شفيت خلينا في المهم احينه

خلاف تم يشم الورد ، وسرحان بعييييييييييد ، خلاف خذ اللوح من الباقه وباسه ورده مكانه

وهاي احلى لقطه في الفيديو كله يوم اشوفها احس بعفويتها وصدق احساسه فهالحركه .

عقب طلع من بوكه 500 درهم قال : هاي البشاره عطيها

(ترا عندنا الريال اذا بشروه بشي خاصة مولود
لازم يعطي البشاره للشخص اللي مطرش يبشره وعادة ماتكون البشاره بيزات او شي يستفيد منه المبشر)

بغيت انزل عسب اعطيها قال : لاء ممنوع عشان ولي العهد مالي خليها هيه تييج ..

ودق لها هرن ويت وعطيتها وشكثر ستانست حليلها

وطول الدرب يسوق والباقه في حضنه ،، وبغيت اشلها
قال : لا لا خليها خليها …

وتم جي ليييييين ماوصلنا البيت ، ويوم وصلنا ، سرت بدلت وصليت ، ونزلت حصلت الحبيب

يآآلس ويآآكل الحلاوه ، ويشرب اقهوه ، ويقرا الجريده

قلت : اشعليك بتستوي بابا

قال : ابو ولي العهد من فضلج خخخخ

وين الباقه حاليا :

العصر يوم سار الشركه باقة الورد خذها وياه وهناكي عنده مزهريه زجاج خلّى فيها شوية ماي

ويا الورد ، وحطها ع مكتبه واول ماوصل طرشلي الصوره ، وورده وحده احتفظ فيها مع الكرت واللوحه في البيت

يتبع >>

اليوم الثاني عزمونا ع الغدا في بيت هله ،وفالدرب كان كل ادقيقه ايرمسهم هاه رتبتوا الموضوع ؟؟

خلصتوا ؟ نحن ترانا واصلين؟؟

بس ماحبيت اتدخل ، لانه شي بينه وبين اهله عرفتوا ! ويوم وصلنا صدقونيه من عند الباب

يآآآآآآآآآآليييييييييين داخل مسوين زينه بالازرق وبالونات وريلي يايب كيك ، وحلاوه حق اليهال

وكاتبين عبارات

انا ماكنت اعرف شوه عندهم وكنت مستغربه من الزينه بس ماسألت بما انه خواته 2 مربيات جريب

وعاد انحن عندهم من الضحى واتغدينا وقيلنا وانتهت زيارتنا لهم ع المغرب وبعد ماصلينا المغرب

طرشلي مسج (يالله بنسير بيتكم ) ولبست عباتيه ع اساس بنسير بيت هليه ، والعشا هناكي !!

وقبل مانسير ازقرته امه داخل عندنا طبعا محد غير انا وخواته وعيالهن وامه ،

واول ما حدر ريلي تقولون معرس شوه (ال ي ب ا ب) والتصوير والتصفيق ، واليهال يصارخون ويناقزن

وينثرون ورد ع ريلي وعليّه

واخته زخته من يده يلسته حذالي وعطته علبه ع شكل مرضعه وقالت له : م… يالله بنبدا السحب ؟!

وغمز لها وضحك

اتفاجئت طبعآ ماكنت فاهمه شي من اللي مستوي ومستغربه ، اي سحب ؟

قال : فهمتي ؟

قتله : لاء

وخذ العلبه جدامهم كلهم

وقالي :

شوفي انا محتار بين اسمين وهالعلبه فيها الاسامي الحين مب عليج الا انج تسحبين ورقه وحده بس

منهن وبنستقر ع الاسم المكتوب فيها شرايج؟!

بغيت اصيح بس مسكت عمري

قتله : موافقه

خلاف عطاني اياها

قال : موافقه عيل بطليها واختاري ورقه بس واقري الاسم

خلاف سميت ودعيت في خاطريه وسحبت ورقه وعطيته ،
قالي : لاء لاء بطليها اقريها

طبعآ كلهم مستعيلين عسب يعرفون الاسم ، اللي حاطه ايدها ع ثمها واللي ايدها على عيونها واللي توايج وعينها في الورقه واللي تصور .. والكل في ترقب

وبطلت الورقه

قالت عمتيه (ام ريلي) : عاد خبرينا (م…) شوه كاتب فيها ؟

وقلت : … بن …. الفلاسي

قالت امه : ونعم والله

ونشت وهي تقول : والنّعم .. والنّعم .. والنّعم ..

ويت باسته ولوت عليه دمّع الريال خخخ ، وباستني وحضنتني

قالت لي : احسن يوم البجر ولد خلاف ورا الولد ييبيله البنات

ريلي قالي : تشوفين كلللل هذا ؟ تعرفين مسواي حق منوه؟ مسوينه لج ..!

ماقدرت اقول شي كنت مدمعه بس ميوده عمري

وكلهم يصفقون ويصارخون كان جو وايد حلو .. والمفاجئه احلى

خلاف سلمنا عليهم وظهرنا وفي السياره بصراحه صحت وساعه يسكتني

،، هذي كانت مفاجئته هوه ،،

(والله يتمم لكل الحوامل ويرزق كل المتأخرات عاجل ان شاء الله)

شمسه المرر